Песни од бугарски, српски и од грчки изведувачи
На третиот голем концерт наречен „Балкански круг“ дванаесеттемина финалисти ќе се претстават со песни од бугарски, српски и од грчки изведувачи.
Вечерта наречена „Балкански круг“ ќе ја отвори членката на жирито, Марија, со својата песна „Не те обичам“. Симона ќе го изведе евровизискиот хит на Елена Папаризу „Нумбер оне“, Магдалена „Новата ти“ од својата сонародничка Преслава, Александра и Ели ќе пеат песни од Анелија, Александра ќе ја изведе „Погледни ме во очите“, а Ели „Всичко води кон тебе“. Преслава ќе се претстави со „Нешто нетипично“ од Ивана, а од истата пејачка ќе испее песна и Соња, тоа е песната „Шампањско и солзи“.
Русина ќе ја пее „Кукавица“ од Цеца, Вики „Ти си мој грех“ од Лепа Брена, а Димитар „Лане моје“ од Жељко Јоксимовиќ. Нашите двајца претставници ќе изведат песни од српски изведувачи, Александар ќе ја пее „Месечина“ од Горан Бреговиќ, а Бојан „Плава циганко“ од Миле Китиќ.
----------------------------------------------------------------------
ДАРКО НЕ Е РАЗОЧАРАН ПО ИЗЛЕГУВАЊЕТО
Напуштањето на „Идол“е реклама за мене Тамара Коларовска
Дарко Илиевски го напушти „Идол“ по само еден и пол месец, можеби кратко време да ги покаже своите пејачки квалитети, но беше присутен доволно долго за да ги освои колегите и публиката, кои веќе почна да собира гласови за негово враќање.
- Не сум разочаран што толку брзо излегов од шоуто бидејќи тоа може да биде поголема реклама за мене – изјави Дарко.
Негови фаворити се Бојан и Александар, и тој се надева дека ќе ги види двајцата во финалето, а едниот на врвот. Со Александар, покрај тоа што делеле заедничка соба, откриле дека имаат многу слични карактери, одлично се сложувале и си давале поддршка и во добро и во лошо.
„Македонскиот Казанова“ или „Мистер плејбој“, како што го нарекуваа во Бугарија, не открива дали имал девојка или симпатија во Бугарија.
- Сакам да останам мистериозен и да оставам моите обожавателки сами да ја откријат таа тајна – вели тој.
По излегувањето на Дарко се крена многу прав, па фановите покренаа петиција за собирање гласови за негово враќање во шоуто, за што Дарко вели дека ништо не се знае со сигурност.
- Третата сезона на „Идол“ е сезона на изненадувања, се е можно – вели тој.
Според многумина, Дарко погрешил во изборот на песната со која се претстави на вториот голем концерт. Иако песните што ги пеат на елиминациската вечер се избор на самите изведувачи, се зборува дека некој влијаел врз изборот на Дарко.
- Во принцип, не го слушам Мајкл Џексон, но „Ѕоу аре нот алоне“ некако ми допре до срцето и мислев дека тоа е песната што во тој момент сакав да ја пеам – истакна шармерот од Македонија, додавајќи дека сака да слуша поп-рок, аренби, класичен рок, а обожава и пеење без музика – акапела.
Тој тврди дека нема некој посебно омилен пејач, повеќе го интересира како се изведени песните и нивниот аранжман. Меѓу другото, Дарко најави и дека наскоро повторно ќе се врати на сцената со нова песна, за која засега не дава никакви детали.
- Се уште не го откривам стилот на музиката што ќе ја пеам, ќе слушнете наскоро, кога ќе излезе мојата песна. Ќе биде нешто ново, какво што до сега не сум слушнал ниту јас, но нешто што веднаш ме освои – рече тој.
Како секој млад човек, Дарко слободното време го поминува со своите пријатели и со најблиските, слаба точка му е неговата внука, а многу време поминува и пред компјутер. Има настапувано во неколку дискотеки низ Македонија, но не професионално. Во Скопје нема некое особено место на излегување, ја почитува дневната шема на пиење кафе со весели луѓе и пријатели, а навечер е редовен посетител на караоке-забавите што ги приредува неговиот пријател Ненад, како и на местата каде што настапува неговиот омилен диџеј Панчо.
На прашањето што мисли за регуларноста во „Идол“ и за тоа што не се покажуваа резултатите од гласањето, Дарко вели:
- Немам време да мислам на тоа, мислам дека на проектот работат професионалци и дека нема неправилности. Сепак, ете добра тема за вас новинарите!
Тој открива дека многу ќе му недостигаат луѓето со кои поминувал 24 часа дневно во Бугарија, но и дека одвај чека да се врати во Македонија и да почне да работи на својата кариера на македонската музичка сцена.
