http://www.novamakedonija.com.mk/DesktopDefault.aspx?tabindex=0&tabid=2&fCat=1&top=1&EditionID=355&ArticleID=21560
„ТАБЕРНАКУЛ“ ОБЈАВУВА КНИГА НА БРИТАНСКИОТ АВТОР МАРТИН БЕРНАЛ „Црна Атена“ потврдува дека грчките корени се афроазиски
Книгата „Црна Атена: Афроазиските корени на класичната цивилизација, Фабрикацијата на античка Грција 1785-1985“ од Британецот Мартин Бернал, издание на книгоиздателството „Табернакул“, е исклучително значајна студија што со научни аргументи потврдува дека постоењето на елинска или грчка култура и цивилизација е чиста фабрикација.
„Црна Атена“ (првпат објавена 1987 година), како ретко која друга книга, последните дваесетина години предизвикува многу научни дискусии, дебати и полемики, кои ја брануваат научната јавност во САД и во Западна Европа. Оваа студија е дел од мегапроектот „Црна Атена“, предвиден да биде тетралогија. Досега се објавени три тома, а четвртиот се очекува да се појави наскоро. Сите досега објавени делови привлекоа неверојатен интерес.
Еминентниот научник Мартин Бернал, како што вели самиот, втората половина на својот живот ја посветил на проектот „Црна Атена“, во кој со научни факти и аргументи дава одговор на прашањето за потеклото на античка Елада, за нејзината историографија и историја.
Бернал поставува две објаснувања за потеклото, што ги нарекува антички и ариевски модели. Поради тоа многу научници и критичари, уште во средината на 80-тите години на минатиот век, појавувањето на „Црна Атена“ го ставиле во контекст на академската борба меѓу таканаречените афроцентристи и евроцентристи.
На изјавите на критичарите дека Мартин Бернал со неговата „Црна Атена“, всушност, се ставил на страната на афроцентристите, тој го спротивставува тврдењето дека културните и цивилизациските достигнувања не доаѓаат само од еден центар во светот или од еден континент, туку од повеќе страни.
- Треба ли во ваква ситуација да се поставува прашањето зошто грчкото издаваштво и култура воопшто, до денес не најдоа сила и доблест да ја објават оваа книга на својот јазик? Одговорот, бездруго, се содржи во студијата на Бернал, според која и во античко време елинската цивилизација била мултикултурна, како што и денес целиот Балкански Полуостров е мултикултурен. Со други зборови тоа значи дека народите на овие простори отсекогаш се мешале и дека никој нема ексклузивно право на антиката, или поинаку кажано, тоа право го имаат сите еднакво – велат од „Табернакул“.
Доколку и во античко време Балканот бил мултикултурен, а според неоспорните факти објавени во „Црна Атена“ се потврдува дека бил, тогаш кој и зошто би имал право на ексклузивитет врз цел еден период, исклучувајќи ги сите други племиња и народи, ова е прашањето што го наметнува книгата.
Авторот се прашува дали може, туку така, без трага, да исчезнат Венетите, Пелазгите, Етрурците, Сарматите, Скитите и Аварите, како и ред други племиња што постоеле, владееле и создавале, со апсолутни докази од материјалната, духовната и општествената култура, а притоа да останат само тие што ни се познати како Елини, денес Грци?
Заклучок на студијата на Бернал е дека конструкцијата „елинска или грчка култура и цивилизација“ е чиста фабрикација на германско-виенската школа, која авторот успешно ја демистифицира и деконструира.
- Благодарение на „Табернакул“ една вака значајна книга се објавува и на македонски јазик и може да биде достапна на сите што се во потрага по вистината и суштината на тезата за мултикултурноста на балканските простори од антиката до денес, наспроти наметнатата имагинација за чиста и цивилизирана Грција - велат од агенцијата „Публицис“ кои се задолжени за промоција на книгата.
Досега се појавиле девет преводи на првиот том на „Црна Атена“: пет на европски и четири преводи на азиски јазици. Македонскиот превод е десетти, но прв на словенски јазик и прв на некој од источноевропските јазици воопшто, велат во „Публицис“.
Официјалната промоција, со присуство на авторот Мартин Бернал, ќе се одржи на Саемот на книгата на 9 април, а два дена пред тоа професорот Бернал ќе одржи предавање на Универзитетот „Св. Кирил и Методиј“.
И културолошки и генетички - врската е супсахарска
Грците имаат супстанцијална поврзаност со супсахарските (етиопските) народи, што ги одделува од другите медитерански групи, покажаа резултатите од истражувањето што Одделот за имунологија и молекуларна биологија на Универзитетот во Мадрид го спроведе пред две години, тестирајќи го ДНК - материјалот од современите балкански народи.
- Генетичката релација е поблиска помеѓу Грците и Етиопјаните, односно супсахарските народи, отколку помеѓу Грците и другите медитерански групи народи - покажа анализата.
Во ова истражување, кое го спроведе мултинационална екипа, во која имаше и македонски научници, е утврдено, меѓу другото, дека Македонците припаѓаат на постар медитерански супстрат, како Иберијците, на пример, Северноафриканците, Италијанците, Французите, Критјаните, Евреите, Либанците, Турците (Анадолијци), Ерменците и Иранците.
- Македонците не се поврзани со географски блиските Грци, кои не му припаѓаат на постариот медитерански супстрат - резимира истражувањето.
Официјалната промоција, со присуство на авторот Мартин Бернал, ќе се одржи на Саемот на книгата на 9 април во Скопје, а пред тоа професорот ќе одржи предавање на Универзитетот „Св. Кирил и Методиј“
Мартин Бернал е Британец, роден во Лондон во 1937 година, во семејство на интелектуалци - татко му Џон Дезмонд Бернал бил физичар, а мајка му Маргарет Гардинер, позната уметница. Неговиот дедо по татко бил египтолог. Високо образование завршил на еден од најелитните светски универзитети Кембриџ, каде што и станал доктор на науки во 1965 година. Пред тоа се усовршувал на најелитните американски универзитети Харвард и Беркли. Извесно време поминал и на универзитетот во Пекинг (Кина), каде што специјализирал кинески јазик и кинеска историја. Бернал бил професор на Универзитетот Корнел, САД, а претходно бил соработник и на Кралскиот Колеџ, Кембриџ.
