Астрологијата, ако зборуваме за онаа што ја базира во хороскопите, се базира на 12 зодијачки знаци.
Што се тоа зодијачки знаци? Тоа се знаците низ кои Сонцето привидно „минува“ по својата замислена линија на небото.
Реалноста е ваква: Земјата кружи околу Сонцето, па за она соѕвездие, во кое Сонцето привидно се наоѓа, во однос на Земјата, се вели дека Сонцето е во тој „знак“, т.е. „во“ тоа соѕвездие.
Прва грешка во астрологијата: нема 12 „знаци“, туку 13.
Ако секое соѕвездие низ кое минува Сонцето го прогласиме за „знак“, тогаш хороскопот има 13 „знаци“ - недостасува Змијоносец, соѕвездие на еклиптиката (замислениот круг низ кој минува Сонцето; реално, рамнината по која Земјата кружи околу Сонцето), што се наоѓа меѓу Скорпија и Стрелец.
Втора грешка во астрологијата: сите „знаци“ не „траат“ по 1 месец.
Ако „траењето“ на еден „знак“ се дефинира како временски период во кој Сонцето „се наоѓа“ во тој „знак“ (т.е. се отсликува на небото како дел од соодветното соѕвездие), тогаш ќе се забележи дека во секој „знак“ Сонцето минува различно време, во зависност од тоа колкаво е соѕвездието, т.е. колкава површина опфаќа на небото. Така, ако земете астрономска карта, ќе видите дека соѕвездието Овен е многу мало, Риби е многу големо, Рак е најмало, Девица е големо, Бик е големо... А бидејќи, нели, брзината по која Сонцето се „движи“ по небото (т.е. со која Земјата кружи околу Сонцето) е константна (еден круг за околу 365.25 дена), не секој „знак“ трае подеднакво долго.
Трета грешка во астрологијата: пролетта не започнува „во“ Овен, туку „во“ Риби.
Како почеток на пролетта се зема пролетната рамнодневница - моментот кога денот и ноќта траат подеднакво. Во тој момент целата Земја добива подеднакво количество на Сончева светлина на сите нејзини делови.
Во времето кога се правел хороскопот на почетокот (пред векови и милениуми), точката на пролетната рамнодневница била „во“ Овен. Но, поради прецесијата на Земјата, оваа точка се менува.
[дигресија]
Што е прецесија? Замислете дека оската околу која ротира Земјата не е фиксна, туку дека *самата оска* кружи околу друга оска. Најлесно е ако замислите вртење на чигра (има ли македонски збор за тоа? Овој делува странски...), и ако замислите дека така ротира и Земјата.
Поради прецесијата, се менува северниот небесен пол. Во моментов, тој се наоѓа близу ѕвездата Северница (Polaris) во соѕвездието Мала Мечка, но за некои 12000 години, новата Северна Ѕвезда ќе биде Vega од созвездието Лира. Една прецесија, односно времето за кое оската на ротација на Земјата ќе заврти цел круг изнесува 26000 години.
[/дигресија]
Поради прецесијата, се менува и точката на пролетната рамнодневница, па така пролетта (а со самото тоа и првиот „знак“ во астрологијата) веќе не е Овен, туку Риби. Така ќе биде до 2012, кога точката на пролетна рамнодневница ќе „навлезе“ во соѕвездието Водолија, па тогаш Водолија ќе треба да стане првиот „знак“ на астрологијата.
Последица од ова е дека „знакот“ кој мислите дека е „ваш знак“, всушност не е... Ако сте се родиле „во“ Овен, во моментот на вашето раѓање Сонцето всушност се наоѓало „во“ Риби. Па така, можеби е пологично да читате што пишува не за „вашиот“ знак, туку за оној пред него.
Сето ова се реални, астрономски работи. Ако сака астрологијата барем малку да биде наука, ќе мора сериозно да се ревидира и да ги вклучи овие факти.
А за остатокот, дека ако некој човек „е“ Лав, тој е „доминантен“ и слични работи, на пример, не би сакал да дискутирам, зашто лично сметам дека е прилично неверојатно дека 1/12 од човештвото е изразито вакво, 1/12 е изразито онакво итн. Сите луѓе се збир на многу нешта (гени, средина, образование, желби...), па е невозможно да се определи каков ќе биде денот за некого, кого не го познаваме, ниту пак ни значи.
