Тест – Citroen C4 1.6 - Погали ме нежно
Само седни, релаксирај се и уживај... Ова е појдовна точка на инженерите на Citroen уште од почетоците - од првите конструирани автомобили со двоен Chevron на маската...
Види фотографии
Напиши коментар
Иако, последните неколку години видовме многу предизвикувачки и спортски дизајни од Citroen, нешто што донекаде важи и за новата генерација на С4, повторно, крајната граница и цел е високата удобност, нешто што ниту еден конструктор не смее ни да помисли да го помине
Дизајн
Во поглед на надворешниот дизајн, новиот C4 не сака да биде екстравагантен како својот претходник, едноставно, сега формата максимално е посветена на фукцијата. Делува робусно, со забележително моќна и лута предна маска, но и со многу логично изведени страничен и заден дел – се во функција на поголема понуда на простор, прегледност и влез на светлина во кабината. Како кај Golf, на пример.
Многу значајно, C4 никако не потсетува на друг автомобил. Нема евтини дизајнерски трикови, па веројатно затоа има загарантирана безвременска убавина – автомобилот е убав како целина, тоа е она што е најбитно. Едноставно, се издвојува од толпата.
Вистинската иновација во поглед на дизајнот се забележува кога се анализира ентериерот, каде веднаш се забележува дека е напуштен принципот на централно поставена контролна конзола, па главните инструменти со поставени веднаш пред возачот, во една спортско - елегантна изведба, со изглед кој асоцира дека се работи за автомобил од повисока класа.
Она што новиот Citroen C4 со сигурност ќе му го донесе на секој свој сопственик е висок имиџ. Самиот ентериер кажува дека возачот сака да ги следи светските трендови и да биде во чекор со модата, нешто што го овозможуваат само премиум автомобилите... На новиот С4, веројатно повеќе би му одговарала и DS ознака, што не би можело да се каже за многу автомобили од неговата класа.
На пат
Перформанси
Бензинецот кој го имавме на тест, е позајмен од претходната генерација на С4. Има 120 КС и 160 Nm, извлечени од 1,6 литри зафатнина, благодарение на варијабилното отворање на вентилите. Како за атмосферски бензинец, го карактеризира задоволителна еластичност уште од пониските вртежи, иако за силни забрзувања бара да биде завртен малку повисоко, до црвенотo поле.
Бројките велат дека забрзувањето до стотка трае 10,8 секунди, додека максималната брзина изнесува 193 km/h. Ова се перформанси кои не се на нивото на турбо бензинците со слична сила, но сосема задоволителни дури и за излети на автопат. На светската промоција на новиот C4 минатата година, имавме можност да ги возиме и HDI и eHDI моторите – тука приказната е сосема поинаква. Тие се вистинскиот избор на мотори за овој автомобил.
Управливост/Удобност
Веќе најавивме, во поглед на удобноста, ова е класичен Citroen, дури и повеќе од тоа. И, не само што е удобен – овој модел поставува нови стандарди во класата, засрамувајќи дури и некои поголеми модели од повисоките класи. Суспензијата едноставно ги пегла дупките на патот, правејќи лажна претстава дека нашите улици се идеално рамни.
Удобноста е особено висока на автопат, каде патниците добиваат чувство дека пловат по патот – не се присутни ниту ситните вибрации, ниту големите осцилации на каросеријата. Возењето со новиот C4 претставува едно смирено и релаксирано искуство. Гарантираме дека голем дел од автомобилите од повисоката класа, особено оние што имаат поспортски апетити не нудат вакво ниво на удобност како C4. Автомобилот е како измислен за нашите улици.
За поздравување е дека овој Citroen не одзема данок кај возните својства. Се држи мошне солидно и безбедно на патот, иако малку повеќе се навалува во кривините. Можеби на динамичните возачи нема да им се допадне недиректното управување, но тоа е направено со цел за порелаксирано возење...
Едноставно, возачот на C4 повеќе е капетан на брод, а не F1 тркач.
