Не е проблем донацијата за гладните во Африка, хумана работа е тоа, но решава даден проблем на краток рок. Исто како да се обидувате да залепите дупка на брод кој што тоне со селотејп. Државите во Африка имаат проблеми со управувањето, не дека се сиромашни. Исто како и ние. Ние не сме сиромашна држава, имаме релативно добра местоположба со добра клима и природни ресурси, проблем ни е менаџирањето со истите, т.е ние сме тука каде што сме од крадење и неправилна распределба на богатството, условно кажано.
Делумно, Западната цивилизација е она што е моментално благодарение на колонијалното минато. Голем дел поранешни афрички и азиски колонии, денес "независни" држави, не можат да се опорават од таквото минато, кога нивните природни и човечки ресурси биле наголемо експлоатирани од страна на европските колонизатори. Па и денес се случува истото, само во друга форма, неоколонијализам, експлоатацијата продолжува преку големите транснационални корпорации, сопственост баш на овие милијардери, кои што великодушно донираат за реизградба на Нотр Дам во Франција.
Ништо спорно во донирањето за реизградба, само целата фама околу тоа донирањето е слична со она кај нас, кога преку СМС пораки донираме средства за лечење на болни. Во ред е тоа, хумано е, меѓутоа е проблем на државата, сите ние плаќаме здравствено осигурување, постои фонд и институции кои што ги гласаме одговорни да менаџираат со сите средства. Работа на организиран систем со функционални институции е да се грижи за благосостојбата и искоренувањето на сиромаштијата, но нити ние, ниту сиромашните земји во Африка го имаат тоа. Тоа треба да биде и целта, да им се помогне на овие држави самите да менаџираат со своите ресурси, да не зависат од милостината на некој дебел Амер или Енглез, чиј прадедо палел и убивал во минатото за сега нивните внуци да какаат по интернет и ронат крокодилски солзи за гладните по Светот. Мислам дека развиениот свет има проблем со перцепирањето на реалноста, прво во сопствениот двор а далеку е од разбирање и решавање на светските проблеми во ера на ексесивен конзумеризам и напуштање на конформизмот.