Аболицијата на потпретседателот на СДСМ Зоран Заев од страна на шефот на државата отвори фронт помеѓу актуелното раководство на најголемата опозициска партија и шефот на државата Бранко Црвенковски. Функционер на СДСМ, кој побара да остане анонимен, изјави за „Дневник“ дека „не им е јасно зошто Црвенковски мораше да брза со аболицијата“.Не можеме да разбереме зошто аболицијата можеше да се даде само во саботата и зошто нејзиното прифаќање беше условено како „земи или остави“. Како партија имавме поинаква стратегија, но Црвенковски не' стави пред свршен чин. Не сме сигурни дека сега сите граѓани ќе бидат убедени во невиноста и политичката монтажа на случајот „Заев“. По ова, единствен резултат е тоа што Заев стана политички полумртовец, а СДСМ со наведната глава ќе се врати во Собранието - оценува овој извор. Тој објаснува дека партиската стратегија била да се почека ново изјаснување на истражниот судија и на Кривичниот совет. Ако судијата го ослободел, а советот и понатаму го задржел Заев во притворот, ќе станела очигледна политичка заднина на случајот.
- Тогаш ние ќе ги зајакневме активностите, ќе правевме митинзи и други работи. Вака, сега се многу помали шансите Заев да застане на чело на партијата, што претходно речиси беше готова работа. Кога го прашавме Црвенковски зошто му се брза да го направи тоа, тој ни одговори „ова не е драгстор за да може да се зема кога ќе се посака“. Излегува дека во случајот главните победници се Бранко Црвенковски и Никола Груевски, бидејќи ним тоа најмногу им одговара - вели овој извор во СДСМ.Еден ден претходно СДСМ со две соопштенија го поддржа предлогот на Црвенковски и најави дека ќе се врати во парламентот. Овој извор, пак, тврди дека враќањето на СДСМ во парламентот требало да се случи преку отворање дијалог со ВМРО-ДПМНЕ за Деловникот и за другите спорни закони. Очекувале Црвенковски да свика лидерска средба по што брзо би се дошло до компромисното решение.
- Анализите што ги правиме укажуваат дека еден од мотивите за ваквото брзање на Црвенковски е и неговата желба да си го расчисти патот до лидерската позиција. Во партијата има и мислење дека неговото враќање не би можело да донесе пресврт каков што би бил можен со Заев. Сега ни е битно што ќе каже Заев. Ако истапи со став дека аболицијата е добар потег, ќе го прифатиме тоа, но ако каже дека тоа не беше добро, во партијата ќе отвориме расправа за потегот на Црвенковски - вели овој функционер. Извори блиски со шефот на државата велат дека на некого во СДСМ најверојатно не му е јасна логиката на одлуката на Црвенковски. Главната поента не е аболиција на Заев, туку враќање на опозицијата во Собранието. Претседателот низ разговор со раководството на коалицијата „Сонце“ и на ДПА ги утврди проблемите што го спречуваат враќањето на опозицијата во парламентот. Аболицијата не е крајната цел, туку еден од условите за да се дојде до воспоставување нормална парламентарна демократија во Собранието. Особено ако се имаат предвид забелешките на сите претставници на меѓународната заедница дека Македонија нема да добие позитивен извештај и датум за преговори со ЕУ без враќање на опозицијата во законодавниот дом - велат нашите соговорници.Според нив, некој во СДСМ се залага за обратна логика - Заев да излезе на слобода, а СДСМ да не се врати во Собранието. Тоа нема да ги реши проблемите во земјава, а штетно е и за СДСМ. Несериозно е за партија што се прокламира како државотворна, наместо да води битка во институциите, за круна на своите активноста да ги смета митинзите и блокадите на патиштата. Тоа е незрела политика, во време кога на сите им е јасно дека бојкотот никому не му донесол корист - велат тие. Други извори во СДСМ се изненадени од ваквите обвинувања до Црвенковски.
- Бидејќи партијата официјално го соопшти својот став дека го прифаќа предлогот на претседателот Црвенковски, овие анонимни извори сигурно се опоненти на политиката на раководството на СДСМ, предводено од лидерката Радмила Шекеринска и потпретседателот Зоран Заев. Прашање е со какви цели и мотиви го прават тоа и по чиј налог - велат во СДСМ. Во Владата вчера оценија дека ова што се случува е последна битка помеѓу мрачната транзиција и просперитетна иднина. Ова е отворен фронт помеѓу Владата и претседателот. Заев и Црвенковски ова го направиле во договор при што струмичкиот градоначалник само глумел дека не сака аболиција, а Црвенковски го убедувал. И во партијата им било договорено да има аболиција. Првпат во историјата во транзициските земји од Југоисточна Европа се случува аболиција за финансиски криминал - коментираат владините извори.Тие тврдат дека ВМРО-ДПМНЕ нема намера во парламентот да покрене постапка за импичмент на шефот на државата.
