Малку голови, малку гледачи
Македонското фудбалско првенство се наоѓа при самото дно на рангирањето на лигите од Балканот кога е во прашање просекот на постигнати голови по натпревар. Со просек од 2,3 гола по меч, македонскиот прволигашки фудбал е послабо рангиран во однос на бугарскиот, хрватскиот и словенечкиот (имаат просек 2,6 гола по меч). Изненадувачки, на првото место се наоѓа првенството на Косово, кое се уште не е признато под закрилата на УЕФА, со просек од речиси три постигнати гола (2,9) по натпревар.
Можеби и скромната понуда на голови на мечевите од Првата македонска фудбалска лига е и една од причините поради која мал број гледачи ги посетуваат македонските стадиони.
- Фудбалот се игра за голови, а на нашите стадиони ги има се помалку и помалку. Кога квалитетот не е премногу добар, тогаш барем головите треба да бидат тие што ќе ме привлечат да одам на стадион - вели Горан Стојановски, фудбалски вљубеник од Скопје, еден од поредовните гледачи на македонските фудбалски стадиони.
На 165 натпревари од Првата фудбалска лига на Македонија, во изминатата сезона постигнати се 380 гола, или во просек 2,3. Речиси една десетина од натпреварите завршиле со најнепопуларниот фудбалски резултат 0-0, а речиси една четвртина од мечевите постигнат е само еден погодок и крајниот резултат гласел 1-0 или 0-1.
Атрактивните светски клубови со голови ја пленат публиката на своите стадиони.
Европскиот клупски шампион Барселона во изминатата сезона во Примера дивизион постигна фантастични 105 погодоци, што е неверојатен просек од 2,7 гола по натпревар. Германскиот првак Волфсбург ја освои титулата во Бундес-лигата со 80 постигнати голови, или во просек 2,3 на секој натпревар.
Во македонското првенство најмногу голови минатата сезона постигна Милано, вкупно 48, што во просек е 1,6 голови по натпревар, на вкупно 30-те одиграни мечеви. Втор по ефикасност е македонскиот шампион Македонија Ѓорче Петров со постигнати 46 гола (просек од 1,5 гол по меч), но и убедливо најдобра одбрана, со само 15 примени погодоци.
Зафрканција на страна публиката многу често ако е многубројна придонесува натпреварот да има посебен жар.Не ретко се случува добрата атмосфера создадена од навивачите и публиката да решава натпревари бидејки незе нема да и биди сеедно дали нејзиниот тим губи или победува.Фудбал без публика за мене е како друг спорт и со такви натпревари немаме и никогаш нема да имаме напредок.Поздрав Македонец!
