Одамна не сум пишал рецензија пошто одамна не сум гледал филм. Аватар го чекав одамна, кога веќе не бев во можност да го гледам на кино, да го изгледам на двд снимка. Во подготвителна фаза, избегнав секакви трејлери и спојлери, па дури и темата за Аватар ја гледав преку еден ред за да не ми расипе некој. Неколку месеци откако излезе, за Аватар знаев само дека е на Камерон, дека е S.F., дека има некоја си планета Пандора со некои си плави луѓе со опашки. Тоа беше се. И со оглед на тоа дека се работи за блокбастер, и тоа за најскап филм на сите времиња, очекував дека ќе биде разочарување, па очекувањата ми беа многу, многу ниски.
Веројатно сето ова придонесе филмот, на мое лично изненадување, да ми се допадне, многу. Прво, имам thing за fantasy movies. Од таа некоја причина Crouching Tiger ми се допадна повеќе одколку на другите. Аватар е друга планета кога се работи за фантастичниот свет кој е насликан во филмот. Размислував дури го гледав, колкава фантазија имале тие кои ја создале онаа џунгла од растенија и животни во секакви пропорции, нешто фантастично според мене, навистина. Висечките планини беа капак на се. До сега барем, горе-долу, се ни беше сервирано во наши пропорции. Вонземјаните се скоро секогаш високи колку луѓето, живиот свет е исто така налик на нашиот. Пандора е нешто друго, тоа е сосема друго ниво во фантазијата.
Сите пишаа за приказната како најслаб дел на филмот и се согласувам, можеле да направат повозбудлива, поинтересна приказна. Но нема многу да пишувам за тоа зошто и оваа приказна мене ми се допадна. Прво, смачено ми е од тоа како луѓето се херои кои го спасуваат денот и дека во главно сме биле добри со ретки исклучоци. Вистината е дека сме лоши со ретки исклучоци и свеста ни е на варварско ниво. Во овој филм, луѓето се лошите момци и тоа ништо не им е преувеличено: нашата негрижа за природата и за сите работи, освен оние кои носат профит, а за кои сме спремни да поништиме се што ни стои на патот, тоа е нешто што ни е во ДНК и Камерон не калкулирал со тоа туку го прикажал како што е. Од другата страна, имаме раса која живее во симбиоза со природата и која има изградено свест за се што ја опкружува. Не можеш да не навиваш за нив.
Не мислам со ова дека филмот е направен за да носи некакви големи пораки, ова е филм направен за да заработи пари и како таков си ја завршил задачата. Ефектите, или поточно, комплетната слика на екранот е совршена. Ова е убава авантура во непозната земја. Дијалозите се на место, не се зборува многу, не се користени непотребни разговори за задржување време. Се кажува малку, онолку колку што е доволно. Филмот, иако долг, го изгледав со уживање, за разлика од LOTR на кој 30 минути пред крај сакав да си заминам од кино само затоа што ме здоболе задникот од мрдање лево десно.
Актерската екипа е добра, дури и Ана Лусиа, еден од најнеомилените ликови од ЛОСТ во филмов е на ниво. Се на се, ми се допадна. Го осудив предвреме, и добро е што го направив тоа. Уживав во претставата. Сега чекам да направат втор дел кој по правило ќе биде толку лош што ќе го расипе и првиот
Во меѓувреме,
8/10.
Hotel Rwanda - не сум сентиментален и пристрасен ама филмот допре до мене
. Одлична политичка комедија кој реално ги отсликува настаните за време на војната, и се разбира диктаторите прикажани на еден сатиричен начин.
