Евролига 2012-2013

[vac 13]

Оваа сезона многу утакмици ќе се играат во петок вечер,одлично
Конечно да не се поклопуваат утакмиците со Лига Шампиони,таман баскетче гледање па може на шетање

 

[fidanmk]

Да, треба уште еднаш да се потенцира значи, од сега мечевите ќе се играат четврток и петок, за да не се поколопуваат заедно со фудбалската Лига на шампиони како што беше досега..

Се објави календарот и деновите кога и официјално екипите ќе настапат во новата сезона 2012/2013 година во најквалитетното европско клупско натпреварување. Повеќе од 40% од мечевите ќе се играат во петок за прв пат во историјата на Евролига.

Тука може да се проследи календарот на сите мечеви од регуларниот дел од сезоната. Кликни на линкот.
http://www.euroleague.net/rs/39657/84bd1f8d-134d-42a0-a8ee-cd688d29aaa2/ad0/filename/rs-groups-euroleague-12-13-13-07.pdf

Вкупно 50, од вкупно 120 натпревари во регуларниот дел од сезоната, ќе бидат во петок. Токму пред започнување на викендот, им се овозможува на кошаркарските фанови и сите останати што го сакаат овој спорт да имаат повеќе време и подготовка за следење на овие натпревари.

Во исто време, Евролигата ги избра и наинтересните дуели, кои може да се окарактеризираат како дерби на колото, мечеви што ќе се одржуваат в четврток, во текот на првата половина од регуларниот дел од сезоната. Во првото коло се издвојува мечот меѓу Фенербахче Улкер Истанбул и ланскиот шампион во Еврокупот, тимот на Химки. Во второто коло, белградски Партизан ќе го пречека ланскиот финалист во Евролигата, руската ЦСКА Москва. Во третото коло, дебитантот во ова натпреварување, францускиот Шалон ќе се сретне со израелскиот Макаби Електра. Во четвртото коло, ќе биде судир на досега редовни учесници во Евролигата, Каха Лаборал и Анадолу Ефес. И на крајот на завршувањето на првиот дел од сезоната, германскиот тим на Алба Берлин, предводен од новиот тренер Саша Обрадовиќ, ќе излезе на дуел со Макаби Електра во рамките од петтото коло.

Регуларниот дел од сезона во Евролигата започнува в четврток, на 11 Октомври 2012 година и завршува в петок на 14 декември 2012 година со најдобрите 16 екипи во следната рунда, во втората фаза која започнува на 27 декември 2012 година.

 

[fidanmk]

Италјанскиот состав на Палаканестро Канту се засили со крилниот центар Алекс Тајс кој потпиша двегодишен договор. Тој доаѓа од израелскиот Макаби Ашдод со чиј тим успеа лани да дојде до титулата во првенството. Неговиот учинок во 24 натпревари (13,3 поени или 66,5% прецизност од шут, 8,3 скока и 1,4 блокада). Тој беше четврти на листата по блокади и скокови. Пред да дојде во Израел, тој настапуваше четири сезони за Универзитетот на Флорида. Во меѓувреме, Тајс доби израелско државјанство и се подготвува да настапи ова лето за репрезентацијата на Израел на квалификациите за пласман на Европското првенство во Словенија 2013 година.

Амбициозниот руски клуб Уникс Казан е спремен да понуди 400.000 илјади евра годишна плата за британскиот кошаркар Попс Менса-Бонсу. Лани Бонсу со турскиот Бешикташ успеа да дојде до траофеите во првенството, националниот Куп и Еврочелинџ купот. За ангажман на Бонсу се заинтерисира и Галатасарај, но клубот од Истанбул е послаб финансиски за разлика од рускиот клуб. Крилниот центар ќе настапи за британската репрезентација на Олимпијадата во Лондон 2012.


Ѓорѓе Гагиќ (22), кој игра на центарската позиција (211 см), потпиша четиригодишен договор со Партизан. Минатата сезона тој играше во составот на Хемофарм. Тој го привлече вниманието на кошаркарската јавност во моментот кога оствари дабл-дабл учинок против Макаби. Може да се издвои и фактот што имаше и одлични настапи во првенството особено против екипата на Мега, кога оствари 39 индексни поени, како и против Крагуевац (29 индексни поени). Уште како млад јуниор Гагиќ настапувал и во Црвена Ѕвезда. Доаѓањето во Партизан во соравотка со тренерот Вујошевиќ сигурно ќе биде голем чекор и предизвик за младиот ас во првенството, но и во Евролигата. Очигледно е дека тимот сака да стартува со млади сили во новата сезона. Се најавува заминување од клубот на Душан Кецман, Петар Божиќ и Рашко Катиќ, а се пројавува интересе за ангажман на Елтон Браун и Шон Џејмс.

