ВО ТЕЖОК МЕЧ РЕНОВА НА ДОМАШЕН ТЕРЕН ГО СОВЛАДА ПЕЛИСТЕР
Триумф со сомнителен пенал!!!
* Исмаили фаулиран надвор од казнениот простор, Кипријановски покажува едно, но по сугестијата на Хајдари досуди најстрога казна
РЕНОВА - ПЕЛИСТЕР 1:0 (1:0)
РЕНОВА:
Ковачевиќ 2,5
Мемеди 2,5
Реџепи 2,5
Емини 2,5
Исени 2
(37' Исмаили 3)
Нухиу 2,5
Беќири 2,5
(75' Љиворека /)
Стојанов 2
Савевски 2,5
(56' Ѓурчевски 2,5)
Игњатовски 2
Трајчов 2
ПЕЛИСТЕР:
2,5 Пашовски
2,5 Јованов
(/ Ивановски 85')
2 Димов
2 Мицевски
(2.5 Главевски 56')
3 Петковски
2,5 Елмазовски
2 Пресилски
2 Степановски
2,5 Рутевски
2,5 Блажевски
3 Жуниор
од записникот:
Градски стадион во Тетово. Гледачи: 2.000. Главен судија: Владимир Кипријановски. Помошници: Џенан Хајдари и Зоран Бојанинов (сите од Скопје). Делегат: Бранислав Јанушев (Скопје)
Стрелец: Беќири (п) 40' (Р).
Ж. Картони: Мемеди, Реџепи, Стојанов, Трајчов (Р) - Димов, Петковски (П).
Играч на натпреварот: Исмаил Исмаили.
Во тежок натпревар Ренова на домашен терен успеа минимално со 1:0 да ја победи екипата на Пелистер. Во натпревар каде победата беше императив за двете екипи домаќините имаа повеќе шанси за гол. Гостите од Битола натпреварот го почна претпазливо. Тетовци ја искористија теренската надмоќност и во првото полувреме целосно ја имаа играта под своја контрола. На повлечената и претпазлива игра на "пелистерци" која се базираше на брзи контри за да се изненади домашниот тим Ренова во првите 30 минути одговори со офанзивен фудбал, што резултираше со неколку полу шанси, но без сериозна закана кон голот на Пашовски. Како одминуваше времето Пелистер се ослободи од притисокот и преку Жуниор и Јованов го загрозуваа голот на Ренова.
Сепак, нафрлените топки од десно немаше кој да ги смести во мрежата на Ковачевиќ. Пресвртот во играта дојде по повредата на Исени, кој доби расеченица на главата, а Костов прави вистински потег внесувајќи го во игра Исмаил Исмаили. Тоа е фудбалерот кој внесе живост на мечот и немир во одбраната на Пелистер. Врз него беше направен оној сомнителен пенал по кој домашните погодија за победа. Исмаили паѓа надвор од казнениот простор, а Кипријановски покажа слободен удар. Но нешто чудно се случи. Помошникот Хајдари го повика главниот арбитар сугерирајќи му да покаже на белата точка сметајќи дека прекршокот е внатре во 16-те метри. Тоа Кипријановски го стори, покажа пенал, а следеше реакција на гостите. Попуста затоа што судиската беше последна.
По паузата Пелистер стави с$ на една карта со цел да дојде до израмнувачки погодок. Најмногу во шанса беше Жуниор еднаш беше и соборен од Ковачевиќ во казнениот простор, но пенал немаше. Целата игра на Пелистер се одвиваше преку десната страна и Јованов, кој се "утепа" од центрирање, но попусто кога немаше реализација. Младиот Ивановски можеше да биде спасител на својот тим во Тетово, но од поволна позиција во последните моменти не го погоди голот од само 5-6 метри.
Ренова со сомнителен пенал стигна до трите бода. Моментот кога беше покажана настрога казна потсетува на оној против Цементарница. Исто Исмаили падна надвор од шеснаесетникот и беше покажано на белата точка. Ренова, пак, има проблеми со играта, но стигна до трите бода. Пелистер во добро издание се покажа во Тетово, но недоволно да стигне до трите бода. Повторно гостите "пукаат" по судиите исто како и на мечот со Победа минатата недела.
И. Цветаноски
СТАТИСТИКА:
РЕНОВА ПЕЛИСТЕР
4 корнери 6
8/6 удари/во 8/4
19 прекршоци 15
2 офсајди 1
4 ж. картони 2
1/1 пенали /
Минута по минута...