Рафинираност
Во прилог на високата удобност, оди и извонредно високото ниво на рафинираност. Моторот е одлично придушен. Кога работи во место речиси и да не се слуша во внатрешноста, а особено импресионира недостатокот на звуци од надворешноста – едноставно, кога ќе се затвори вратата, се влегува во светот на тишината. На отворен пат звук од ветерот и од гумите се слуша само минимално, што секако го олеснува разговарањето во автомобилот.
Кај тест моделот, единствена забелешка е недостатокот на 6-ти степен на пренос, кој дополнително би придонел за уште потивко возење при повисоките брзини.
Високата рафинираност, карактеристична пред се за премиум автомобилите, ја надополнува и недостатокот на вибрации од моторот и подвозјето, што остава впечаток на цврсто и солидно изработен автомобил – голем напредок во однос на претходната генерација.
Во кабината
Простор/Практичност
Простор не недостасуваше ни во претходната генерација, но кај овој модел, особено на задната клупа, пространоста е речиси како во средната класа. Багажникот, со 408 литри е меѓу рекордерите во класата и има правилен, правоаголен облик, што го олеснува распоредувањето на товарот. Висока оценка за понудениот простор во внатрешноста особено доаѓа до израз ако во обзир се земат помалите надворешни димензии на С4 во однос на повеќето модели во класата.
Сепак, и покрај големата функционалност, заклучок е дека нема премногу места за одлагање ситници во внатрешноста (има само два држачи за пијалаци), а и оние што ги има се со помали димензии, што доведува до заклучок дека практичноста не е како кај најдобрите во класата. Задните седишта, иако се склопуваат, не прават рамен под, а забелешка е и дека кај тестираниот модел, (иако солидно опремен), недостасува потпирач за раце на задната клупа, нешто што дополнително би ја зголемило удобноста.
Ергономија
Како никогаш досега во Citroen, зад управувачот на С4 чувството е како во некој кокпит. Средната конзола е благо свртена кон возачот, што го олеснува работењето со командите, кои се многу интуитивно изведени, со големи и читливи копчиња.
Интересно, инженерите во Citroen се одлучиле голем дел од командите да ги вградат и на самиот управувач – толку копчиња на управувачот се чини имаат само уште F1 болидите. Ова бара подолго време за навикнување, но штом се научат командите, рацете речиси и да не се тргаат од управувачот.
Високата ергономија ја надополнува и лесното наоѓање на идеалната позиција – управувачот и седиштето се подесуваат во сите правци. И прегледноста е одлична, иако, карактеристично за класата, задното стакло е многу мало и не овозможува добар видик назад.
Опрема
Од двозонска автоматска клима, преку целосно опремен аудио систем (USB+AUX) и целосна електрика, до сензори за дожд – тестираниот модел беше опремен како премиум модел. И основниот модел не треба да се срами – нуди мануелна клима, електрика на предни стакла, централно со далечинско, 8 воздушни перничиња, радио со CD+MP3 и 6 звучници...
Моделот кој го имавме на тест, со 1,6 литарски бензинец со 120 КС и Seduction ниво на опременост вклучува: ABS + REF + AFU, предни воздушни перничиња за возач и совозач напред, странични воздушни перничиња, воздушни перничиња во вид на завеси напред и назад, светла за магла напред со странично осветлување, регулатор / ограничувач на брзина со меморирање, ESP, централно заклучување со далечинско управување, варијабилен серво управувач со висинско и длабинско посдесување, автоматско придружно осветлување - follow me home, електрика на предни стакла со секвенцијално подигнување и заштита од штипнување, електрика на задни стакла со секвенцијално подигнување и заштита од штипнување, повеќефункционален борд компјутер, надворешни ретровизори со електрично подесување, возачко седиште со висинско подесување, совозачко седиште со висинско подесување, кожен волан, аудио систем CD RDS MP3 6 Hp со команди на волан и приклучок на централна конзола, рачки на вратите во боја на каросерија, ПAKET "Автоматска клима" - автоматски клима уред, сензор за дожд и светло, регулатор / ограничувач на брзина со меморирање, внатрешен полихрон...