Нејтан Џаваи потпиша договор со шпанската екипа на Барселона. Се најавува дека поранешниот центар на белградски Партизан наредната сезона бруто просечно ќе заработува 750.000 илјади евра.

 

[fidanmk]

Македонскиот репрезентативец Лестер Бо МекКејлеб не успеал да постигне договор со турскиот тим на Фенербахче, според медиумите. Најверојатно причина за одбивањето на понудата е желбата на нашиот плејмејкер да игра во НБА, односно да се чека тамошна понуда. Но, сеуште има шанси да остане и на европско тло, откако понуди пристигнуваат и од Барселона и Уникс Казан.

Поранешниот кошаркар на Партизан, Стефон Лазме потпиша едногодишен договор со Панатинаикос. Играчот од Габон, лани настапуваше за шпанската екипа на Обрадорио каде забележуваше по 11 поени и шест скока по натпревар. Лазме ќе биде третото засилување за ПАО во текот на преодниот рок, после Американецот Ендрју Панко и Софоклис Скорцијанитис. Од клубот си замина Јан Вујукас кој се пресели во редовите на рускиот Уникс Казан.


Австралиецот Нејтон Џаваи и официјално стана член на Барселона. Тој потпиша едногодишен договор со шпанскиот клуб. Лани Џаваи му помогна на Уникс да се пласира до четвртфиналето во Евролигата. За 15 меча во рускиот клуб во Евролигата Џаваи забележа 7,3 поени и 4,3 скока по натпревар. Претходно настапувал и за екипите на Партизан и Минесота Тимбервулвс. Како што се знае, во наредната сезона бруто просечно во Барселона ќе заработува 750.000 илјади евра.

Белградски Партизан се засили со Дејан Мусли (213 см) кој игра на центарската позиција. 21-годишниот играч ја прекина соработката со Каха Лаборал. Тој потпиша тригодишен договор со српскиот клуб. За Каха Лаборал настапи на осум меча и двапати во Евролигата. Кариерата ја започнал во ФМП Железник, по што стана еден од најталентираните центри на Стариот континент. Настапувајќи за младите и јуниорски национални селекции успеа да стигне до два злата и една бронза, собирајќи бројни признанија.

 

[fidanmk]

По петти пат во нивната соработка Евролига и НБА договорија натпревари, што привлекуваат внимание. Реал Мадрид и Монтепаски Сиена во нивната американска турнеја ќе одиграат по два натпревари во САД и Канада.

6 октомври 2012 Мемфис Гризлис-Реал Мадрид
6 октомври 2012 Сан Антонио Спарс-Монтепаски Сиена
8 октомври 2012 Торонто Репторс-Реал Мадрид
8 октомври 2012 Кливленд Кавалирс-Монтепаски Сиена

“Овие дуели ќе бидат огромно искуство за екипата, затоа што, и покрај тоа што Реал Мадрид одиграл четири пати досега со НБА тимови, но ова ќе биде првпат да играме на американско тло. Ова ќе биде шанса уште повеќе да се истакне, да го покаже својот квалитет,“, рече директорот на шпанскиот клуб, Хуан Карлос Санчез, кој додава дека ова ќе бидат два интересни меча, ќе се даде максимум за да се победи, но пред фановите ќе се обидеме да прикажеме и атракции со своето знаење“.
“Ќе ни биде огромна чест што ќе настапуваме во овие европско-американски дуели. За клубот ова ќе биде првпат и им се заблагодаруваме на челниците на Евролига и НБА што не избраа токму нас. Возбудени сме по ваквата добиена прилика, привилегија e да играш против Сан Антонио Спарс и Кливленд Кавалирс. Нам ни останува да се прикажеме во добро светло и гордо да ја претставуваме европската кошарка“, вели претседателот на италјанскиот клуб, Монтепаски Сиена, Фердинандо Минучи.
Традицијата на пријателски меча помеѓу НБА и европски екипи започнала во 1978 година, кога во Тел Авив, Израел, составтот на Макаби Тел Авив го пречека Вашингтон Булетс. Досега се одиграни 69 меча помеѓу екипи од Европа и НБА.

