18.08.2005 00:00 Околу 12 илјади луѓе овде живеат во беда, од социјална помош, без надеж дека ќе најдат работа. Единствениот излез го гледаат во криминалот, сивата економија и шверцот.
„Криминал ќе има - кога нема работа, мора да се фатат луѓето со нешто, мора да јадат. Има работа само за криминал, друг начин нема. Сакам да најдам работа, ама нема кај да работиш“, изјави жител од „Дижонска“.
Иако само 2 километри оддалечена од центарот на Скопје, „Дижонска“ е далеку од државните институции. Тука се уште се кријат тајните за милитантите и терористите од времето на воениот конфликт. Се краде, пука, а таксистите го избегнуваат квартот.
Жителите велат - никој не прашува како живееме и дали сме безбедни, полицијата не посетува само кога апси.
„Владата само за фотелја мисли, за друго ништо не мисли. Ако има работа, нормално дека ни полиција нема да доѓа, нема да има беда и нема да има криминал“, вели жител од „Дижонска“.
На „Дижонска“ се живее под сите стандарди, со импровизирана канализација, водовод и осветлување. Да се легализираат дивите градби или да се урнат, општината нема одлука.
Во предизборната кампања и градоначалникот Костовски ветуваше урбанизација на населбата и поголема сигурност на граѓаните. Ниту тој се уште не направил ништо за овој дел од градот.