ФУДБАЛЕРОТ НА ПЕЛИСТЕР ТОНИ ПИТОШКА СЕДУМ МЕСЕЦИ Е НАДВОР ОД ФУДБАЛСКИОТ ТЕРЕН
Нема кој да ја плати операцијата на лигаментите
Тони Питошка (26), член на битолскиот Пелистер и еден од досега најперспективните фудбалери кои во изминатите деценија и пол со успех ги минаа клупските и репрезентативните погони (пионери, кадети, младинци и сениори) од минатиот јули наваму, наместо на фудбалскиот терен, деновите ги минува во исчекување на операција на лигаментите по повредата во Ловеч, Бугарија, на подготовките пред почетокот на Купот на УЕФА. Меѓутоа, неговите надежи дека наскоро ќе ги надмине здравствените повреди од ден на ден како да спласнуваат, по што, за жал, кај него се поприсутна е дилемата дали и натаму да остане во игра или да се збогува со зелениот терен во најзрелите фудбалски години, по настапите во репрезентативните селекции на Македонија и во клубовите Пелистер, Партизан, Чаковец, Кроација Севесте и во бугарскиот Марек.
Питошка се наоѓа во Лондон (кај тетка си) од пред месец и половина, во обид да биде опериран, но, како што истакнува неговиот татко, тој изгледа разочарано и станува се поизвесно дека ќе се откаже од фудбалот.
- Малерот со повредата на лигаментите, несомнено, го измачува, но уште потешко му паѓа крајно некоректниот и неспортски однос на челните луѓе на претходната управа на Пелистер, односно Стојковски и Мицевски. Тие, како искусни фудбалери, добро знаат што значи клубот да сврти грб на играч кога му е најтешко, поради што лесно може да ја прекине кариерата - вели таткото на Тони, Петраки, додавајќи дека доколку навреме ја санираше повредата, Тони сега ќе беше на услуга на пелистерци.
Нашиот соговорник открива неколку интересни детали што не му одат во прилог на ФК Пелистер, како на еден од најдобрите македонски клубови.
- Станува збор за околу 2.000 евра доколку операцијата се изврши во странство (дома е поевтино ако осигуреникот има сини картони), и не би можело да се каже дека тоа е голем издаток за Пелистер. Второ, нашето семејство е историски поврзано со Пелистер, бидејќи од пред 30-ина години за клубот во континуитет настапуваа фудбалери како што се дедо ми Теохари, татко ми Александар, братучед ми Димитар, потоа јас, до Тони, кој како и мене почна во Пелистер од пионерска возраст. И трето, во 2004 година, како фудбалер на Марек, Тони имаше повреда на лигаментите на левата нога, но управата на бугарскиот прволигаш веднаш реагираше, не чекајќи никого и го прати на операција на сметка на клубот, која чинеше 2.500 евра. По еден месец син ми закрепна и продолжи со играњето натпревари.
ФУДБАЛ - ПЕЛИСТЕР СО ПОЛОВИНА ЕКИПА СТРАНЦИ
Шест интернационалци под "Тумбе кафе"
Судејќи според досегашниот прилив на странски фудбалери во редовите на Пелистер, веројатно напролет половина од екипата ќе ја сочинуваат интернационалци. На тренинзите на пелистерци засега се вклучени двајца Срби (Мирослав Станковиќ од Банат и Ѓуро Јанковиќ од Земун), двајца Бразилци (Фанко Алавес Де Соуза и Сантос Жуниор). Според зборовите на претседателот на Пелистер Круме Волнаров, кој крајот на месецов во Битола треба да допатуваат и двајца фудбалери како позајмени играчи од бугарскиот прволигаш Литекс, со кои битолчани ја продолжуваат соработката воспоставена од пред две години.
Редовите на Пелистер во овој момент го имаат напуштено четворица фудбалери: Момировски, Тодоровски, Миранда и Жуниор, а најверојатно дека ќе замине и Јованов. Меѓутоа, списокот на фудбалерите кои ќе дојдат во Пелистер, или ќе си заминат се уште не е затворен.