Исто така две НБА екипи ќе ја посетат Европа и ќе одиграат натпревари со европски клубови.
5 октомври 2012 Фенербахче Улкер-Бостон Селтикс
6 октомври 2012 Алба Берлин-Далас Маверикс
7 октомври 2012 Армани Милано-Бостон Селтикс
9 октомври 2012 Барселона-Далас Маверикс

 

[fidanmk]

Македонскиот репрезентативец Лестер Бо МекКејлеб, според информациите би можел да стане член на НБА составот на Сан Антонио Спарс. Доколку се реализира трансферот за довчерашниот член на Монтепаски Сиена, пречка за неговото враќање во САД ќе претставува отштета која е милионска, (нема откупна клаузула во новиот договор), а која Сан Антонио не може да ја плати според правилата во НБА. Тоа значи дека ќе мора сам да ја плати македонскиот кошаркар во таквиот случај. Да потсетиме, за неговите услуги се заинтересирани и турскиот Фенербахче и рускиот Уникс, кои се спремни да платат отштета од два милиони евра. Грег Попович, тренерот на Спарси, ја следел играта на МекКејлеб на олимпискиот квалификациски турнир во Каракас и бил многу задоволен од неговите настапи. МекКејлеб би бил идеална замена за Тони Паркер.

27-годишниот шутер, Американецот Брејс Врајт потпиша за хрватската екипа на Цедевита. Врајт фактички се враќа во овој состав, откако претходно играше во сезоната 2010/2011 кога стигна до третото место во Еврокупот. Лани настапуваше за шпанската Сарагоса и како прв стартер во таа екипа забележа просек од 14,5 поени по натпревар (четврти стрелец во лигата). “Задоволни сме што повторно Врајт ќе игра за нас. Тој има одлични настапи во последните три години. Веруваме дека уште од првиот меч во Евролигата оваа сезона ќе биде еден од главните играчи во составот“, вели спортскиот директор на клубот, Матеј Мамиќ.

Жалгирис се засили со Дарјус Лавринович и Тремел Дарден. Литванските шампиони доведоа две исклучително звучни имиња. Лавринович доаѓа од ЦСКА Москва. Лани имаше просек по натпревар (4,7 поени и 2,7 скока во Евролигата), додека во руската ВТБ лига (8,6 поени и 3,7 скока). Претходно во Евролигата играл и за Фенербахче (8.0 поени и 4,4 скока). Дарден доаѓа од Уникаха Малага (лани, Евролига – 8,0 поени и 3,4 скока).

Николас Мацарино го продолжи договорот со Канту и ќе игра во италјанската екипа и следната сезона. Тој има играно на 37 меча во првенството (просек 10,1 поен, 1,8 скок и 2,1 асистенции), додека во 16 евролигашки натпревари (6,2 поени и 1,4 скок). Со клубот (кој дебитираше во европското натпреварување) успеа да стигне до Топ-16 фазата. Тој исто така му помогна на тимот да стигне до финалето во националната лига и учествуваше во Ол-стар мечот, каде што победи на натпреварот во погодување тројки.


Павел Антипов (203 см) потпиша двегодишен договор со рускиот Уникс Казан. Тој доаѓа од составот на Спартак Ст. Петерсбург, со чиј тим одигра 12 меча лани во Руската лига, ВТБ и Еврокупот. Антипов настапуваше за националната селекција до 20 години на Европското првенство во Билбао, Шпанија, каде успеа да стигне до полуфиналето (во просек 9,4 поени и 3,7 скока во одиграни девет меча).

Добри вести за составот од Љубљана. Словенечката Унион Олимпија ќе игра следната сезона во Евролига, откако ги исплати сите долгови, плати на поранешните играчи Душан Ѓорѓевиќ, Един Бавчиќ и Владимир Голубовиќ, по што избегна исфрлување од најелитното европско клупско натпреварување. Составот сега може слободно да мисли на следната сезона. Тамошните медиуми пишуваат дека клубот е заинтересиран за доведување на младите репрезентативци Ален Омиќ, Клемен Препелиќ и Лука Рупник.

 

[fidanmk]

Италјанскиот клуб на Монтепаски Сиена е заинтересиран за доведување на Американецот со македонски пасош, Маркиз Грин. Тој го повреди коленото на пријателскиот дуел против Русија настапувајќи за македонската репрезентација. Откако тренерот на Авелино, Феличе Скандоне ја увиде неговата повреда, реши да остане како слободен играч, агент. Грин помина две сезони во Авелино.

