Кошаркарската репрезентација на Македонија летово ќе ја претставува нашата земја на Евробаскет 2013 во Словенија, а селекторот Алеш Пипан веќе ја извршил и првата селекција на кошаркари на чии услуги ќе смета на овој континентален собир. Имено, на списокот на Пипан се наоѓаат седум кошаркари на кои Словенецот смета како на сигурен избори и чие место во националниот тим нема да биде доведено во прашање: Ѓорѓи Чековски, Тодор Гечевски, Перо Антиќ, Дамјан Стојановски, Војдан Стојановски, Лестер Бо Мекејлеб и Владо Илиевски.
Интересно е што Пипан го сместува Гечевски меѓу сигурните патници на Евробаскет, иако искусниот центар се уште нема донесено конечна одлука дали ќе ја продолжи својата репрезентативна кариера, за која објави дека ја завршува по предолимпискиот турнир во Венецуела. На списокот на „недопирливи“ на Пипан до неодамна се наоѓал и Предраг Самарџиски, но центарот го загубил овој статус поради премалата минутажа што ја добиваше во текот на целата сезона, најпрвин во Литвос Ритас, а потоа и во Црвена звезда.
Така, Самарџиски би требало да го предводи списокот на репрезентативци што ќе настапат на Медитеранските Игри во Мерсин, а потоа и на турнир во далечната Кина, каде нашиот национален тим ќе го води Марјан Србиновски, кој му е прв асистент на Пипан во стручниот штаб на репрезентацијата. На списокот на Пипан за овие натпреварувања се наоѓаат уште и Александар Костоски, Огнен Стојановски, Димитар Караџовски, Дарко Соколов, Марко Симоновски, Горјан Марковски, Стојан Ѓуроски, Кире Николовски, Бојан Трајковски, Бојан Крстевски, Александар Штерјов, Владимир Брчков, Марјан Јанески, Јован Марковски и Марјан Младеновиќ.
На овој список се наоѓаат вкупно шеснаесет кошаркари, од кои дополнително ќе бидат избрани дванаесетте што ќе му бидат на располагање на Србиновски во Турција и во Кина, па од нив ќе се бараат преостанатите пет патници на Евробаскет 2013 во Словенија. Медитеранските Игри во Мерсин се закажани за периодот од 18 до 25 јуни, додека македонската експедиција ќе биде во Кина во периодот од 12 до 23 јули.
Избраните кошаркари од страна на Пипан и Србиновски потоа ќе се приклучат на подготовките со „недопирливите“, кои би требало да пристигнат во Скопје уште од 20 јули, за официјално да биде означен почетокот на подготовките за ЕП 2013. Јасно е дека Словенецот планира да им даде шанса на сите кошаркари што играат во добра форма во домашното првенство, како и на интернационалците Ѓуроски (настапува во американската НЦАА-лига) и Бојан Крстевски (Кавала), па интересно ќе биде кои од нив ќе ја искористат таа шанса и ќе се најдат меѓу оние што ќе го носат црвено-жолтиот дрес на Евробаскет 2013.
