Зависниците од владините кампањи и реклами конечно можат да здивнат.
Следи нов серијал од нивната омилена серија "
Дупење у здрав мозок"
Имено:
Уште милиони - за уште кампањи!!
Владата потрошила нови 4 милиони евра од државниот буџет за да ги убедува граѓаните дека не се во криза, да ги „натера“ да бидат оптимисти, да ги научи да не пушат, да не пијат, да не абортираат, но да читаат книги и отпад да фрлаат во канта. Станува збор за седум кампањи од вкупно над 15 што беа најавени лани, а огласите беа распишани пред крајот на годината. За сите кампањи, договорите со четирите фирми што ги добиле главните огласи биле склучени на 17 март годинава, сред изборна кампања и во екот на најголемата економска криза.
Кампањите за борба против алкохолизмот, етика и етичко однесување, објаснување на последиците од абортусот, борба против пушењето, поттикнување на граѓаните да читаат книги, јавна чистота и отпад и за оптимизам и почитување на добрите вредности, најверојатно, веќе се готови. Тие наскоро треба да се објават во медиумите и да ги бомбардираат граѓаните со нови информации за подигнување на јавната свест. Вкупната вредност на сите кампањи е над 4 милиони евра, а секоја поединечно, наместо во рамка од 400.000 евра како што појасни премиерот Никола Груевски, чинат по околу 600.000 евра.
Добитници на главниот колач од огласите се четири домашни компании, кои сред изборна кампања „ќариле“ во просек по 1 милион евра. Најмногу се усреќиле во фирмата „Ин маркетинг“, која се јавува како добитник на носечкиот оглас на три кампањи. Освен за кампањата за оптимизам и добро однесување, за која „Дневник“ веќе пишуваше, фирмата ги добила и кампањите за етичко однесување и за јавна чистота и отпад. Се работи за вкупно над 1,5 милион евра доделени на истата фирма. Од фирмата открија дека веќе ги изработиле и двете владини кампањи што беа лиферувани лани за јавните кампањи за информатичко општество и спот за кампањата за поттикнување на толеранцијата, за кои нема информации колку пари добиле. Втора на листата со добитници е фирмата „Маркет вижн“, која г работи кампањите за борба против пушењето и за поттикнување на граѓаните да читаат книги. По еден главен оглас добиле фирмите „Омега комуникации“ и „Њу момент Њу идеас“ - кампањата за борба против алкохолизмот, односно за објаснување на последиците од абортусот. На сите сите кампањи се вртат имињата на вкупно осум фирми, од кои некои добиле и помал дел од колачот.
Покрај носечката набавка што ја добива една фирма за изработка на лого, дизајн за ТВ-спот, радиоспотови, постери, летоци, билборди, стратегија за односи со јавноста, медиумски план и закуп на медиумски простор, Владата од дополнителните добитници бара повторно изработки на нови ТВ-спотови, билборди и слично.Од Генералниот секретаријат на Владата ниту вчера не добивме одговор за деталите од кампањите ниту кога тие ќе се појават во етер.
Во антикорупциската комисија неодамна информираа дека веќе ги чешлаат набавките за неколку владини кампањи објавени лани во изборниот период за кои добиле информации од Владата. Станува збор за три-четири кампањи спроведени лани за кои комисијата ќе испитува дали се дел од годишната програма за работа на владата, дали за нив има однапред предвиден буџет, за кој период се планирани набавките, а посебен акцент ќе стави на тоа дали некоја фирма добила повеќе владини тендери. Особено индикативни се случаите кога една фирма добива повеќе огласи - изјави Мирјана Димовска, претседател на антикорупциската комисија.
Невладините организации што се занимаваат со оваа проблематика побараа не само морална и политичка,
туку и кривична одговорност од Владата поради „неразумното“ трошење на парите на народот во текот на изборна кампања и сред економска криза.
Огласите, поради притисокот од јавноста, сега се објавени на веб-страницата на Бирото за јавни набавки. Покрај овие седум кампањи, објавени се и делумни информации за кампањите за борба против корупцијата, за која само за ТВ-спот се доделени 12.500 евра, како и за кампањата „Истражи ја Македонија“ за која е склучен договор вреден 182.000 евра.
Линк
