Добро, сериозно ги имам предвид коментарите над мојов пост. Се' уште не сум започнал со работа, па ништо не е конечно, има простор за размислување, премислување и слично.
Низ интернетов буквално врие од препораки, убедувања, разубедувања, кавги и рекламирања и антиреклама (на пример, пвц столаријата е канцерогена, а такви се и повеќето од боите со кои се молерисува).
Ете и за производите од типот на термостоп никаде не видов издржано мислење дека има некаква корист од нив. Напротив, главно разочарани муштерии пишуваат.
При изборот на материјал за внатрешна изолација (оти друга не е можна) водев сметка за неколку работи. Се разбира, топлинската изолација ми е многу важна, но не е само таа во прашање. Колку е, на пример, и дали воопшто е стиродурот штетен за здравјето? Дали е лесно запалив? Сепак станува збор за простор за живеење, во кој се минува најголемиот дел од времето.
Што е со влагата и со мувлата? Читав коментари (не навлегувам околу тоа колку се издржани и веродостојни, ама секако не се малку на број па не се за занемарување) дека е многу можно да се развие мувла меѓу ѕидот и стиродурот или стиропорот. Веројатно со квалитетна монтажа тоа се избегнува или !?
Заштедата на простор ми е доста битна, како и времетраењето на монтирање. Не велам дека мултипорот е идеално решение - скап е, мек е (што отежнува дополнителни монтажи врз него, од клима уреди, преку слики или полици до телевизор и сл.). Од друга страна многу едноставно се монтира, наводно воопшто не е штетен по здравјето, паропропустлив е, наводно нема никакви проблеми со влага, мувла.
Јасно, лаик сум, засега прибирам информации главно преку интернет. Наредниов месец ќе посветам повеќе време. И тоа е тоа.
@icemaher @PinkyTheGreat @Сабазиј сте читале на Интернет, сте се информирале, ама за некои работи не стигнале баш точни информации
Сега во постов поопширно ќе ги напишам карактеристиките, предностите, недостатоците и муабетите карактеристични за термоизолациските материјали.
Прво и основно, нормално е секој материјал со текот на годините да губи од својата функционалност. Едноставно годините си го прават своето. Не е иста силата и изгледот на човек кога имал 20 години и кога има 50 години, па така и со материјалите. А за тоа колку ќе трае и колку трајна ќе му биде функционалноста се зависи од производителот и од мајсторот, поточно од тоа како ќе биде поставен.
Потоа би го искоментирал начинот на поставување на стиропорот, стиродурот, Мултипорот и камената волна, кој речиси е ист. Прво се отстрануваат сите нерамнини и со четка се чисти површината, т.е. ѕидот и во некои случаи, т.е. најчесто кога станува збор за фасада, ѕидот се премачкува со прајмер кој овозможува заштита на ѕидот и хемиска ретенција за малтерот, но во одредени случаи и нема потреба од тоа да се користи прајмер, па затоа тоа мајсторот го проценува. Потоа во основата на ѕидот се поставува алуминиумска лајсна врз која ќе се редат изолационите плочи.
За стиропорот, стиродурот и камената волна се користи лепак во вид на малтер кој се нанесува во вид на една лента по сите рабови на страната и во средината се става уште една лента со додатни топчиња од малтерот или само топчиња, со цел да се добие вакуум со лепењето, затоа што во спротивно може да дојде до отпаѓање/одлепување на овие материјали, како и до пукање на фасадата. Затоа и често кај некои згради или куќи може да се види како се познаваат на фасадата изолациските плочи и истата е испукана. За Мултипорот е поразлично и за него се користи специјален Ytong лепак кој се разнесува низ целата еднострана површина на плочата со забеста шпакла.
Вака подготвените изолациски плочи се лепат на ѕидот и се фиксираат со типли. При лепењето не треба да има празни простори, а доколку истите ги има треба да се пополнат со истиот изолациски материјал, а не со малтерот или со пур пена, со цел да не дојде до појава на топлински мостови кои подоцна ќе резултираат со нарушена топлотна изолација и појава на влага и мувла. Кај подебелите изолациски плочи типлата може да навлезе подлабоко во плочата и тогаш истата треба да се затвори со изолациско капаче од истиот материјал. Врз изолациската плоча се нанесува малтер соодветен за одредениот вид на материјал и врз него се нанесува стаклена мрежа, а врз неа се нанесува уште еден слој на малтер. На крајот се завршува/премачкува најчесто со абрип.
Иначе сите материјали си имаат свои предности и маани, па за секој од нив би биле следните.............
