ИНТЕРВЈУ - ТОДОР ГЕЧЕВСKИ
Пред неколку месеци се повлековте од репрезентацијата. Има ли шанса сепак да се вратите и да играте на ЕП 2013?
- Мислам дека доволно играв во репрезентацијата. Имам добри наследници, кои би можеле да ја презентираат Македонија во Европа без проблем. Немам веќе ни време ни сили цело лето да поминам со репрезентацијата. Постојано контактирам со луѓето од МKФ. Повлекувањето е моја дефинитивна одлука и тие ја прифатија. Kога имаш 35 години, реално е да се откажеш. Не знам ни колку веќе би можел да помогнам на оваа возраст.
Можеби друга улога во националниот тим?
- Луѓето од репрезентацијата се добри. Директор е Врбица Стефанов, долгогодишен играч, кој совесно си ја врши работата. Генералниот секретар Лекиќ, претседателот Димевски, Илија Мерџановски, како директор на сите репрезентации, сите се ОK. Организацијата е на солидно ниво. Ќе има добри услови за подготовки.
Останува проблемот со немање селектор. Што мислите за идејата Марин Докузовски да се врати?
- Изборот на селекторот е проблем. Треба да се знае селекторот во најскоро време. Сојузот засилено работи на тоа. Не сум сигурен дека постои можност да се врати Докузовски, но сметам дека тоа е добра идеја. Но, треба да се согласи Докузовски. Генерално говорејќи, не е битно дали селекторот е странец или Македонец. Битно е изборот да е квалитетен. Имаме квалитетни домашни стручњаци, има и странски квалитет. Во рамките на можностите на федерацијата треба да се бара. Сите ние би сакале да биде селектор некој како Обрадовиќ, Ивковиќ, но тоа е нереално ако се земат предвид можностите.
Што мислите за групата во која сме на ЕП 2013 со Црна Гора, БиХ, Србија, Литванија, Летонија?
- Имаме многу тешка и изедначена група, но верувам во моите колеги и мислам дека би требало да ја минат и да се пласираат во следната фаза. Имаат квалитет, желба и мотивација. Тоа се добри момци, квалитетни играчи и реално е да се помине групата. Нема екипа што е аутсајдер во таа група, но нема ни изразит фаворит. Може од секој да се изгуби и секој да се победи. Најбитни ќе бидат пристапот на натпреварите и моментната форма.
И вашите првични амбиции на ЕП 2011 беа да се помине групата на стартот.
- Во Литванија нашите амбиции беа да се помине првата група и некои желби да се помине и втората група. Не очекувавме да бидеме четврти, но кога дојде да играме за медал, на крајот на сите ни беше толку жал што не го освоивме, затоа што бевме на еден шут од него. Реално и за овој тим е да се очекува да се помине првата група, па потоа што ќе се случува... Во едно сум сигурен. Тие ќе дадат с` од себе.
Kој е најбитен чинител за да се постигне висок резултат на едно ЕП?
- Тимскиот дух сигурно е најбитен. Битни се формата, кондициската, тактичката подготовка. Обично репрезентациите немаат доволно време да се подготвуваат, па на првенствата имаат проблеми со тактиката. Ние во Литванија бевме многу подготвени, имавме супер атмосфера. Мислам дека добро е што сега постои континуитет на настапи на ЕП. Се надевам дека ќе продолжи така. Kога сте присутни во низа можностите за успех се зголемуваат.
Може ли репрезентацијата на ЕП 2013 да го повтори успехот од Литванија?
- Овој тим може да го повтори успехот од Литванија. Меѓутоа не би требало да ставаме притисок ни на новиот селектор, ни на федерацијата ни на играчите дека тоа мора да се повтори. Тогаш се наместија сите коцки и дојдовме до 4. место. Не дека немаме квалитет, но денеска сите играат кошарка, има многу репрезентации и секој се надева на голем успех. Амбициите треба да бидат меч по меч. Нашите амбиции треба да бидат да ја поминеме групата.
,осечам пак ќе го јадат.
