Среќен сум што серијава заврши во разумно време иако до сега, апсолутно во ниту еден единствен момент, не падна динамичноста и развојот на дејството. Тоа ја прави посебна, тоа допринесува апетитот на публиката да се крене за неколку скалила повисоко. Друго што е добро е тоа што секогаш кога имавме изненадување во серијата, наредните епизоди носеа поголемо изненадување. Ни влегоа во психата како публика и ја разбраа нашата потреба. Секогаш ќе очекуваме подобро. Секогаш ќе мислиме дека до совршенството има уште малку. Не мамеа, не влечеа понапред и понапред. Никогаш не не разочараа. Со ова најверојатно ќе има проблем Game of Thrones, иако моментално серијата е совршена. Публиката ќе очекува повеќе, а шаблонот кој го нудат тие не го дозволува тоа...
Друго нешто што ја прави серијата посебно добра е развојот на ликовите. На страна Волт Џ. сите други ликови доживеаа трансформација и барем во еден момент во овие 5 сезони се пронајдовме некаде во нив. Тоа е она што ми се допаѓаше кај Six feet under, тоа ми се допаѓа и тука.
Сега малку за Волт. Во ниту еден момент до сега не почувствувам толкава тага за Волт. Иако одамна знаевме дека целото негово лудило нема никаква врска со семејството, моментот кога и кажа на Скајлер дека сето тоа го направил за себе и се чувствувал добро.. ме скрши. Волт е невидено трагичен лик. Целиот живот се посветува на семејството, професијата.. живее чесно и по сите правила. Со други зборови, живее за сите, но никако за себе. Нема време за себе, нема ниту желба. Влезен е во машинеријата низ која сите минуваме и ја прифаќа како единствена опција за опстанок во општеството. И во моментот кога дознава дека животот му е краток и мислејќи на големото ништо што го остава зад себе, решава да живее. Но повторно, за да не побегне целосно од машинеријата, го става доброто на своето семејство како џокер карта во одбрана на себеси за се што ќе направи во иднина. И секако, новиот живот му се допаѓа бидејќи конечно е свој и го прави она што го сака. Без разлика колку беше тоа ризично, Волт вели дека е задоволен. И јас би бил задоволен
И на крајот, каков беше редоледот на смртта? Не можам тоа да си го разјаснам... Кога умре Волт, а кога Хајзенберг? Последните сцени ме потсетија на Волт, но целиот генијален план за убивање на нацистите е дело на Хајзенберг. Кога го бутна на земја Џеси, повторно беше Волт. Ако Волт умре на крајот, кога умре Хајзенберг? Не верувам дека двајцата умреа во исто време... Или Волт умре порано? Хмм... Ако последново е точно, тогаш имаме целосна трансформација на еден лик. Некој ќе го толкува како себеуништување, но јас мислам дека е себепронаоѓање. И не сакам да му судам.
