Со невозможност граничи Барса да се врати на формулата 1:1 до 30ти август...
Се чини дека Дани Олмо ќе биде единственото засилување на Барселона во летниот преоден рок. По кој знае кој пат сме насамарени, низ медиумите се кажува едно, се ветуваат брда и долини, а во пракса ситуацијата е многу полоша. Па така од шпански дрим тим со Нико Вилијамс, Дани Олмо, Микел Мерино... останува да се крстиме во Пау Виктор, Касадо, Пабло Торе, Бернал и останатите кантераноси кои се наметнаа кај Ханси Флик.
Сагата со Нико, можам да кажам дека е и дефинитивно завршена, но не поради тоа што баскиецот ја одби или насамари Барселона, туку поради тоа што клубот не успеа навремено да ги балансира сметките, моментално Барселона сеуште не работи по формулата 1:1, што значи дека тие 40 милиони не беа доволни, за нормално функционирање во овој преоден рок, требаше да се потпише и договорот со Најк. Па денес, 14.08.2024 со невозможност граничи Барселона, летово да работи по формулата 1:1.
Е сега, Барселона успеа на некој начин финансиски да се стабилизира и сезоната 2023-24 да ја заврши позитивно, примарно поради продажбите на Дембеле и Кеси, веќе амортизирани фудбалери, чии продажби се прокнижија како чист приход. Но, од друга страна тука се старите долгови, кои откако легнаа тие 40 милиони од Либеро, остануваат уште 60тина милиони минус.
Оваа управа од секогаш инсистирала дека минусот нема да се покриво со продажба на играчи, па се бараат начини за обезбедување на нови приходи. Тука е клучот во договорот со Најк, за Барселона конечно и долгорочно да се врати да работи по формулата 1:1. Но, иако според медиумите договорот уште од мај е “прашање на часови“, сепак со невозможност граничи да се потпише пред 30ти август.
Значи, денес 14.08.2024, ФК Барселона и натаму е “блокиран клуб“. Тоа ги кочи и продажбите, а штом нема продажби, тогаш и засилувањата граничат со невозможност. Пак ќе се вратам на пластичниот пример со Рафиња, ако Барселона го продаде бразилецот за 80 милиони, па по амортизационен план има уште 30 за амортизирање, од продажбата на Рафа остануваат 50 милиони приход... и ако Барселона по формулата 3:1, тогаш само 1/3 или 16 милиони ќе може да ги искористи за нови засилувања и заминувања.
Што значи дека ако Барселона пробува сметките да ги балансира со продавање на играчи, тоа ќе значи голем чекор назад од спортски аспект... Бидејќи настрана повредените Араухо и Де Јонг, моментално само Кристенсен, Гундоган (веќе амортизирани) и Рафиња, Кунде може да донесат солидни приходи... но, тоа ќе послужи само за баланс на сметките, а не и за финансирање на други засилувања.
Затоа, клубот сега прави напори да се ослободи од вишокот, веќе го продаде Жулиан Араухо, сега следуваат имиња како Ленглет, Витор Роке, Мика Фаје... најверојатно Алеиш Ваље и Кристенсен ќе бидат “непланирани“ заминвуања, само за да се регистрираат Дани Олмо и Пау Виктор... Не верувам дека во овие околности би имале 'last minute' заминување на Рафиња и(ли) Гундоган.
А Нико Вилијамс, останува да се надеваме дека нема да го продолжи договорот со Билбао и одгодина ќе важат истите услови како ова лето, па тогаш ќе може Барса да го донесе.
Со невозможност граничи Барса да се врати на формулата 1:1 до 30ти август... Се чини дека Дани Олмо ќе биде единственото засилување на Барселона во летниот преоден рок. По кој знае кој пат сме...
www.facebook.com
