nazdravje bricenje
Осуда за инцидентите меѓу двата изборни круга
Коментари (38)
30.03.2009 20:40
Ерван Фуере
Меѓународната заедница е шокирана од ужасните слики на плоштадот. Амбасадорите на САД, ЕУ и ОБСЕ, Фуере, Рикер и Хереро, бараат виновниците за овој настан да бидат изведени пред суд.
Мирните демонстрации се основна придобивка на секоја демократија, сметаат претставниците на меѓународниот фактор во изјавата за А1.
„Сцените кои ги видов на телевизија синоќа беа ужасни. Не сме виделе такво нешто досега во Македонија. Загрижувачки е што ова се случува на ваков начин. Мислам дека не помага тоа што двете партии се обвинуваат меѓусебе. Тие мора да се погрижат за да се справат ефективно со таквиот екстремизам“, смета евроамбасадорот Ерван Фуере.
„Учесниците, кои беа многу транспарентни, кои можевме да ги видиме на телевизија, треба да бидат казнети. Ако се открие дека се активисти на која било партија, треба да бидат избркани од неа веднаш, а тие настани треба да се осудат. Мирните протести се нормален дел на секоја демократија. Вчера, во многу европски градови имаше демонстрации за други теми“, рече Фуере.
Хозе Луис Хереро
„Секако, се надевам дека она што се случи во саботата, е нешто што нема да го видиме никогаш повеќе. Зашто тоа ја покажува грдата страна на македонската политика, која не е во согласност со демократското општество. Ако луѓето сакаат да протестираат, треба да им биде дозволено да демонстрираат мирно. Против кои било прашања. А не да бидат напаѓани од разлутени толпи, што е спротивно на демократската пракса“, додаде Фуере.
„Се согласувам дека секој има право на мислење. Луѓето треба да имаат можност да ги искажат своите мислења. Но, инцидентите кои ги видовме во саботата се неприфатливи. Во целосна смисла, мислам дека општествата кои се во транзиција, како што е случајот овде, луѓето треба да направат напор за да ги одбегнуваат радикализацијата и екстремизмот“, изјави Хозе Луис Хереро, амбасадор на ОБСЕ.
„Значи, да ги заоблат малку аглите на своите мислења, за сите да придонесат во процесот кој е во тек“, додаде Хереро.
„Се согласувам со своите колеги, дека луѓето во демократско општество имаат право да се собираат и да протестираат мирно. Но, за мене е вознемирувачки и срамно дека голема група насилници, можеби неколку илјади... Луѓе, чии организатори остануваат непознати или сакаат да останат анонимни, си земаат право да употребат сила и да спречат протест против планот на владата за градење“, изјави амбасадорот на САД во Македонија Филип Рикер.
Филип Рикер
„Сите луѓе имаат право да го изразат своето мислење за овие теми и плановите на владата. Верувам дека полицијата презема активна истрага, за да ги изнесе насилниците пред лицето на правдата. Бев многу вознемирен од некои од извикувањата на омраза. Од некои расистички клевети, навреди, покажување нетолеранција“, рече Рикер.
„Нема место за нив во 21-иот век. Ниту во Македонија, која сите ја пофаливме како пример за мултиетничка толеранција. И модел кој треба да се следи во овој дел од светот. Би рекол и дека сега не е време политичките партии да го користат ова. Неодговорните изјави од кои било политички партии го поткопуваат нивниот кредибилитет“, нагласи Рикер.
„Време е да се покаже политичка зрелост, да се изнесат пред правдата одговорните за тоа, и да се дозволи мирно изразување на мислењата на луѓето во оваа демократија. Би додал нешто во врска со претходното прашање. Би сакал да слушнам и изјава од црквата, Македонската православна црква во врска со овој инцидент“, вели амбасадорот Рикер.
„Бидејќи, толпата која ги предизвика насилствата во саботата, тврди дека ја претставува црквата. Мислам дека е важно за црквата да се изјасни и да го осуди ваквото насилство од група луѓе кои тврдат дека дејствуваат во име на црквата“, додаде Филип Рикер.