Довчерашниот член на ЦСКА Москва, Алексеј Швед се пресели во НБА составот на Минесота Тимбервулвс. По одличните настапи во рускиот клуб, Швед следната сезона ќе настапи во Минесота, каде што негов соиграч на неговата плејмејкерска позиција ќе биде Шпанецот Рики Рубио. Статистиката на Швед во ЦСКА во вкупно 78 меча одиграни во Евролигата: 14,7 минути, 6,2 поени, 1,9 скок, 1,8 асистенција, 0,7 украдена топка, 0,2 блокада. “Им се заблагодарувам на сите луѓе во ЦСКА Москва, во овој клуб имав убави моменти кои резултираа со трофеи. Постоеја шанси да останам, но донесив одлука да настапам во НБА лигата. За мене тоа ќе биде нов голем предизвик во професионалната кариера. Се надевам дека и во новата средина ќе постигнувам добри резултати“, вели Швед.


Американскиот кошаркар Коби Брајант истакна дека ја сака Барселона повеќе од Реал Мадрид. Членот на Лејкерси ги прати овие шпански гиганти, најголеми ривали на Пиринеите, со најмногу навивачи ширум светот. “За три години можеби ќе заиграм и за Барселона“, рече Брајант за Мундо Депортиво. Коби Брајант ќе биде дел од репрезентацијата на САД која ќе настапи на Олимписките Игри во Лондон 2012. Човекот си научил шпански, зошто да не оди и во шпански клуб..

Хрватскиот репрезентативец и довчерашниот играч на Фенербахче, Роко Лени Укиќ, е нов член на Панатинаикос. Имаше неколку екипи (Каха Лаборал, Уникаха, Уникс) кои што се интересираа за негов ангажман, но донесе одлука за потпис, односно двегодишен договор со грчкиот клуб. „Среќен сум што ќе одам во еден реномиран голем клуб. Имав конкретни понуди од Шпанија, Русија и Турција, меѓутоа мислам дека донесов исправна одлука. Едвај чекам да започне сезоната, ќе биде вистинско задоволство да се настапува за Панатинаикос“, вели Укиќ. Во својата професионална кариера, Укиќ го носел дресовите на Сплит, Каха Лаборал, Барселона, Виртус Болоња. Во 2008 година се пресели во САД и НБА лигата, каде настапуваше за Торонто Репторс и Милвоки Бакс. Статистиката на Укиќ во Фенербахче во Евролигата (11,1 поени, 2,8 скока, 2,1 асистенции по натпревар).

Ксистоф Лавринович е многу блиску до враќање во Монтепаски Сиена. Моментално Литванецот е слободен играч, но наскоро се очекува финализирање на договорот. За клубот од Сиена има одиграно пет сезони, со ист број на освоени титули.

Се наведува дека австралискиот центар со дански пасош Дејвид Андерсен најверојатно ќе потпише договор со Фенербахче. Останаа уште две години од договорот со Монтепаски Сиена, но тој реши да бара нов клуб. Симоне Пианиџиани, сега новиот тренер на Фенербахче, со италјанскиот клуб Монтепаски успеа да стигне до шест национални титули.

 

[MeirelesGFB1907]

Лестер Бо Меккелеб во Фенербахче!

 

[LaChupacabraLoca]

Аууу , Фенер ептен се засилуват за следната сезона , ќе биде интересно да се следи прогресот на оваа екипа. И лани имаа добар состав , ама не беа пхисички силни.

 

[fidanmk]

Македонскиот репрезентативец и поранешен член на Монтепаски Сиена и Партизан, Лестер Бо МекКејлеб потпиша договор со турскиот клуб на Фенербахче на две години (со плата од 1,6 милиони евра по сезона) со можност да биде продолжен на уште една (2+1). Биле успешни преговорите, а на италјанскиот клуб од Сиена ќе му бидат исплатени 1,3 милиони евра. Тој повторно ќе соработува со тренерот Симоне Пјаниџани, кој летово од Монтепаски се пресели во Истанбул. За услугите на МекКејлеб беа заинтересирани и екипите на Уникс Казан и Сан Антонио Спарс. Во последните две сезони во Сиена македонскиот плејмејкер имаше просек од 16,9 поени, 2,2 скока и 2,6 асистенции по натпревар и беше најдобар стрелец во групната фаза во Евролигата. Да потсетиме, Фенербахче е во група А, со Панатинаикос, Реал Мадрид, Химки, Унион Олимпија и еден квалификант.


