СМРДЕА НА КОЊСКИ ИЗМЕТ И ДЕТСКИ ЏАГОР ПОД ЖЕЛЕЗНИЧКА СТАНИЦА
Шаторска черга во строгиот Центар
Запрежни коли и коњи, распослани шатори и импровизирани картонски колиби, огромни вреќи полни со пластични шишиња, хартија, стари предмети. Ова е првата слика на македонската метропола која секој случаен или намерен патник ја гледа при симнувањето од железничките перони
Запрежни коли и коњи, распослани шатори и импровизирани картонски колиби, огромни вреќи полни со пластични шишиња, хартија, стари предмети. Среде смрдеата на коњски измет и урина, детски џагор. Иако сето тоа можеби и не оди заедно, сепак, ова е првата слика на македонската метропола која секој случаен или намерен патник ја гледа при симнувањето од железничките перони. Под столбовите на Железничката станица, на работ на сиромаштијата уште од пролетоска живеат неколку семејства. Под ведро небо, со татнежот на локомотивите. Велат, животот не им е лесен, но го живеат чесно.
- Што сте дошле да не сликате? Сакате да не избркате?А што ви сметаме, ние никому лошо не правиме, по цел ден од контејнер до контејнер собирам шишиња, весници, картони. За парче леб, да ги прехранам овие гладни усти. Еве уште малку ќе бидеме овде, додека не залади, па за зимава којзнае. Чергата патува - низ заби ни прозборе Јонуз, додека ги балираше пластичните шишиња. Неговите пет деца не одат на училиште, но му помагаат во работата. Слична судбина со семејството на Јонуз делат уште десетици семејства кои се населени во строгиот центар на градот. Во дворот на Домот на АРМ, на Плоштадот, на Кејот, во печатницата Гоце Делчев...
- Ова е реалноста, грдата, сиромашна слика на Скопје. Со вакви навики никогаш нема да живееме во метропола. Срамота е за сите нас - рече еден минувач. Надлежните институции се согласни дека овој проблем мора да се реши, но, досега не понудија вистинско и трајно решение. Се надеваат дека тоа ќе се надмине со предвидените пакет социјални мерки, но и со новиот Закон за комунален ред бидејќи според актуелната законска регулатива никој нема одврзани раце да воведе ред, ниту да казнува, а надлежностите се поделени меѓу локалната власт, полицијата, инспекторатот за животна средина, Центарот за социјални работи, Комуналец. Нацрт- законот предвидува ригорозни санкции и глоба на лице место во висина од 50 до 4.000 евра во зависност од прекршокот.