Сите шест изданија на „Зелената Милја“ од Стивен Кинг преведени на македонски јазик.
Среќни сме да ве информираме дека го издадовме серијалот „Зелената Милја“ на Стивен Кинг, кој што претставува роман во шест дела. Изданијата ќе бидат достапни секоја недела со дневните весници на Медиа Принт Македонија и доплата од 100 денари.
„Зелената Милја“ е светски бестселер, и претставува најнеодоливото патешествие на Стивен Кинг. Идејата за објавување на романот во повеќе „епизоди“ потекнува и од самиот автор. Всушност и оригиналната публикација на серијалот го следи овој формат – роман во книшки. Инспирацијата за ваков вид на публикување, Стивен Кинг, пак, ја црпи од Чарлс Дикенс кој ги објавувал романите во продолженија или како додаток во средина од списание.
„Овој формат првпат го сретнав во Сатрдеј ивнинг пост и ми се допадна затоа што, на крајот од секоја од епизодите, читателот има речиси ист удел како и писателот – имаш цела недела да одгатнеш кон каде следно ќе се извие змијата. Освен тоа, ми се чини дека ваквите приказни се читаат и се доживуваат многу подлабоко, затоа што се читаат дозирано. И да сакаш не можеш да ја голтнеш одеднаш“ – објаснува Стивен Кинг, во самиот предговор од првиот дел од романот.
„Се сеќавам дека еднаш, кога имав дванаесетина години, влегов во дневната и ја најдов мајка ми како седи во омилената нишалка и го ѕирка крајот од книга на Агата Кристи, а со едниот прст обележува до каде стигнала на околу педесеттата страница. Се вџашив и ја опоменав, а потоа ù посочив дека да го прочита крајот на детективски роман предвреме е исто како да го јаде само белото од средината на бисквитите ’Орео’, а потоа да ги фрли бисквитите“ – продолжува Кинг во предговорот.
Одлучивме да го следиме оригиналниот начин на објавување на романот во повеќе ’епизоди’, па така на читателот верно да му го пренесеме она што Стивен Кинг, мајсторот на раскажувањето и господарот на неизвесноста и теророт, сакал да го постигне со објавувањето на ’Зелената Милја’ како серијал“.
Инаку, романот „Зелената Милја“ е за прв пат објавен во 1996 година, и досега е преведен на 30 различни јазици и продаден во 2 милиони копии низ светот. Според романот е снимен и филм, со Том Хенкс и Мајкл Кларк Данкан во главните улоги, а во режија на Френк Дарабонт. Филмот, како и романот, е добитник на бројни награди за најдобра улога, најдобар трилер, најдобро сценарио, како и бројни номинации за Оскар во 1999 година.