И последниот дел од овој извештај го посветив на филмовите кои би требало да имаат премиера во 2018 година, а се снимени пред една-две па и повеќе години.
1.
Сведок/ Чекај ме е филмот кој најрано се снимаше од овие проекти. Снимањето беше во октомври-ноември 2014 на повеќе локации низ Македонија, Хрватска и Ирска. Филмот е акциона драма финансирана од Македонија, Швајцарија, Ирска и Хрватска, а е режирана од Митко Панов (наш режисер кој живее и работи во Швајцарија, оттука и поддршката и познатиот актер Бруно Ганц.) Игра меѓународна екипа составена од швајцарскиот актер Бруно Ганц, ирските актери Гари Вилан и Падрејк Делејни, Босанците Велимир Топич и Емир Хаџихафизбегович, косовскиот актер Армонг Морина и домашните актери: Митко Апостоловски, Јоана Поповска, Наташа Петровиќ, Симеон Дамевски и Рефет Абази. Филмот е сниман на англиски јазик.
П.С.
@filip-bt пред 2-3 недели имаше некоја проекција во Милениум, ама претпоставувам некоја пробна проекција или проекција за екипата, а официјално би требало да го пуштат на некој фестивал во 2018.
2.
Слобода или смрт/ Годината на мајмунот е најновото остварување на Владимир Блажевски. Филмот е сатирична комедија и се снимаше јуни-август 2016 на преку 80 локации низ Скопје, Битола, Гостивар и Дебар. Работен е како македонско-косовско-српско-словенечка ко-продукција. Главната улога ја игра Игор Ангелов, а покрај него се појавуваат и актери од Србија, Хрватска и Словенија.
Филмот уште кога се снимаше, Блажевски најавуваше премиера за 2018-та. Колку што знам веќе е завршен и останува да видиме каде и кога ќе има премиера.
3.
Жртва е дебитантското остварување на Марија Џиџева. Сценариото е на Огнен Георгиевски, а филмот се снимаше август-септември 2016 г. Филмот е драма која се случува за време на воениот конфликт во Македонија, а покрај од Македонија доби поддршка и од Србија. Една од главните улоги ја толкува српската актерка Мирјана Карановиќ, а во останатите улоги се Данчо Чевревски, Димитар Илиевски, Наталија Теодосиевска, Димитар Георгиевски, Дениз Абдула, Даниела Ивановска и Петар Ѓеоргиевски.
Тогашните очекувања на режисерката беа дека филмот ќе има премиера во 2017-та година, ама тоа не се случи, па останува да чекаме да го прикажат во 2018-та.
И последниот филм што беше сниман лани или полани е
Мејкинг Офф (Making Off) - независен филм на режисерот Кузман Кузмановски кој официјално не беше поддржан од македонскиот филмски фонд, а годинава на филмскиот маркет во Кан беше претставуван на штандот на Агенцијата за филм. Што и како и зошто го претставуваат ако не го поддржале и зошто ако го поддржале го нема на списокот на поддржани проекти не знам.
Снимањето било летото 2015 или 2016 г. Главните улоги ги играат Александра Павлова (актерка од Драмски што ќе дебитира со голема улога) и Владо Дојчиновски (брадоњата од новите приказни). Во останатите улоги играат и Ванчо Петрушевски, Дубравка Киселичка, Лазе Манасковски..
Тоа е се` што сум слушнал за филмов.
Се надевам дека во 2018-та ќе гледаме подобри домашни филмови, ќе има подобар избор на идни проекти и ќе носат подобри филмови низ кината и домашните фестивали.
Bye bye 'till next time.
