Вардар означи нов почеток!
* Од вчера нов претседател на Собранието на ФК Вардар е Ванчо Шехтански, а формиран е и комплетно нов Управен одбор на клубот
На само неколку денови пред стартот на пролетниот дел од сезоната најтрофејниот македонски клуб, сепак, низ драматичен пресврт на ситуацијата означи нов почеток за себе во обидот да ги залечи повеќемесечните финансиски и организациски проблеми.
Од вчера, преку одржаното Собрание на раководните структури на клубот, двата досегашни колективни члена, Иницијативниот одбор за спас и "Мода и спорт" на Орце Камчев, ФК Вардар доживеа комплетна реконструкција во делот на раководните органи, но и во спортскиот менаџмент. Собранието генерално означи во суштина почеток на идна соработка меѓу актуелниот шампион Македонија ЃП и досегашните раководители на "црвено-црните".
Како што н$ информираа од ФК Вардар, Собранието на клубот во иднина место досегашните 29 делегатски места ќе брои 10 делегати од кои пет на "Мода и спорт" и пет на компанијата "ЈН Менаџмент спорт", а без досегашниот колективен член - Иницијативниот одбор за спас или "Комитите", кои, како што најавија, се повлекуваат од раководните органи. Од вчера нов претседател на Собранието на клубот е досегашниот претседател на Надзорниот одбор, Ванчо Шехтански а формиран е и комплетно нов Управен одбор на клубот со неколку досегашни истакнати домашни фудбалски работници.
Како што објавивме и претходно, по неколкудневните преговори меѓу раководните органи на Вардар и Македонија ЃП на крајот вчера беше официјално заокружена идната меѓусебна соработка од најниско па до највисокото раководно ниво во клубот, во делот на финансиите, меѓутоа и во делот на спортското функционирање.
"Го реализиравме обидот ФК Вардар повторно да се стабилизира во финансиско-организациските структури. Тоа е најважно во моментов како предуслов за враќање на клубот на старите патеки и во спортскиот дел", ни изјави вчера Орце Камчев.
Наредниве денови, според најавите од редовите на "вардарци", се очекува докомплетирање на деталите и околу заокружувањето на комплетната финансиска конструкција во клубот. Новите колективни членови во голема мера ја преземаат одговорноста за финансиското живеење на "црвено-црните", при што се очекува спонзорско вклучување во ФК Вардар и на поранешниот долгогодишен финансиер на Македонија ЃП, Благоја Николовски.
В.Булатовиќ
Илчо Ѓоргиевски од денеска со првиот тим на "црвено-црните"
Како што објавивме и претходно, тренерот на Македонија ЃП, Илчо Ѓоргиоски, во иднина треба да го преземе стручниот штаб на најтрофејниот наш клуб. Денеска се очекува Ѓоргиоски да ја реализира првата средба со вардаровиот играчки кадар во кој ќе бидат актуелните "црвено-црни" фудбалери, но и осум играчи, како што беше најавено, од редовите на Македонија ЃП. Од тимот на "лавовите" на Вардар треба да му се приклучат Настевски, Ѓурѓевиќ, Силјановски, Симовски, Јакимовски, Милевски меѓутоа и искусните Милан Илиевски и Васко Митрев кои според последните информации најверојатно нема да реализираат за себе интернационален трансфер.
Како што н$ информираа вчера од ФК Вардар, досегашниот тренер Ѓорѓи Тодоровски ќе биде координатор во младинските школи на клубот, од каде претходно и го презеде кормилото на првиот тим.
Велија Рамковски во спонзорскиот тим
Според нашите информации, наредниве денови се очекува официјално како еден од новите финансиери на нашиот најтрофеен клуб преку своите компании "Хедис" и "А1 ТВ" да биде вклучен и домашниот бизнисмен Велија Рамковски.
Низ преговори на новите раководни структури на Вардар се очекува договор со Рамковски кој би бил дел од идниот спонзорски тим. Договорено е и натпреварите на ФК Вардар низ пролетниот дел од сезоната да бидат пренесувани на А1 телевизија.
Сетинов - спортски директор
Досегашниот претседател на клубот, Драги Сетинов, останува и натаму во спортските структури на "црвено-црните" сега како спортски директор. Во спортскиот менаџмент останува и натаму како скаут на клубот и поранешниот вардаров фудбалер Ерол Демир кој заедно со Сетинов ја преземаат одговорноста околу функционирањето на тимот.
"На Вардар му беше неопходна организациска реконструкција во обидот да се стабилизира и спортскиот дел. Верувам дека Вардар, сепак, низ зимскиот преоден рок создаде квалитетен тим од своите досегашни фудбалери, новите засилувања и заедно и со тие неколку фудбалери од Македонија ЃП, кои ќе ни овозможат успешни пролетни резултати", вели Ерол Демир.
да не зборам пред време но ќе видиме како ќе функционира сега вардар
