Драга,
Како ќе ги познаеш бруцошите во воз? - Интересно им е да се возикаат 3 и нешто саати.
Од пред некое време, кога веќе немам за читкање за да се занимавам за тоа време или не најдам жртва за муабет, си увртувам филмови за оние фаци што ги гледам. Има се и свашта, буквално се и свашта, ако погодиш добар ден само.
Интересни ми се мене циганиве. Со обавезно некое бебе во раце, кога ќе го видат кондуктерот, некако успеваат да се преместат во нареден вагон. После пак се враќаат. Велешаниве се посебна прича. 80% голтнале микрофон, а другите 20% спијат. Седат по 10 души вака што се познаваат, од кои обавезно еден е задолжен за забавата и шегите. Обавезно некоја кич облечена тетка, да речеме со драч розе јакна и бели чизми. Го пцуе мажот на телефон зашо не го зел детето навреме од градинка.
Има и первезњаци, повозрасни и помлади. Има и луѓе на возраст што можат татко да ти бидат, а сепак ќе се дрзнат и број да ти побараат. Тук-таму и по некоја шмизла и некој метросексуалец, но ова се загрозен вид, тие се возат повеќе со автобус. Летово имаше и залутани странски души од врска ти неам каде, кои ќе те прашуваат за Хераклеа. Епа, wrong train, dude.
Тука се и тие стигнати скоро за во пензија жени, ај да не речам баби. Дај боже да ти се погоди арогантна спроти тебе, отколку досадна со совети. Арогантната збор нема да ти каже, а од оваа со совети, секако и лекции за секс добиваш. Има и онакви жени, од типот на тра-ла-ла муабет, кои и без да ги прашаш, ќе ти ја кажат маката. Еднаш една ми расправаше за тоа како свекрва и се самоубила. Не јадев цел ден после тоа.
Има и такви кои имаат мила ѕвезда некако, ретки се, преретки. Од самиот изглед се гледа. Тажно е што кај нив се приметува на лице дека воопшто не поминале лесно во мизеријава. Тие си седат мирно саат, два, без да прават непотребна галама, да замараат некого, скромни се и културни. На крај некогаш и пријатно ќе ти кажат, иако не сте скршнале збор. Сакам вакви луѓе. Бар си вртам филм дека е така ко што си увртувам, ипак поарна занимација некогаш за три саати, немам.
