Предлогот со три имиња влегува во игра
Сложено име за Македонија, кое би се употребувало во односите со Грција и во меѓународните организации,а уставното име за билатералните односи со земјите што го признаваат, бил нацрт-предлогот за решение за името со кој шпекулираат грчките медиуми
Весникот „Катимерини“, повикувајќи се на дипломатски извори, вчера објави дека ова е предлог на американскиот Стејт департмент и дека се очекува државната секретарка Кондолиза Рајс да и' го претстави на грчката шефица на дипломатијата Дора Бакојани, на 14 февруари, во Вашингтон. Според информациите на весникот, ваквиот предлог ќе биде одбиен бидејќи Атина веќе соопшти оти се залага за едно име за Македонија за сите употреби. Во врска со предлогот, грчките дипломати изјавија дека се обидуваат да го решат проблемот, а не уште повеќе да го усложнат. Тие оценија дека Атина ќе мора да се изјасни против предлогот, иако очекува огромен притисок да го прифати. Извори на „Дневник“ велат дека има невиден притисокот врз целиот процес и дека сите „играчи“ во меѓународната заедница сакаат да се најде решение. Тие претпоставуваат дека посредникот во преговорите Метју Нимиц ќе излезе со нов предлог, но не се знае кога. Според неофицијалните информации од грчкото МНР, Нимиц би ги закажал наредната рунда преговори во Атина помеѓу 18 и 22 февруари. Во меѓувреме, грчката офанзива на Балканот продолжува. Премиерот Костас Караманлис во Љубљана добил уверување од својот домаќин Јанез Јанша дека Словенија сака, со компромис, да се реши прашањето за името. - Во интерес на Македонија е да постигне компромис. Времето за тоа е дојдено, бидејќи во блиска иднина ќе се носат историски одлуки и би било срамно за една земја да го пропушти тоа зашто не е флексибилна - изјавил Јанша по средбата со Караманлис. Тој побарал македонските власти да се „ангажираат во сериозни разговори“ за да се постигне „конструктивен компромис“.
Караманлис повторил дека ставот на Грција е добро познат.
- Ние сакаме решение за името што нема да значи пораз или победа за која било страна, но земјата мора да биде подготвена за компромис ако сака да му се приклучи на европското семејство - изјавил тој.
izvor:dnevnik.