"Беј д фиш" и Каролина во дует
Од вчера е пуштен новиот сингл на "Беј д фиш" насловен "Идеална жена" (Идеал Њоман), целосно испеана од поп-ѕвездата Каролина Гочева, со која оваа група за првпат во својата десетгодишна кариера соработува.
-Почнав да ја работам приказната за албумот којшто ние го нарекуваме мјузикл и се случи освен двата главни карактери да ни требаат и други, па испаднаа на крај да ни требаат пет карактери. За еден се сретнавме со Каролина и рековме ајде да пробаме. Ја прашав дали некогаш глумела, таа рече не, а јас и кажав е па тогаш супер, ни јас никогаш не сум бил режисер. Ова го велам затоа што целиот албум е концепиран како мјузикл и Каролина пред се требаше да одглуми карактер од приказната, вели Огнен Анастасовски, лидерот на групата.
Каролина исто така е изненадена од понудата, но и од добро завршената работа.
-Многу пријатно се изненадив што ме побараа да соработуваме пред се поради тоа што сме потполно различни изведувачи. Но веднаш прифатив затоа што сум голем фан на бендот. Песната е нешто сосема поинакво од она што мојата публика е навикната да го слуша од мене, но убедена сум дека сите ќе бидат задоволни од оваа необична комбинација, вели поп-ѕвездата.
Албумот ќе биде двоен, со над осумдесет минути музика. Издавач на овој двоен диск ќе бидат "Круг" продукција и ПМГ рекордингс од Скопје.
Оваа песна е втор сингл од албумот за кој во претстојниов период е планарано да се сними и спот. Следниот настап на бендот е закажан на отворањето на "Скрим фестивал" на 18 февруари во "Метрополис арената" во Скопје.
