Очекувам финале
Горан Пандев вечерва ќе се обиде да стане првиот македонски фудбалер што стигнал до финалето од елитното фудбалско натпреварување Лига на шампионите. Нашиот репрезентативец заедно со тимот на Интер гостува на „Камп Ноу“, против Барселона, во возвратниот меч од полуфиналето. По првиот меч Интер има предност од 3-1 над актуелниот европски првак. Доколку Интер ја одбрани предноста, Пандев ќе може да се подготвува да биде дел од големото финале, кое на 22 мај се игра на „Сантијаго Бернабеу“ во Мадрид.
Интер сезонава со Пандев во тимот има перфектен биланс со Интер во ЛШ. Струмичанецот дојде во зимскиот преоден рок, а досега ги одигра сите пет меча во нокаут-фазата и Интер на сите пет дуели победуваше. Овој пат на италијанскиот првак му одговара и реми, а „нераѕурите“ може и со пораз да се радуваат доколку тој биде со еден гол разлика. Пандев знае дека вечерва ги очекува пеколна атмосфера и тежок меч против актуелниот бранител на трофејот, но верува дека неговиот тим е способен да стигне до завршниот меч.
Горан верува дека Интер може во финале
- Не' очекува многу тежок меч на „Камп Ноу“. Имаме водство од 3-1, резултат кој од една страна е поволен и голем, но од друга е незгоден и бара максимална ангажираност. Сепак, верувам во квалитетот на мојата екипа.
Очекувам дека ќе играме во финалето, иако ќе биде многу тешко - вели Пандев во телефонското јавување пред да замине за Барселона.
Минатата недела за популарниот Гоче беше една од најсреќните како на професионален, така и на приватен план. Најпрво со Интер се радуваше на триумф против Барса, а ден потоа првпат стана и татко. Неговата жена Надица роди син, кој го доби името Филипо. Викендов Пандев паузираше во италијанското првенство. Поради ситна повреда на мускулот на ногата го пропушти дуелот против Аталанта. Повредата е санирана и македонскиот голгетер е подготвен да го даде максимумот и како стартер да ја брани предноста на Интер. Пандев беше стартер на четири меча, а само еднаш влезе како резерва.
- Имав проблеми со мускулот на ногата. Викендов мирував, но веќе се вратив на тренинг и подготвен сум да дадам се' од себе. О
чекувам да бидам меѓу стартерите - вели Пандев, кој има добри спомени против шпанските екипи.
Како член на Лацио пред три години во групната фаза од ЛШ, Пандев во два меча му даде три погодоци на деветкратниот европски првак Реал Мадрид. Сезонава во петте меча нема погодено во елитното натпреварување, но струмичанецот тоа не го загрижува многу. Пандев во Интер игра малку поповлечено и често добива и дефанзивни задачи од тренерот Жосе Мурињу. Најистурен во нападот е Диего Милито, а Пандев и Ето напаѓаат по крилните позиции.
Погодуваше против Реал, на ред е Барселона
- Не е битно кој ќе даде гол. Битно е Интер да обезбеди место во финалето. Тоа е нашата цел - заврши Пандев во рапортот од Милано. Интер вчера попладне со авион отпатува за Барселона.
Доколку успее да стигне до финалето, Пандев би бил третиот Македонец што ќе има шанси да заигра во финалето на најценетото клупско натпреварување во светот. Пред речиси две децении, во фокусот на вниманието беа
Дарко Панчев и Илија Најдоски. Овие двајца беа дел од тимот на Црвена звезда, која во 1991 година на стадионот „Свети Никола“ во Бари се радуваше на големиот пехар против Олимпик Марсеј. Тогаш Панчев го даде победничкиот гол од пенал, со кој звезда стана најдобар клуб во Европа за таа сезона.
