Летниот трансфер-период почнува на 30 јуни, а Реал Мадрид, според последните информации, го ангажираше и четвртото засилување за следната сезона. По Шахин, Алтинтоп и Калјехон, најнова аквизиција на „кралскиот“ клуб е Фабио Коентрао од Бенфика. Барем засега, Жозе Мурињо не се засили на позициите каде што најмногу му е потребно. До овој момент, трансфер-политиката на клубот не ветува дека следната сезона Реал ќе може да ѝ парира на Барселона и конечно да дојде до шампионскиот пехар. Летото е долго, а на „Сантијаго Бернабеу“ сигурно ќе пристигнат уште неколку нови имиња, но сега да направиме краток осврт на оние фудбалери кои веќе потпишаа договор со „кралевите“.
Првиот што потпиша беше Нури Шахин од Борусија Дортмунд. Засега единствениот паметен потег на управата на клубот. Млад плејмејкер пред кого претстои блескава иднина и кој го чинеше клубот „само“ 12 милиони евра. Второто засилување беше сонародникот на Шахин, Хамит Алтинтоп, од Баерн Минхен. Сите што го следат Реал Мадрид, а и фудбалот воопшто, беа зачудени од оваа аквизиција на мадриѓани. Иако Алтинтоп е квалитетен фудбалер, но дали на клубот вистински му е потребен овој играч, кој постојано беше резерва на „Алијанц арената“. На позицијата крилни напаѓачи Реал во тимот веќе ги има Кристијано Роналдо, Анхел ди Марија, Педро Леон, а тука можеме да го вброиме и Гранеро, иако Мурињо се обидува да го претвори во играч за врска. Третото засилување на Реал беше уште поголемо изненадување. Калјехон ги мина сите младински категории во Кастилија, но не доби шанса ниту еднаш да го облече белиот дрес на „кралевите“. Му беа потребни три години докажување во Еспањол за да биде забележан од неговиот матичен клуб. Овој фудбалер исто така игра на позицијата крилен напаѓач.
Последната аквизиција се вика Фабио Коентрао. Португалецот е фантастичен лев бек, но Реал Мадрид на оваа позиција веќе го има Марсело, кој оваа сезона демонстрираше неверојатен фудбал. Очигледно, на Перез парите не му се проблем, бидејќи е подготвен да купи 22 милиони евра вреден резервен лев бек. Можеби пресметките на Реал Мадрид велат дека подобро е овие фудбалери да ја греат клупата на „Сантијаго Бернабеу“, отколку да играат против Реал Мадрид. Ако ги погледнеме трансферите на Реал Мадрид од изминатите неколку сезони, историјата ја потврдува претходната констатација. Естебан Гранеро од Хетафе дојде во Реал пред две сезони, истото лани го направи и Педро Леон, а Серхио Каналес беше купен од Расинг. Заедничко за овие фудбалери е што беа најдобрите играчи на своите тимови. Хетафе лани успеа да заврши на шестата позиција во Примера, а во оваа едвај успеа да избори опстанок. Реал Мадрид го има можеби најсилниот тим во светот, а единствените позиции каде што се потребни освежувања се нападот и во централниот дел од дефанзивата. Со досегашните засилувања на Реал, Барселона е сигурен владател во шпанскиот фудбал.