10 ноември, (Нетпрес) - Неколку десетици илјади заштитни маски се продадени во аптеките ширум Македонија. Само во аптеките на “Зегин“ во текот на вчерашниот ден се продале околу 12 илјади маски. Најголемите синџири на аптеки велат дека имаат доволно количини на резерви и секојдневно набавуваат нови.
“Потрошувачката е зголемена многу. Дванаесет илјади маски се продадени само вчера. Секојдневно набавуваме нови количини поради зголемената потрошувачка и наметнатата динамика“, вели Викторија Механџиска, менаџер за големопродажба во “Зегин“
Енормно зголемување на потрошувачка на заштитните маски во последниве неколку денови забележале и од Здружени аптеки на Македонија. Од таму велат дека немаат точни бројки колку маски се потрошени, но поради состојбата со новиот грип постојано се снабдуваат со нови количини.
“Токму денеска треба да ни пристигне голема количина на заштитни маски бидејќи гледаме постојано да имаме доволно заштитни маски“, вели Ана Димитровска од ЗАМ.
Од двете компании велат засега цените на заштитните маски остануваат исти и покрај големата побарувачка,. Не планираат да ја зголемат, освен во случај тоа да го направат компаниите од странство од каде се набавуваат заштитните маска.
Во моментов во најголем дел од аптеките цените на маските се движат од два па се до 45 денари за една маска во зависност од производителот.