Унион Олимпија продолжува да се засилува за следната сезона, откако потпиша со австралискиот центар Арон Бејнс. Тој доаѓа од грчкиот клуб на Икарос (13,6 поени и 8,7 скока по натпревар во 23 меча). Тоа беше трета сезона за Австралиецот на европско тло, а лани во лигата беше прв на листата по скокови. Претходно има играно и за германски Олденбург и литвански Литвос Ритас. Тој настапува во репрезентацијата на Австралија на Олимпијадата во Лондон 2012. По два меча има просек од 9 поени и 5 скока. Исто така, членот на словенечкиот тим, финскиот интернационалец Сасу Салин го продолжи договорот. Лани во Јадранската лига имаше просек 9,7 поени, 2,3 скока и 1,4 асистенција по натпревар, додека во Евролигата (4,4 поени, 2,0 скока и 1,3 асистенција). Ова ќе биде трета сезона за Салин настапувајќи за составот од Љубљана.

Германскиот тим на Бросе официјално се засили со Бостјан Нахбар кој успешно ги помина лекарските прегледи. Тој лани настапуваше за Уникс Казан (во седум меча во Евролигата, 4 поени и 2,4 скока по натпревар). Беше трет стрелец во сезоната 2008/2009 во руската лига настапувајќи за Динамо Москва и четврти стрелевц во Еврокупот. Беше член и на турски Ефес Пилсен, додека во периодот од 2002-2008 година настапуваше во НБА лигата. Најпрвин три сезони во Хјустон Рокетс и три во Њу Џерси Нетс. Во неговата последна НБА сезона имаше просек од 9,8 поени и 3,5 скока по натпревар во вкупно одиграни 75 меча.

Српскиот репрезентативец Милан Мачван се пресели во турски Галатасарај, откако минатата сезона го носеше дресот на Партизан. Галатасарај кој ќе биде предводен од Ергин Атаман, се засилува за следната сезона. Засега доведени се Енгин Атсура од Фенербахче, Џемонт Гордон од ЦСКА Москва, Ервин Дадли од Бешикташ и Ченк Акјола од Анадолу Ефес. Мачван во својата кариера настапувал и за ФМП Железник, Хемофарм, Макаби Тел Авив. Во 2007 година со репрезентацијата до 19 години го освои златото на Светското првенство, додека со сениорската успеа да го освои златото и на Европското првенство две години подоцна.

Новиот босански репрезентативец и поранешен член на Уникаха, Неџад Синановиќ се пресели во германската Алба. Тој во минатата евролигашка сезона просечно играше десет минути по натпревар, постигнувајќи 3,4 поени и 2,3 скока. Во шпанската АЦБ лига просечно поминуваше девет минути на терен (4,1 поен и 3,2 скока).

 

[fidanmk]

Унион Олимпија го претстави новото засилување за претстојната сезона. Нов член е Дражен Бубниќ (26) кој доаѓа од словенечки Хелиос Домжале. Статистиката на Бубниќ лани во Јадранската лига (10,2 поени и 4,2 скока) и во словенечката лига (12,6 поени и 5,0 скока) по натпревар. Тој во 2004 година ја започна професионалната кариера во Хрватска, во составот на Аналитика Загреб и остана таму до 2007 година.

Уникаха се засили со Хозе Мигел Цеми Уртасун кој потпиша двегодишен договор, што ќе значи и негово деби во Евролигата. Тој доаѓа од Кахасол Севиља каде лани во 34 одиграни меча во шпанската лига имаше просек 10,1 поени, 2,0 асистенции и 2,2 скока по натпревар. Со екипата успеа да стигне до финалето во Еврокупот во 2011 година, откако загуби од рускиот Уникс Казан.

Руската ЦСКА Москва се засили со Сони Вимс (198 см.) кој потпиша тригодишен договор. Тој доаѓа од Жалгирис каде имаше просек 15,5 поени и 5 скока по натпревар по одиграни 15 меча во Евролигата и беше воедно трет стрелец на листата по МекКејлеб и Спанулис. “Возбуден сум што ќе настапувам за еден од најдобрите европски клуба. Среќен сум што добивам ваква шанса во овој дел од мојата кариера. Ќе биде интересно да се соработува со тренерот Месина. Секогаш ќе бидам подготвен за улогата што ќе ми биде укажана во тимот“, вели Вимс (26), кој претходно настапувал и во НБА лигата за Торонто Репторс (9,2 поени, 2,6 скока, 59 меча) и Денвер Нагетс.


Брајан Робертс нема да го продолжи договорот со германскиот Бросе Баскетс. Својата кариера Робертс ќе ја продолжи во НБА, во составот на Шарлот Хорнетс. Лани во германската Бундеслига, имаше просек од 12,0 поени, 2,1 скока и 3,2 асистенции по натпревар.