Во највисокото ниво на опрема, C4 нуди и 220V приклучок, што за сите tech-зависници е како измислено – за крај на грижите за полна батерија на мобилен, лаптоп или фотоапарат.
Финансии
Трошоци за купување и одржување, потрошувачка
Моделот кој го имавме на тест, со 1,6 литарски бензинец со 120 КС и Seduction ниво на опременост, чини 16.990 евра. Со оглед на извонредно високото ниво на опрема, цената и не е толку висока, иако постарите модели на пазарот, благодарение на попустите, веќе се поевтини од новиот С4. Но, Французинот е нов модел на пазарот, кој припаѓа високо на врвот на класата, па за очекување е да има и малку повисока цена.
Потрошувачката на тестираниот мотор, според фабричките податоци, изнесува 6,2 литри во просек, односно 8,8 во град и 4,7 на отворено. Реалните бројки не се многу далеку од фабричките, па потрошувачката во град изнесува околу 9,5 литри, а на отворено околу 5,7 литри во просек. На тестот, во просек потрошивме 7 литри гориво на 100 km. Мерено по брзини, при константно возење со 70 km/h, потрошувачката изнесува 4,6 литри, односно 5,5 литри при 90 km/h, 6,8литри при 120 km/h и 7,8 литри при 140 km/h. Се забележува дека потрошувачката е нешто повисока при повисоките брзини, што веројатно се должи на недостатокот на шести степен на пренос.
Квалитет, доверливост и повратна вредност
Од каде и да се погледне, новиот С4 зрачи со квалитет и оддава чувство на премиум автомобил. Внатрешноста е облечена во најквалитетните материјали, а обработката и вниманието на деталите се извонредни. Однатре, тешко е да се каже дека се работи за автомобил од компактната класа.
А, и според последните истражувања, Citroen има доста добри резултати во однос на доверливоста и задоволството на купувачите. Најавите од компанијата се дека доверливоста ќе биде уште понагласена кај новата С4-ка, особено заради целосно високиот квалитет на изработка.
Во поглед на загуба на вредност, во Македонија С4 не доживува голем пад на цените како на странските пазари, но факт е дека се уште не држи цена како јапонските конкуренти или VW на пример.
Безбедност
Чисти пет ѕвездички и високи резултати во скоро секој поединечен дел на тестирањето на EuroNCAP, јасно укажуваат дека Citroen е и натаму еден од лидерите кога е во прашање безбедноста.
Заклучок
Со фантастично високото ниво на удобност и рафинираност, и секако извонредна кабина и веќе докажани HDI Мотори, Citroen C4 ќе ги задоволи сите љубители на смиреното и штедливо возење.
Навистина, С4 нема да го дигне адреналинот како подинамичните конкуренти (Mazda 3 на пример), но како чист крстосувач, му нема рамен во класата! Тренд е сите автомобили во класата да бидат поудобни од своите претходници, факт кој го докажуваат голем дел од главните играчи во класата (и Focus, и Golf VI и Astra). Високата удобност, без сомнение, најсилно е изразена кај новата C4-ка.
Ако размислуваме за кого најмногу одговара еден ваков удобен и смирувачки автомобил, првата помисла би била постарите возачи и секако семејствата, но... Без разлика на возраста, секој би посакал едно нежно галење и милување, нели? И, секако чувство дека секој ден има парламентарни избори, па дупки на патиштата има се помалку.
Предности:
• Извонредно високо ниво на удобност
• Премиум рафинираност
• Пространа внатрешност и напред и назад
• Супер квалитетна внатрешност
• Високо ниво на ергономија
• Робусен, динамичен дизајн
• Голем, употреблив багажник (со оглед на класата)
• Богати нивоа на опременост
Недостатоци:
• Недоволно директно и прецизно управување
• Функционалноста не е на нивото на најдобрите во класата
• Кај 120 КС бенсискиот мотор недостасува шеста брзина – дополнително ќе ја намали бучавата и потрошувачката на повисоки брзини
• Барем засега (јуни 2011), цената е меѓу највисоките во класата
Извор: koli.com.mk
Како и да е, за наш стандард, солено 
