ФФМ го одложи ждребот за наредното првенство во Првата и во Втората лига, што требаше да се одржи утре, затоа што клубовите се уште немаат доставено доказ за трансформација во акционерски друштва. Од новата сезона, според новите законски прописи, сите прволигаши ќе мораат да се транформираат во АД, доколку сакаат да се натпреваруваат во елитата. Сепак, ова некако тешко им оди на клубовите, а оние кои што веќе ја завршија работата, всушност добија огромна помош од општините.
Во продолжение, во целост го објавуваме соопштението на оваа тема, што го лиферуваше ФФМ.
Согласно законските одредби за трансформација на клубовите во Акционерски друштва и одредбите од правилникот за лиценцирање на ФФМ во кој сите клубови за да се натпреваруваат во Прва МФЛ мора да бидат трансформирани во АД, Ве информираме дека одредени клубови сеуште немаат доставено доказ за трансформација во АД.
Со оглед на фактот дека законскиот рок за трансформација во АД е до 31.07.2012 година, Ве известуваме дека ждребањето се одложува до исполнување на законските одредби од страна на клубовите согласно законот за Спорт (нетрансформиран клуб во Акционерско друштво не може да се натпреварува во системот за натпреварување во Прва МФЛ).
По доставување на комплетна документација од страна на клубовите, датумот и местото за ждребот за натпреварувачката сезона 2012/2013 и Купот на РМ ќе бидат дополнително одредени.
