Во ФФМ место ќе добијат Најдоски, Милошевски, Васоски, Стојковски, Мицевски, Шаќири...
Новиот претседател на ФФМ, Илчо Ѓорѓиоски, полека ги влече првите потези од фотелјата и разговара за вклучување на познати и признати фудбалски имиња во телата на федерацијата. Дел од нив ќе бидат функциониери, другите ќе се грижат за репрезентативниот фудбал, за младинскиот фудбал во Македонија итн. Веќе се познати и имињата со кои е разговарано и кои набрзо треба да влезат во структурите на ФФМ, како Илија Најдоски, Петар Милошевски, Митко Стојковски, Тони Мицевски, Артим Шаќири, Александар Васоски. Претседателот Ѓорѓиоски јавно истакнува дека вратата е отворена за сите кои сакаат да работат и да дадат свој придонес за подобрување на состојбите во македонскиот фудбал. „Точно е, извршени се и се уште се водат разговори со познати фудбалски имиња, директно од фудбалската струка, за да се вклучат и да помогнат во работата на Фудбалската федерација на Македонија, буквално во сите структури. Потребна е помош од сите, секако, од оние кои сакаат да работат и да дадат свој придонес. Со голем дел е разговарано, ќе се разговара и со многу други, и се надевам дека со еден максимално сериозен и чесен пристап, пред се со многу работа, дека ќе успееме да направиме коренити промени, секако, на подобро, во Фудбалската федерација на Македонија“, вели за ЕКИПА, Илчо Ѓорѓиоски.
ЌЕ ИМА СОВЕТ НА ФУДБАЛСКИ ЛЕГЕНДИ ВО ФФМ Планирано е да се формира и Совет на фудбалски легенди во ФФМ, каде треба да бидат вклучени имиња од калибарот на Кирил Дојчиновски, Васил Рингов, и неколкумина други истакнати поранешни фудбалери со богата биографија. Тие исто така ќе даваат свои совети и ќе можат активно да се вклучат во промените што се планирани во федерацијата. „Планираме да оформиме Совет на фудбалски легенди, составен од поранешни истакнати фудбалери, чие искуство и совети секако ќе бидат од голема корист. И уште еднаш ќе повторам, вратата е отворена за сите, кои ќе сакаат да работат и да помогнат“, дополнува Ѓорѓиоски. Малку е спорно што засега никој не открива дека во некаква улога ќе биде вклучен и Дарко Панчев, најдобриот фудбалер на Македонија во 21.век.
ЌЕ СЕ РАЗГОВАРА СО СИТЕ СЕЛЕКТОРИ, ЌЕ ИМА КРИТЕРИУМИ ЗА ПОВИК ВО РЕПРЕЗЕНТАЦИЈА
Претседателот Илчо Ѓорѓиоски најавува и итни разговори со сите селектори, почнувајќи од предводникот на А-репрезентацијата, Џон Тошак, селекторот на младата селекција, Бобан Бабунски, како и сите останати кои ги предводат младите репрезентативни категории. Ќе се воведат критериуми за избор на репрезентативци, како и кодекс на однесување додека се носи националниот дрес. „Ќе имам разговори со селекторите, со Џон Тошак, со Бобан Бабунски, и со сите останати кои ги предводат националните селекции. За задржување на нивните позиции, секако, најмеродавни ќе бидат остварените резултати. Јас доаѓам токму од тренерската фела и добро знам дека резултатите го држат секој тренер. Сигурно ќе се бидат воведени одредени критериуми за избор на репрезентативците, како и кодекс на однесување во националниот тим, како за фудбалерите, така и за сите кои ќе бидат дел од селекцијата, стручен штаб, лекарски тим, оперативен дел кој ќе треба да ги опслужува“, најавува за ЕКИПА, Илчо Ѓорѓиоски.
ЌЕ ИМАМЕ И ПОРТПАРОЛСКИ ТАНДЕМ ВО ФФМ
Златко Андоновски, поранешниот ТВ коментатор на Канал 5, е вклучен во работата во ФФМ и тој отсега ќе има идентични овластувања како и досегашниот портпарол Зоран Николовски, ТВ коментатор на телевизија Сител. Се очекува да работат во тандем во иднина, а во „медиумскиот штаб“ досега имаше и уште неколкумина, кои реално, според квалитетот и рејтингот, не заслужуваа(т) да бидат дел од ФФМ. Како ќе биде понатаму, останува да покаже времето. Златко Андоновски се очекува да „дебитира“ како портпарол на прес - конференцијата со селекторот Џон Тошак која е закажана за в недела во 11 часот, во хотелот „Холидеј Ин“ во Скопје, во пресрет на пријателскиот натпревар меѓу Македонија и Литванија, што ќе се одигра на 15 август на арената „Филип Втори“.
http://www.ekipa.mk/News.aspx?newsId=10451
Сите Вмровци, само Панчев у опозиција
