Прв пат слушам за дечково,ама писмото му е ДОБРО!!!!!
Капитенот на македонската кошаркарка репрезентација,
Перо Антиќ, по неодамнешното финале од Евролигата меѓу другото изјави:
„Сите што зборуваа погрешно нека умрат“. Оваа изјава го иницираше моево писмо до претседателот на Македонската кошаркарска федерација (МКФ).
Здраво Даниел,
Што мислите, која е поважна функција на спортот, на репрезентативците:
1. Да шират позитивни вредности (многу деца се угледуваат на капитенот, тој ја гради културата кај младината, сакаат да бидат како него, капитенот е модел од кој учат што е правилно)?
2. Да се победи на Олимпијада?
Што мислите, што е поважно за Македонија? Што мислите, што би се случило кога во некоја западноевропска држава некој репрезентативец би дал ваква или слична изјава?
Јас последниве осум години играм професионално кошарка во Исланд, држава со култура градена под влијание на другите скандинавски држави и на САД. По првите четири години во Исланд бев награден со државјанство од страна на парламентот на Исланд.
Претседателе, еве што би се случило во Исланд кога капитенот на репрезентацијата би кажал јавно реченица од типот
„сите што размислуваат погрешно нека умрат”.
Многу родители и општествено одговорни спонзори на кошаркарската репрезентација би го контактирале претседателот на федерацијата и би побарале исклучување на капитенот од националниот тим во најбрз можен рок.
Претседателот секако би го сторил тоа, бидејќи функцијата на кошаркарските херои во општеството е да шират позитивни вредности. Тие се градители на културата во едно општество, илјадници млади деца се идентификуваат со своите спортски херои. Пред неколку месеци во еден неформален разговор актуелниот претседател на ФИБА-Европа,
Олафур Рафнсон, ми спомна дека Вие, претседателе на МКФ, многу често го користите и му давате важност на зборот идентификација, па верувам знаете што значи кога младината се идентификува со омилениот спортист.
Со отстранувањето од националниот тим ќе се испрати јасна порака до целата младина дека не е најважно да си победник, најважно е да си пред сè човек со позитивни вредности, кои се долготрајни, одржливи и се гаранција за здрава младина и за подобра иднина во сите области на општествениот живот. Спортот и репрезентацијата треба пред сè да промовираат толеранција, соработка, тимски дух, напорна работа и други позитивни вредности, кои се корисни и неопходни за прогрес во сите области на едно модерно општество. Тоа е и една од основните причини за постоење за репрезентацијата.
Ме интересира дали преферирате да отворите шампањско и да славите победа на Олимпијада или да покажете лидерство и да направите позитивна промена во општеството, да испратите јасен сигнал за тоа кои вредности водат до прогрес, а кои вредности сигурно не водат до прогрес. Колку што Ве познавам, вие сте толерантен, работлив, образован и верувам широк човек и ќе дозволите вашите деца и младината да се идентификуваат со Вас и со Вашите вредности, а нема да бидете себичен и да дозволите капитенот да биде референтен модел на нашата младина. Имате можност да покажете зрелост и општествена одговорност и да го оправдате лидерското место на кое воедно сте во последниве неколку години.
Во контекст на ова, актуелната министерка за култура на панелот за брендирање на Македонија како дел од маркетинг-конференцијата на „Капитал“ кажа дека е потребно интегрирано дејствување на различни сегменти од општеството, во кои спаѓаат и спортските лидери и ѕвезди во градењето на позитивни вредности во нашата култура.
Јован Здравевски
(кошаркар на исландски Стјарнан)
Магистер по маркетинг и меѓународен бизнис
http://www.mkd.mk/37065/kolumni/otvoreno-pismo-do-pretsedatelot-na-mkf-daniel-dimevski/
