Радикални структури го искривуваат традиционалниот ислам
ИВЗ: Ние предупредувавме, државата молчеше
Од ИВЗ велат дека одамна рекле оти постојат исламистички радикали
Кога пред две години предупредивме дека вахабитите контролираат четири џамии во главниот град и дека нивните структури добиваат сериозни димензии, државните институции молчеа. Сега состојбата ескалира и сите бараат одговор од Исламската верска заедница во државата. Мора да истакнеме дека ИВЗ прва бараше помош. Вака високи структури од оваа верска заедница неофицијално ја објаснуваат акцијата на Министерството за внатрешни работи, во која се приведени и осомничени можни сторители на убиството кај Железарско Езеро, за кои полицијата информира дека се припадници на радикални исламистички групи.
- Одамна рековме дека постојат исламистички радикални структури што ја искривуваат сликата на традиционалниот ислам, кој се практикува во Македонија. Повеќе немаме да кажеме - кратко одговорија вработени во ИВЗ.
Сулејман Реџепи, поглаварот на ИВЗ, пак, досега неколкупати изјави дека вербалната поддршка од институциите треба да се замени со акции за сузбивање на радикалниот ислам, како во Босна, Србија, Црна Гора и на Косово. Велеше дека вахабитите настојуваат да функционираат во поголемите градови, каде што основаат јадра. Информациите беа дека во почетокот се вклучиле во џамијата „Јаја-паша“, потоа во џамиите „Тутунсиз“ и „Хатунџук“, за на крајот да се случи инцидент во Исабеговата џамија, каде што, според ИВЗ, кулминираа антицивилизациските, античовечките, антиисламистичките и радикални дејства.
Според Реџепи, вахабитите се обидувале да се вклучат и во политичките партии на Албанците, но не се определиле за ниту една од нив, оставајќи како отворени некои можности во врска со ова.
Инаку, американскиот „Сандеј тајмс“ уште пред повеќе од две години објави статија во која се вели дека исламскиот фундаментализам е закана за дестабилизација на Балканот, особено на Македонија. Повикувајќи се на реисот на ИВЗ и на анонимен извор од македонската влада, како и на изјави од локално муслиманско население, „Сандеј тајмс“ пишува дека во државата сѐ поприсутни се радикалните исламски сили и дека вахабити роват низ Македонија.
