Освен ако тато и мама не ви осигурале работно место, сигурно барем еднаш сте се нашле соочени со барање огласи за работа. Без разлика во која област барате работа, сигурно за момент ќе си помислите дека државата ни цвета со успешни и прогресивни фирми, а едноставно не ви е јасно како има толку невработени, а толку совршени работни позиции.
Небитно дали барате работа во земјоделство, администрација, ИТ или правниот сектор, сите огласи имаат свој темплејт на составување - исти зборови, исти фрази и исти начини како да ви го „спопикаат“. Добро, секоја чест на исклучоците, чии понудени места ги снемува како леб во Етиопија или се веќе ветени како невеста во Индија.
Но, за да не се најдете пред (уште едно) разочарување, било да е поради тимот со кој би работеле, очекувањата од големината на компанијата или работните обврски, а да не ги ни спомнуваме примањата, треба да знаете како точно да ги протолкувате огласите и да ги тргнете розовите очила кои се чини дека доаѓаат во пакет со огласите.
Еве еден едноставен пример на оглас за работа:
„Компанија (често без наведено име) бара личност која ќе му се придружи на нашиот млад и амбициозен тим. Од потенцијалните кандидати се очекува подготвеност за учење и усвојување на нови знаења, како и високо ниво на самоиницијативност и флексибилност. Ако ги исполнувате наведените услови и барате работа во прогресивна компанија со стимулативни плаќања и можности за напредување, контактирајте нè на...“
Отприлика сите огласи се во овој стил, а не се ни далеку од она што вие би го напишале во вашето мотивационо писмо. Но, за разлика од вас, од кои дел само сакаат да се „продадат“, но поголемиот дел навистина го мислат тоа, еве што сакаат вашите потенцијални работодавци да кажат.
Прва работа што треба да ви ја запали црвената сијаличка е тоа дека се работи за млад и амбициозен тим. Претставата кон која огласувачите се стремат е дека се работи за луѓе со отворени сфаќања, кои ќе направат вистинска револуција во сферата во која работат. Вистината е со малку потемна нијанса - тие се компанија која уште работи за да дојде до буџет од позитивна нула, вработувајќи работна сила која ќе може да работи во лоши услови, за мала или никаква плата чиј рок на исплаќање е недефиниран, само за да се извади од го*ната.
Вториот момент во огласот е подготвеноста за учење и нови знаења кај кандидатите, што треба да го постигне ефектот дека, и да сте млади и неискусни, ќе научите многу од работодавците и ќе стекнете големо искуство. Ова е причината поради која многу би се согласиле и за работа со мал паричен надомест, но вистината е дека во најдобар случај, фразата ја напишале колку да не стои празно место во огласот, а во најлош, дома ќе се враќате со томови книги кои ќе треба да ги читате во вашето слободно време, а тоа никако нема да ви биде надоместено. Всушност, можеби постои и едно „потемно“ сценариото: дека ќе треба да бидете отворени за нови знаења како местење фотокопир или средување документи, наместо работниот опис за кој првично сте аплицирале.
За флексибилност и добар тимски дух се работи
Некаде тука спаѓаат и флексибилноста и самоиницијативноста, заедно со тимскиот дух. Ова значи дека ќе треба да бидете доволно флексибилни и тимски настроени, што без приговор ќе се согласите да ги работите и задачите од кои сите бегаат со километри. Ама, хеј, вие сте флексибилни, така што, нема да ви пречи да се „свиткате“ малку околу исполнувањето на тие „валкани“ работи. А тимскиот дух - тоа значи дека лидерот на тимот на крај ќе си ги присвои сите заслуги, секако доколку проектот ви е успешен. Доколку не, го „јадете“ вие.
Кога би размислиле подобро, дали некаде сте прочитале дека мала компанија со низок степен на успех, која остварува приходи доволно за да си го покрие задникот, а ако има среќа, и платите на работниците, бараат нови вработени? Секако дека не сте прочитале, бидејќи никој нема тоа да го напише, благодарение на ветувањата кои можат да одат во недоглед, а не секогаш до исполнување.
Затоа, нареден пат кога ќе прочитате оглас, пред да почнете да скокате од радост, обидете се да протолкувате што сака така убаво спакувано да ви продаде како работна позиција.
виа Кајгана
...си имала лошо влијание врз другите девојки...тие може ќе останеле...срам да ти е...Требало да причекаш може и тебе ќе те гушнел