16' - Обид на Беќири од 20 метри, непрецизно, топката минува крај голот
21' - По изведениот корнер Беќири со глава ја смести топката во мрежа, но голот не важи поради фаул
26' - Центаршут од десната страна на Елмазовски, но Жуниор не беше на вистинското место и немаше шанса за гол
27' - Генц Исеини се повреди по воздушен дуел со голманот на гостите Пашовски по што беше префрлен во болница со лесна расеченица на главата
32' - Удар на Емини од 25 метри, Пашовски со крајни напори успеа да ја исфрли топката во корнер
38' - Беќири шутираше непрецизно кон голот на Пелистер со лизгачки старт од 5 метри
1:0 40' - Досуден е пенал за Ренова по фаулот врз Исмаили, а по интервенција на помошниот судија Хајдари иако главниот Стојановски се мислеше дали да покаже најстрога казна или да го извади фаулот надвор. Беќири стрела прецизно од белата точка
48' - Топката завршува покрај голот на Пелистер по ударот на Беќири од 20-тина метри
50' - Брза контра на Пелистер, Јованов од десно нафрла кон Жуниор, кој не се снајде најдобро пред голот на Ренова и не ја зафати топката
66' - Ударот на Беќири е изблокиран па така немаше промена на резултатот
77' - Главевски шутира силно од 15 метри, но Ковачевиќ е на место и брани
80' - Рутевски шутира од слободен удар, но неговиот удар заврши непрецизно
87' - Нововлезениот Ивановски ја утна најдобрата шанса за израмнување по ударот со глава откако Блажевски изведе корнер. Младиот Ивановски сам на 5 метри шутираше само покрај голот
Исени заврши во болница!!!
При еден дуел со Пашовски во 27. минута домашниот голгетер Генц Исени итно беше префрлен во болница. Напаѓачот доби расекотина на главата, но не е ништо сериозно. Ќе мирува само неколку дена, а потоа ќе се врати на зелените терени. Сепак, неговата повреда се покажа како клучен момент затоа што на негово место влезе Исмаили, кој беше најзаслужен за победата откако го изнуди оној пенал за 1:0.
Имаше ли пенал!?
Повторно проблем со пеналите кога игра Ренова. Овој пат Владимир Кипријановски. Покажа на белата точка иако прво досуди само фаул за домашните. Сепак, сугестијата од страна на помошникот Хајдари даде плод. А не покажа најстрога казна кога Ковачевиќ го "собра" Жуниор во казнениот простор.
ОД ТРЕНЕРСКИ АГОЛ:
ВЛАТКО КОСТОВ:
"Благодарност до публиката која н$ поддржуваше сите овие 90 минути. Моите играчи имаа огромна желба. Знаете кога треба да се победи секогаш е тешко. Ова беше уште еден товар врз играчите ако се знае дека настапивме без два стандардни играчи, Станковиќ и Стојанов. Фудбалерите собраа сили да ја издвојуваат оваа победа, најтешка откако сум на клупата на ренова. Ова беше еден фер и коректен меч, Ренова покажа дека знае да игра фудбал", изјави Костов.
НЕЏАТ ХУСЕИН:
"Во првото полувреме игравме претпазливо. Примивме гол од пенал кој мислам дека беше неправедно досуден. Второт полувреме играта беше во наши нозе, имавме повеќе шанси за постигнување гол. Во една позиција имаше недосуден пенал врз Жуниор. Мислам дека овој судија Кипријановски ја брка публиката од терените бидејќи вакво судење не е долично за македонскиот фудбал бидејќи Ренова е квалитетен тим и не му треба ова", рече гостинскиот кормилар.
НОВА СУДИСКА РЕЖИЈА ПРОТИВ БИТОЛЧАНИ
Мицевски: Ова е циркус!!!
"Да имаше нормално судење ние немаше да загубиме во Тетово", коментира Тони Мицевски, директорот на Пелистер, по вчерашниот пораз од Ренова.
"Смешен пенал за домашните. Главниот арбитар покажа слободен удар на 18 метри, а помошникот Хајдари ги вмеша прстите по што беше досуден смешен пенал за Ренова. Овие судиски одлуки против Пелистер немаат крај. Не сакаме повеќе да се нервираме. А пред средбата побаравме барем 60%-40% судење за домашните, но и тоа не го добивме. Заслуживме барем бод, а во вториот дел имаше чист пенал врз Жуниор кој не беше досуден. Сега веќе знаеме дека има заговор против Пелистер. Ако на сите тие на кои им сметаме им порачуваме дека во иднина Пелистер нема да им создава проблеми. Тие нека играат фудбал", додава Мицевски.
