Поставени два од четирите лавови на мостот „Гоце Делчев“
Поставени два од четирите лавови на мостот „Гоце Делчев“
Исправени и во стражарска положба. Двата лава рано утринава пристигнаа на мостот Гоце Делчев. Подготовките траеја долго - почнаа во 6 часот изутрина, направија хаос во сообраќајот, а во 14 часот лавовите од проектот „Скопје 2014“ стоеја гордо на јужната страна од мостот.
Според авторите, тие треба да ја симболизираат македонската историја, низ која отсекогаш се провлекувал лавот.
Мојата замисла беше да го претставам лавот во реалистична положба и стражарски. Исто така лавот е пропратен со релјефи“, рече Дарко Дуковски, автор на лавовите.
На релјефите ќе се најдат и личности од македонската историја на кои досега не им бил изграден спомени. Сирма војвода, Дедо Иљо Малешевски, Партение Зографски, Григор Прличев. Од општината Центар се задоволни - мостот Гоце Делчев доби чувари.
„Моментално се врши и крајна изработка на постаментите кои ќе бидат обложени со камен травертин, ќе има партерно уредување околу постаментите и ќе имаат облоги од релјеф од околу 40 квадрати“, вели Јовица Ацковски, портпарол на општина Центар.
Двата лавови чинат еден милион и сто педесет илјади евра. Колку од овие пари се слеале на сметката на авторот, никој не кажува.
„Не знам тоа, жена ми ги води тие работи“, додаде Дуковски.
„Во моментов не располагам со таа информација“, рече Ацковски.
И додека за власта, лавовите ја симболизираат историјата, за опозицијата се залудно трошење пари.
„Само со парите од овие два лава, можеше да им се реши проблемот на млекарите или да се реновираат две болници“, изјави Андреј Петров.
„Господинот Андреј Петров треба да се засрами што преку ниски и недолични прес конференции сака да го делигитимира ангажманот на владата предводена од ВМРО-ДПМНЕ“, вели Александар Бичиклиски
Новите споменици се високи 3.5 метри и се изработени во леарницата во Фиренца. Се очекува до крајот на неделава да бидат поставени уште два лава, на другата страна од мостот.
Досега, во рамките на проектот „Скопје 2014“ беа поставени спомениците на Гоце и Даме, Кирил и Методиј, Ченто, Климент и Наум и на гемиџиите.
За овие и за останатите споменици во центарот на градот што допрво треба да се постават, ќе се потрошат вкупно 17 милиони евра.
) нека дојдат вестите на А1 ќе ја видиш страната што ја очекуваш и реакциите од граѓаните што очекуваш да ги слушнеш...
