Воените пилоти со години се жалат на бавните процедури за набавки на делови и за сервисирање на воздухопловите.Во минатото лето, во јули, малку пред серијата пожари, сите хеликоптери на АРМ беа приземјени зашто останаа без масло, поради пропусти во процедурите за јавни набавки.
Министерството за одбрана тврди дека хеликоптерот „Ми-8/17“, кој завчера се урна на шест наутички милји пред слетување на воениот дел на аеродромот кај Петровец, бил технички во најдобра состојба, во споредба со трите такви воздухоплови во составот на АРМ, од кои еден е приземјен поради дефект. Но, според формацијата на вооружените сили, во составот на Воздухопловната извидувачко-напаѓачка група (ВИНГ), реформираното Воено воздухопловство, треба да има вкупно седум такви летала: шест „Ми-8/17“ во Транспортниот сквадрон и еден модифициран хеликоптер во ВИП-сквадронот. Одбраната не одговори во каква состојба се другите летала и колку од нив се приземјени додека чекаат сервисирање или ремонт.
Министерство за одбрана до денес нема избрано центар за одржување на леталата, иако со години најавува стратегиски партнер, со што треба да се избегне по неколку месеци долгата процедура за набавка на делови, за одржување и ремонтирање на воздухопловите. До денес леталата се ремонтираат во ремонтните заводи во Украина.
НАТО неколкупати предупреди дека одбраната не ги троши парите од буџетот наменети за опремување и вежби. Според планот, до 2012 година се предвидени по околу 25 милиони евра за опрема годишно.
Срамота ... војската треба да биде третирана на највисоко ниво,и прво за таму да се обезбедат финансии па после за друго ...бруки,не сме ние држава ...
