<H1>Океан за светот, капка за нас</H1>
Претпоставките за нашето место во светска приказна наречена 250 илјади документи од Викиликс се дијаметрално спротивни (како и сé друго) и се движат од тоа дека нема да има ништо важно до тоа дека деновиве ќе бидеме многу потресени
Шекспир напишал „многу врева за ништо“, балканските народи рекле „се тресеше гората, се роди глушец“, а Викиликс објави дека американскиот помошник-државен секретар Филип Гордон се сретнал со француски дипломати, со кои разговарал дека и Македонија и Грција треба да направат отстапки за да се реши спорот за името. Од дури 250 илјади тајни документи на американската дипломатија што протекоа од пет чешми и предизвикаа поплава од реакции низ светот, нас ни го донесоа само ова. Барем во првиот ден откако почна новиот „проток“ не се остварија најавите дека ќе се изнесат тајни за кризата во 2001 година, за грчкото учество во неа, досега непознати факти за македонско-грчкиот спор или „страшни информации“ за сегашната влада. Од целиот океан што истече во светот, кај нас, барем засега, падна само една капка.
Имаше информација дека 522 од овие документи дошле од Скопје. Не се открива што пишува во другите 521 и дали тој за споменатата дипломатска средба во Париз е објавен по случаен избор или бил издвоен како најинтересен. Петте светски весници што ги добија документите велат дека најголемиот дел од нив се рутински и воопшто неинтересни. Во Македонија, пак, претпоставките за нашето место во оваа светска приказна се дијаметрално спротивни (како и сé друго) и се движат од тоа дека нема да има ништо важно до тоа дека деновиве ќе бидеме многу потресени.
Така, додека документите од Викиликс ги потресуваат големите (САД, Кина, Франција, Германија, Русија, Турција, Саудиска Арабија, Иран), но и малите играчи (Словенија, Кирибати, Бугарија), ние повторно останавме со прашањето дали воопшто сме дел од екипата? Дали во 250 илјади пораки што меѓусебе си ги размениле американските дипломати се споменуваме само еднаш? Или, малку поинаку формулирано, дали ова открива дека во суштина никој не се занимава со нас, освен повремено и попатно? Ако не излезе некој посериозен документ, тоа би било шокантното сознание за Македонија од Викиликс.
Но од друга страна, со што би биле интересни? Единствено меѓународно прашање со кое се занимаваме и како држава и како општество е нашето - оспорувањето на името Македонија од Грција. Не сме слушнале дека имаме став за кризата во еврозоната, за иранската нуклеарна програма, за блискоисточниот конфликт, за војните во Ирак и во Авганистан (во кои учествувавме и учествуваме), за планираниот антиракетен штит, за непостигнувањето климатски договор или за кој било друг проблем со кој се занимава светот. Овие информации ни доаѓаат и ни проаѓаат речиси без да ги забележиме. Немаме никакво влијание врз ниту еден регионален процес, а не се наоѓаме ниту на светската бизнис-мапа ако ги погледнеме странските инвестиции и присуството на големите компании кај нас.
Некои велат, сме биле отсечени од светот, па дури и светот бил отсечен од нас. Но, според нашето присуство во светската комуникација, може дури и да се изведе заклучок дека сме отишле едно ниво понатаму, сега се наоѓаме на друга планета, на безбедна оддалеченост од Земјата. Државата можеби 17 години има привремено име, но планетата во која живееме и дејствуваме постојано си ги менува имињата. Сега таа се вика „Перо Наков без број“, претходно се викаше „Надеж“, па пред тоа беше обележана со шифрата „1995“ итн. Во место што толку често се преименува, времињата се секогаш бурни, доволно динамични за да заборавиме дека постои нешто и надвор од овде, но недоволно драматични за некој однадвор да ги забележи.
Допрва ќе видиме дали нашето „отсуство“ било добро или лошо. Ако американските дипломати нé изоставиле само затоа што нашите случувања не се доволно интересни, тоа е добро, според логиката дека лошата вест е добра вест. Но ако сме биле тргнати настрана затоа што нé сметале за безначајни, треба навистина сериозно да поработиме на нашиот имиџ.
Автор: Гоце Трпковски
http://www.novamakedonija.com.mk/NewsDetal.asp?vest=113010102736&id=13&prilog=0&setIzdanie=22146
