Референдум за името ризичен потег
Прошталните средби на Бранко Црвенковски со најзначајните европски соговорници во Брисел ќе останат запаметени пред се посилните пораки до Владата и до новоизбраниот претседател.
Спорот со името да се реши и да се негуваат меѓуетничките односи побараа еден по друг Солана, Шефер и Оли Рен од македонските власти.
„Договорот беше фантастично достигнување, мора целосно да се имплементира. Тоа би сакал да кажам - целосно. Мора нешто да се направи за да се стигне до крајот“, изјави Хавиер Солана, високиот претставник за надворешна и безбедносна политика на ЕУ.
„Не е формален критериум за влез во ЕУ, не е дел од бенчмарковите. Но реално, прашањето за името ги затегнува односите помеѓу двете земји. Треба да се најде решение“, рече Оли Рен, еврокомесар за проширување.
Спорот со името останува жешка точка, особено за членството во НАТО. Дипломати кои присуствувале на средбата, зад затворени врати на Шефер и Црвенковски пренесуваат дека Генсек е загрижен поради националистичката реторика и во Македонија и во Грција, и побарал спуштање на топката.
Шефер оценил дека референдум за името е суверено право, но и ризичен потег за Македонија. Затоа тој бара од властите во земјата, доколку распишат референдум, тоа да го сторат мудро и да не дозволат да пропадне.
Во спротивно, велат нашите извори, последиците можат да бидат негативни за нашата земја, рекол Шефер. Тој предупредил дека НАТО не сака за 10 или 15 години повторно да испраќа воени сили во регионот.
Бранко Црвенковски
За претседателот во заминување, сегашните власти треба да имаат храброст да ги засукаат ракавите во решавањето на спорот со името, како што претходните тоа го сторија со Охридскиот рамковен договор.
„Ако во 2001 година се поведевме по доминантното расположение кај граѓаните, без разлика дали зборуваме за Македонци или Албанци, политички договор немаше да биде постигнат, Охридскиот рамковен договор немаше да биде потпишан“, вели Бранко Црвенковски.
„Денес мнозинството граѓани, и Македонци и Албанци, го поддржуваат Охридскиот договор и сметаат дека е тоа добра основа за градење на иднината. Од тие причини мислам дека и носителите на државните функции во Македонија, во овој период, на ист начин треба да ја преземат одговорноста за донесување на тешки, меѓутоа значајни одлуки за иднината на државата, и во однос на спорот со Грција, и во однос на нашето интегрирање во НАТО и ЕУ“, рече Црвенковски.
Добрососедските и меѓуетничките односи во очите на Европа се мерило за зрелоста на македонското раководство, сметаат европските дипломати.
Сега од Владата, Собранието и новиот претседател се очекува да ја демонстрираат таа зрелост, да ги исполнат условите за старт на преговори со ЕУ и да ја подигнат поканата за членство во НАТО.
Остануваат охрабрувачки сигналите за визна либерализација за македонските граѓани што поскоро, но предупредуваат во Брисел, тоа не смее да биде утешна награда за недобивање старт на преговори со Унијата годинава.
Извор А1...
