Лазаров интересен за Монпеље
Загреб објави дека Монпеље, Шамбери, Веспрем и Целје се екипите кои официјално го бараат Лазаров. Хрватите ќе го пуштат за 200.000 евра оштета.
Трансфер листата на Загреб е подготвена, Кирил Лазаров е водечко име меѓу играчите кои ќе ја напуштат хрватската престолнина годинава. Желбите на Металург и на македонската јавност се одново да го видат најдобриот македонски играч на домашен терен. Но, желбите на Загреб и на водечкиот човек на хрватскиот ракомет, Зоран Гобац, се да заработи нешто на еден од двата најдобри играчи во неговиот клуб.
Со оглед на тоа дека Лазаров веќе ја минува 30 година и знае како треба да го одигра делот со трансферот, Загреб, односно Гобац не се во позиција да уценуваат како што тоа беше случај со Дувњак на кого му одредија оштета од милион евра. Цената која Загреб ја стави покрај името на македонскиот интернационалец е 200.000 евра. Сума која нема да ја добие од Металург, тоа е речиси сигурно.
Но, во математиките на Загреб, Металург и не котира високо кога е во прашање трансферот на Лазаров. "Касичката" во која треба да се фрлат паричките Загреб ја поддава на друго место.
"Го бараат Монпеље, Шамбери, Веспрем и Целје, еден од нив сигурно ќе има да плати 200.000 евра оштета", изјавил Гобац за хрватските медиуми.
Монпеље е еден од најголемите клубови во моментов. Есеноска ја "стресе" Европа со трансферот на Никола Карабатиќ и Вид Кавтичник од Кил. Сега на секоја позиција во тимот има светски познато име, освен на позицијата десен бек. Имаат одлични дефанзивци, така што Лазаров, кој игра главно напад, нема да биде голем минус и кога се игра одбрана.
Шамбери е во обид да стане порамноправен со Менопеље, иако нема многу успех на тоа поле. Но, Шамбери собра преку 1 милион оштета од Кил за Даниел Нарсис, па 1/5 од тоа не би било проблем за трансфер на класа напаѓач.
Целје под водство на Сердарушиќ веќе ги врати назад најдобрите домашни играчи, но им треба играч кој ќе дава по 10-тина гола без разлика со кого игра.
Веспрем е екипа која може сериозно да одигра во овој процес. Лазаров веќе има играно таму тие многу добро знаат кој е и што е. Нивниот десен бек, Марко Вујин, веројатно се сели за Рајн Некар Ловен, што нив ги носи во ситуација да мораат да бараат десен бек.
Од сите овие клубови, амбицијата да игра во завршницата на Лигата на шампиони Лазаров би ја имал единствено во Монпеље. Французите и сега се на чекор до фајнл фор, догодина сигурно ќе бидат и посилни, посебно ако им се исполни и желбата да го доведат Тјери Омејер. Другите екипи се на ниво кое го нуди и играњето во Загреб Кроација.
Сеедно се влезе во во поголем преговарачки процес, можно е и други екипи да се најдат во математиката да го ангажираат Лазаров. Вакви суми обично се подготвени да платат Германцие, иако трите водечки клуба таму се одлично покриени на десната бековска позиција, под претпоставка Рајн Некар да го ангажира Марко Вујин. Во Шпанија, Барселона и Сиудад Реал. Каталонците имаат два одлични десни бека, иако и Наѓ и Игропуло не се напаѓачи каков што е Лазаров. Сиудад Реал има потреба од левак, но што се "мота" низ главата на Душебаев, не се знае.
Лазаров веројатно утре вечер се враќа од Тунис, по што веројатно ќе почне да го решава својот статус за следната сезона. Прва дестинација, доколку прифати, веројатно ќе биде Катар каде од 8 до 22 мај ќе се подготвува и ќе игра за Ал Садд од Катар на Супер глоуб. Но, многу брзо ќе треба да се реши и поважниот статус, каде следната сезона. Ќе има уште шпекулации и слично на таа тема, Монпеље, Шамбери, Веспрем... ние не би го отпишале Металург во целата оваа приказна. Металург има нешто што овие клубови го немаат. А тоа е - враќање дома.