Стиропорот е синтетски материјал кој се произведува со полимеризација на стирен и претставува цврст пенест материјал кој е исполнет со воздух. Негови предности се тоа што тој е водоотпорен, лесен за работа, има добри термоизолациски способности, има ниска акустична спроводливост, но затоа е лесно запаллив и е паранепропустлив. Затоа и се користи како изолационен материјал при надворешни фасади, затоа што кога е поставен внатрешно може да се стопи ако до него има близок извор на топлина, а и често знае да ја задржува влажноста на воздухот поради неговата паранепропусност, па може да се видат капки вода/влага на ѕидот од внатрешната страна. Истиот уште е познат и како EPS (експандиран полистирен), а може да се најде на пазарот и како графитен стиропор, црн по боја кој има појака изолациона способност и цврстина, но истиот е и поскап. Исто така сега на пазарот се наоѓа и парапропусен стиропор, но јас лично немам видено до сега кај може истиот да се купи, но тоа не значи дека кај нас го нема.
Стиродурот е речиси ист по состав како и стиропорот, а е познат како XPS (екстудиран полистирен). Тој е многу позбиен, поради што е и поцврст од стиропорот, тој е многу поводоотпорен, па затоа и се користи за изолација на подрумски ѕидови, цоклиња, темели и други површини кај кои има посилни механички оштетувања и поголема влажност. Тоа се неговите предности, а маани му се што е запаллив и не е парапропусен.
Камената волна по состав е добиена од камен од вулканско потекло - базалт, брикети од доломит, дијабаз, но може и боксит, а при горењето се користи кокс и/или плин. Истата има страшна термоизолација (топлотна спроводливост од околу λ=0.038) и страшна звучна изолација. Таа е огноотпорна до некои 750 °C, има голема цврстина и со текот на годините нема некоја посебна промена. Тоа се нејзините предности, но нејзина маана е тоа што е скапа и тоа што за неа се вртат муабети дека е канцерогена, но на нашиве простори за камената волна оние кои истата ја проучуваат или продаваат, викаат дека истата не е штетна по здравјето на човекот.
Мултипорот е производ на фирмата Ytong која е речиси позната низ целиот свет, а посебно низ Европа. Мултипорот по состав е добиен од вар, песок, цемент, вода и средство кое создава и обликува голем број на воздушни пори. Неговите предности се тоа што има добра термоизолација, добра звучна изолација, водоотпорен е, огноотпорен е, лесен е за работа, но негови маани се што има нешто поскапа цена и што за него се вртат муабети дека е канцероген. Тој муабет не се врти само за него, туку се врти за сите производи на фирмата Ytong. Тоа е нешто кое се збори со години, но сите не веруваат во тоа, а и истото не е докажано и објавено во јавноста, па затоа и луѓето го користат како градежен и изолациски материјал.
Затоа според мене, а и според голем број на други луѓе бар малку запознаени со градежништвото, како и градежници и архитекти, најдобар начин за внатрешна термоизолација е системот минерална волна - гипскартон - профили. И за овој систем на времето се мислело дека е канцероген и тоа навистина било така, затоа што како изолација се користела стаклената волна. Но во денешно време се користи минерална волна за која постојат и сертификати дека е правена од природни материјали и истата не е штетна за здравјето на човекот, а и околината. Значи се поставуваат алуминиумски профили, па можат и дрвени, ако ѕидот е изложен на влажност се поставува врз нив и парапропусна водонепропусна фолија и истите се исполнуваат со минерална волна. Врз нив се поставува парапропусна водонепропусна фолија и тоа се затвара со гипскартон, а со два слоја на гипскартон веќе може да се добие и доста цврст ѕид на кој можеш да поставиш од слики до висечки елементи кои можат да тежат и повеќе од 50 кила. Во ѕидот се поставува типла и потоа поставуваш што сакаш. Најдобар гипскартон и најдобра и најсигурна минерална волна е на Knauf, а и цените во однос на погорен наведените производи се доста прифатливи. дебелината на новиот ѕид/изолација со минерална волна од 5 центиметри би требало да има дебелина од некои 6 - 7 центиметри, што нема нешто посебно да ти го намали просторот. Градежниот хаос и нервозите нема ни да го осетиш, затоа што мајсторите сетоа тоа ќе ти го намонтираат за пола ден до еден цел ден, а ефектот од изолацијата ќе ти биде долготраен.
А за тоа дека ПВЦ прозорите имало шанса да ти бидат канцерогени е мала шанса и тоа во случај ако се користи некоја кинеска пластика по сто пати рециклирана од непознато потекло. Затоа се што ќе купуваш и вложуваш во својот дом купувај го од фирма со сертификат. Така нема подоцна да те боли глава
Се надевам дека бар нешто помогнав за да се разјасни
