Победа со фузија ќе ја мами УЕФА?
Низ Прилеп веќе кружат шпекулации дека Победа, која во наредните осум години е суспендирана од УЕФА, ќе се фузионира со нисколигаш, ќе го смени името, ќе дојде нова управа, за екипата веднаш да има право на настап во еврокуповите
Победа ќе се фузира со нисколигаш, новиот клуб ќе добие ново име, екипата ќе може веднаш да игра еврокупови, суспензијата од УЕФА ќе биде избегната...
Ова е дел од планот со кој прилепскиот фудбалски прволигаш има намера да ја измами УЕФА, ако и Арбитражниот суд во Лозана не ја прифати жалбата на Победа, која доби осумгодишна суспензија од Нион, поради местенката на квалификацискиот дуел за пласман во ЛШ, против ерменскиот Пјуник во 2005 година.
Откако дисциплинската комисија на УЕФА ја казни Победа со осум години, а претседателот Александар Забрчанец и тренерот Николче Здравески со доживотна забрана за работа во фудбалот, прилепчани се жалеа до второстепената комисија, која ја потврди казната. Последна сламка за спас е Арбитражниот суд во Лозана, кој чини околу 120.000 швајцарски франци. Во случај и од таму да добијат негативна вест, ќе се активира планот Б...
Низ градот веќе на големо кружат шпекулации дека планот е Победа да се фузира со нисколигаш, да го смени името, во клубот да дојде сосема нова управа, сé со цел екипата веднаш да има право на настап во еврокуповите. Но никој не знае дали ова ќе биде правно издржано, дали ќе може УЕФА да ја проголта приказната, зашто новиот клуб ќе биде правен наследник токму на суспендираната Победа.
Па така, освен привилегиите, новата екипа треба да ги наследи и казните и суспензиите. Постои можност и Победа да биде згасната како клуб, тотално банкротирана, па како таква да се спои со нов клуб, кој би почнал одново од позициите кои ги имаат прилепчани. Но за ова амин требало да даде претседателот на Фудбалската федерација на Македонија Харалампие Хаџи-Ристески, кој, засега, воопшто не бил запознаен со овој план.
Луѓето што го осмислиле сето ова веќе им го соопштиле и на некои фудбалери со кои преговарала Победа, а на кои не им било јасно зошто да дојдат во прилепскиот клуб, кога тука нема никаква иднина, барем не во наредните осум години.
Не се знае како од Нион би реагирале во овој случај, зашто досега никогаш не се случило суспендиран клуб да згасне и да се фузира со нов, кој веднаш би имал право да настапува во натпреварувањата под закрила на УЕФА. Затоа и од градот под Маркови кули сé погласно се јавуваат поединци од новоформирани клубови што нудат фузија со прволигаш, па оттаму и информациите дека сето тоа се пушта како пробен балон, за да се види реакцијата и интересот за овој потег.
Оттаму чудат и амбициите на луѓето од неодамна формираниот клуб Пела. Тие уште саглам неформирани, изјавија дека сакаат да се натпреваруваат во Првата лига.
- Бараме заинтересиран прволигаш за фузија. Така би го стекнале местото во највисокиот ранг. Имаме канцеларии, два терена подготвени за реновирање со дренажа и со соблекувални. Преговараме со тренери и со играчи. Економската програма на клубот ќе биде насока за финансирање. Сакаме да ја вратиме публиката на трибините, за фудбалерите да играат пред полно гледалиште. Фудбал со сто гледачи не е фудбал. Мора да се направат брзи промени на подобро. Затоа веднаш ни треба Првата лига - се зборовите на Василе Соколоски, претседател на новиот клуб.
ne deka ke pobedime nie,ama da se istrcame malce
lee:
