ДК,
Веќе официјално сме во втората половина од 2022.
Мојата работа е парцијално канцелариска, парцијално теренска. Во оваа инстанца од животот, прифаќањето на тој предизвик беше преголем залак. Најавив отказ и најдов нова, физички, помалку исцрпна работа. Можеби е грешка со оглед на тоа дека тешко повторно да наидам на фантастични услови за работа, фантастични луѓе и фантастична работна атмосфера. Коцките ми се поклопија, но сепак тоа исцрпување е пречка за реализација на животните приоритети и афинитети.
Исто, ова е период на планирање на одмори, каде до лани, одев со железни нозе зачинети со тешки и нервозни преговори, а оваа година им се радувам на долгите ноќни прошетки низ плажа кои обично траат до раните утрински часови. Ќе се гоштевам со целокупната атмосфера која ја нуди тој пејсаж, звукот на брановите, чистиот воздух и патот осветлен од месечевите мени. Таа мала, за многумина и незначајна компонента, е срцевината на самиот мој одмор.
И да, имам нова маза, оваа не ми ја подметнаа во канта или двор, туку ја најдов заглавена во кола. Бебе како бебе, брзо ме освои. Каде три, таму и четири. Сега е разигран немирко, палавко и закачко.
#ЗаГастербајтерскитеРаботи
