СТОЈМИР СИМЈАНОСКИ - ТРАГАЧ ПО ЗАГАТКИТЕ НА НАУКАТА
Апокалипса или духовно будење во 2012 година?
Хитот на режисерот Роналд Емерих, „2012“, во кој со многу филмски ефекти се опишани случувањата во текот на глобална катаклизма по која доаѓа крајот на светот каков што го познаваме, повторно ги актуализираше теориите за судниот ден, кој ќе дојде во 2012 година. Но, додека визијата на Емерих предвидува дека нашата планета ќе доживее „смртоносно“ загревање на јадрото под дејство на силни Сончеви бури, во старите библиски текстови стои дека тоа би се случило со потоп, со изместување на Земјината оска или, според Атлантиѓаните и Лемурјаните, големата ѕвезда Баал ќе ја уништи Земјата. - Всушност, најголем број од модерните хипотези за уништување на Земјата се темелат на астрономски причинители - вели Стојмир Симјаноски, трагач по загатките на науката.
Досега имало 520 различни предвидувања за Крајот на светот, но сега, можеби, најактуелна е идејата дека судниот ден - апокалипсата, ќе дојде во 2012 година. - Причина за тоа е совпаѓање на пророштва од два различни народа (календарот на Маите и предвидувањата на Сумерите), а заговорниците на судниот ден толкувањето за тоа често го поврзуваат со најстарата позната цивилизација на оваа планета - цивилизацијата на Сумерите. Така, датумот 23.12. 2012 година е земен од светиот календар на Маите познат како „Цолкин“, а тоа се потврдува со катренот од Нострадамус: „Дваесет плус двапати по шест, ќе ги видат и среќни ќе го дочекаат знаењето од небото“. Овде толкувањето е едноставно, па така 20 и 2 х 6 = 2012, а стихот „знаењето од небото“ се толкува како планета. Маите во своите кодекси, од кои се останати само околу 200 листови, пишувале дека овој период е периодот на Петтото сонце, кое предизвика уништување со големи потреси на Земјата - вели Симјаноски.
Тој додава и дека уште е поинтересно да се види „Епот за постанокот“ од Сумерите во кој пишува дека луѓето на Земјата ги создале Анунаките - жители на дванаесеттата планета Нибиру, која на секои 3.600 години по многу издолжена елиса орбитира околу Сонцето. Сумерите оставиле записи и слики од кои се гледа дека неколку илјади години пред новата ера знаеле за девет планети од нашиот Сончев систем, а современиот свет го откри Плутон дури во 1930 година. Постојат податоци дека Нибиру ја уништила петтата планета во Сончевиот систем - Тијамат од која настанале Земјата и Месечината. Оваа теорија е научно прифатлива бидејќи, според законот на Јохан Елерт Боде, навистина недостига една планета во Сончевиот систем и на нејзиното место сега постои астероиден појас. - Наеднаш сето тоа било поврзано и со хипотезата за крајот на светот за во 2012 година, кога, поради навлегување на Нибиру во Сончевиот систем и големите потреси и разорувања што ќе настанат под дејство на гравитациските ефекти, Земјата ќе биде уништена - наведува тој.
Според него, денес постојат голем број научници што тврдат дека Нибиру од оваа година веќе ќе биде видлива и дека НАСА ја крие тајната за наближувањето на планетата што ќе предизвика уништување на Земјата.
Со актуелноста на катаклизмичните филмови и документарни емисии, како и необичното совпаѓање на најавите од древните цивилизации за судниот ден, 2012 година станува се поинтересна како година на апокалипсата. Сепак, Симјаноски наведува и дека во кодексите на Маите и во календарот „Цолкин“ никаде не пишува што ќе се биде кога ќе заврши циклусот од 5.125 години, кој почнал на 13.8. 3113 година пр.н.е. и кој се предвидува дека ќе заврши на 23 декември 2012 г. Постојат и други толкувања за тоа што ќе се случи на овој датум. Така, најдобриот познавач на календарот на Маите, доктор Карл Јохан Колеман од Светската здравствена организација во својата книга „Календарот на Маите“ пишува: „Календарот на Маите претставува некој вид упатство за еволуција на човечката свест и дава увид во новата наука за времето. Календарот е поврзан со 13 циклуси на создавањето и 13 неба, поврзани со девет подземни света. Сите тие циклуси ќе завршат на 23 декември 2012 година. Според некои толкувања на ‘Цолкинот‘, Големиот циклус треба да се сфати како духовно будење на човештвото, кога тоа ќе почне да живее во вистинска слобода, радост и мир“.
Стојмировски истакнува и дека овие теории не се темелат на цврсти научни факти.
- Ние многу малку знаеме за Маите, а тоа што го знаеме е толку фантастично што не може да се прифати како научен факт. Како е можно народ што не можел да ја увиди важноста на тркалото и кој при еден верски церемонијал жртвувал и по 80.000 луѓе, да прави пресметки за милиони години во иднината и во минатото - вели тој.
Стојмировски е еден од малиот број луѓе во Македонија што се занимаваат со оваа проблематика. Тој има напишано четири научнофантастични романи, педесетина раскази, пет радиодрами, десет документарни филмови, околу 20 фељтони и уште многу записи, предавања и радиоемисии и ТВ-емисии, а моментално ја доработува книгата за катаклизмите.
- Кај нас само двајца - тројца објавиле нешто на оваа тема иако постои голем интерес. Во една телевизиска емисија во која бев гостин се јавија дури стотина гледачи - вели тој. Крајот на светот е тема што се обработува во жанрот на научната фантастика, која денес е еднакво присутна во литературата и филмската индустрија. Одлуката дали да им се верува на древните предвидувања или не, останува на самите нас, меѓутоа, тоа, веројатно, треба да не направи свесни дека Земјата засега е наш единствен дом.
А.Б
http://www.vreme.com.mk/DesktopDefault.aspx?tabindex=6&tabid=1&EditionID=1937&ArticleID=133384
Интересен текст ... интересни размислувања ...
)не ни преостанува ништо друго освен да ги дискутираме можните причини и настани кои довеле до фамозната 2012.