Бешикташ се засили со плејмејкерот Муратчан Гулер и крилниот центар Чевхер Озер. Гулер лани настапуваше за Турк Телеком (6,8 поени, 4,8 асистенции, 4,7 скока во шест меча во Еврочелинџ). И претходно бил член на Бешикташ во периодот 2008-2010 година, а го носел и дресот на Анталија, Каршијака и Улкер. Исто така и Озер настапувал за Бешикташ четири сезони. Лани настапуваше за Галатасарај (3,6 поени и 1,4 скок во 18 меча од Евролигата).

Марселус Кемп потпиша со Монтепаски Сиена за наредната сезона и доаѓа од составот на Бешикташ. Во Еврокуп квалификациите постигнуваше во просек 21,0 поени по натпревар. Со турскиот клуб успеа минатата година да стигне до трофејот во турскиот куп.

Британскиот кошаркар Попс Менсах-Бонсу ќе стане нов член на Макаби Тел Авив. Тој ќе стави потпис по завршувањето на Олимпијадата 2012 во Лондон. Тој успеа (за 28 минути, 10 поени, 8 скока) со Бешикташ да го освои трофејот во првенството победувајќи го во финалето Анадолу Ефес (4:2 серија). Во просек постигнуваше по 18,5 поени, 11,8 скока, 1,3 асистенција и 1,0 блокада по натпревар во одиграни 11 меча во Еврочелинџ натпреварувањето.

 

[fidanmk]

Мет Јанинг следната сезона ќе игра за Монтепаски Сиена, откако беше официјализирано и на неговиот Твитер профил. Тој доаѓа од составот на Монферато. Лани Американецот имаше учинок од 12,6 поени, 3,6 скока и 1,7 асистенција по 17 одиграни меча. Беше дел и од НБА составот на Индијана Пејсерс годинава во Летната лига во Орландо. Клубот од Сиена како замена за Лестер Бо МекКејлеб се обидува да го доведе Боби Браун од германскиот тим на Олденбург (просек 16,9 поени и 4,7 скока по натпревар во Бундеслигата).

Блејк Шилб ја продолжи соработката со француски Шалон за претстојната сезона. Крилниот американски кошаркар ланската сезона беше петти стрелец во лигата (16,6 поени). Во Еврокуп квалификациите имаше учинок од 17,5 поени, 2,0 скока, 4,5 асистенции по натпревар. Беше прогласен за најдобар играч (МВП) по освојувањето на францускиот куп лани. Претходно настапувал и за чешкиот тим на Нимбурк.

Антон Понкрашов останува во составот на ЦСКА Москва и во наредната сезона, втора по ред за него во овој тим. Ланската сезона во Евролигата постигнуваше во просек по 3,8 поени по натпревар. Тој настапуваше со репрезентацијата на последното Светско првенство во Турција 2010 година. (6,7 поени, 5,1 асистенции, 1,9 скок).

Шампионот во Еврокупот, украинскиот тим на Химки успеа да ги задржи Витали Фридзон и Дмитри Квостов за наредната сезона. Лани рускиот интернационалец Фридзон во Еврокупот постигнуваше 12,4 поени по натпревар, додека Квостов во руската лига имаше учинок од 2,2 поени и 1,6 асистенција по натпревар по одиграни 17 меча.

Како што пренесува официјалниот сајт на Билбао Баскет, Дарио Шариќ е нивни нов играч. Еден од најголемите европски кошаркарски таленти, Шариќ го напушта Загреб и е ставен потпис со шпанскиот клуб. Договорот ќе трае пет години, а првите две како позајмица ќе ги помине во хрватската екипа на Цибона.

 

[fidanmk]

Да потсетиме уште еднаш на календарот и мечевите за регуларниот дел од претстојната нова сезона во Евролигата 2012/2013.

 

[VardarVoSrceto]

fidan да не беше ти ништо немаше ништо да знам за европскиве тимови

 

[fidanmk]

fidan да не беше ти ништо немаше ништо да знам за европскиве тимови

фала за пофалбата......искрено Евролигата ја пратам, верувам и останатите фанови на ова натпреварување, темата како тема..ајде колку да се започне со нешто, со информации, трансфери..со македонските интернационалци МекКејлеб, Антиќ, Самарџиски што настапуваат во клубовите, подготовки,..ќе биде интересно и оваа претстојна сезона да се проследи...