Заедно Архангел и Фолтин – подобро звучат
Скопски саем беше претесен за да ги собере сите собрани љубители на добрата музика, на саботниот долгоочекуван концерт на Арханѓел. Култниот состав три часа ја забавуваше публиката со своите познати хитови, а како предгрупа за загревање, настапи битолската група Фолтин.
Концертот беше промовиран под мотото „на македонски подобро звучи“, од причина што во истиот ден паралелно со овој, се одржуваа повеќе концертни настапи на српски изведувачи. Тоа никако не претставуваше пречка за неколкуилјадната публика да го одбере ова случување на својата агенда за забава, поради тоа што Архангел настапуваат на голема сцена за прв пат по седум години, ако го изоставиме гостувањето на скопско Кале.
Со академско доцнење од половина час, додека да се наполни салата пред која стоеа долги редици со посетители од цела Македонија, концертот го отворија Фолтин. Еден час публиката ги пееше песните кои беа одбрани како компилација од последните албуми, а кулминација предизвика најголемиот хит Везилка, кој на каналот јутуб има посетеност од околу двеста илјади слушатели. Со таа нумера заврши загревањето на големата сцена со едноставна позадина, светла во доминантно сина боја и ефекти, по едночасовниот настап на момците од Фолтин.
Громогласен аплауз ги дочека Архангел, главните актери кои на сцената останаа три часа на задоволство на присутните. И покрај тоа што настапите на овој реномиран состав не се случуваат често, сепак на овој концерт Архангел и` надомести на публиката за трпеливото чекање. Концертот започна со брзи песни, за потоа да премине на поспори и да заврши со Убермакедонише и Милион долари на бис. Фронтменот на групата Ристо Вртев, ефектно го предизвика вниманието на публиката кога на самиот крај ја испеа најновата песна со наслов „Пинокио“, читајќи го текстот од лист хартија.
По четири часа луда забава што ја приреди комбинацијата Фолтин и Архангел, задоволната публика ја напушти салата. Концертот го организираше План Бе продукција, а следната недела се закажани уште два, на Влатко Илиевски и Скрим мјузик фестивал.
Мирослава Симоновска
