Традицијата продолжува...
Фановите на Тоше ќе го одбележат 5-ти октомври!
Обожавателите на нашата музичка мегаѕвезда, легендарниот Тоше Проески, и тоа не само од Македонија, туку од целиот Балкан, планираат да го одбележат 5-ти октомври, денот кога нивниот миленик пред две години го имал својот последен и најуспешен концерт во Скопје – на Градскиот стадион.
Тогаш Тоше посака секоја година на таа дата да се среќаваат, да пеат и да се дружат. Со еден збор, да триумфира музиката и хуманоста. За жал, трагичната судбина не му дозволи на Тоше тој лани да биде дел од концертот, кој, пак, беше направен во негова чест, со цел традицијата да продолжи и понатаму, а Фондацијата која го носи неговото име, реши концертот да се помести на друга дата – 25-ти јануари, кога е роденденот на Тоше.
Место концерт на 5-ти октомври, Фондацијата најавува објавување DVD со снимка од 2007-ма, кога Тоше за последен пат во својот живот настапи во Скопје, на триумфален концерт на кој присуствуваа неколку десетици илјади фанови од целата земја, а и од соседството.
Со оваа одлука, да нема концерт на 5-ти октомври, не се согласуваат фановите на Тоше од целиот регион, бидејќи сметаат дека неговиот аманет не смее да се погази, и дека посебно треба да се одбележат и 5-ти октомври и 25-ти јануари.
Затоа фановите планираат на таа дата да се соберат на плоштадот Македонија во Скопје, од каде би се упатиле до Градскиот стадион, или националната арена Филип Втори, место каде во 2007-ма пееа и се радуваа со Тоше, славејќи ја музиката и хуманоста.
Сите фанови и почитувачи на Тоше, на 5-ти октомври 2009-та (понеделник), со почеток во 19.30 часот, на плоштадот во Скопје да го обележиме со ѕвездено небо и со многу љубов неговото вечно постоење и денот за паметење. Со љубов – Тоше фан-клуб Скопје – е само еден од стотици коментари под статиите за нашиот мегастар, оставени на нашата страница.
Останува да видиме дали и во колкав број фановите на Тоше ќе се соберат да го одбележат 5-ти октомври, слушајќи ја неговата музика и славејќи го неговото вечно име
www.mmm.com.mk