Нема веќе лесни пари
Новиот правилник за наградување на фудбалската репрезентација ќе предвидува награда според крајниот учинок. Ако избраниците на Јонуз успеат да се пласираат на ЕП, за нив е предвидено да поделат 40 отсто од бруто-приходот на ФФМ за тој пласман или минимум три милиони евра
Македонските фудбалски репрезентативци во наредниот квалификациски циклус ќе треба да заборават на лесните пари добиени како премија за победи против аутсајдерите во групата. Во сите циклуси досега, избраниците од А-тимот добиваа големи пари за победа над селекции како Андора, Исланд, Естонија... Од касата на ФФМ се одлеваа стотици илјади евра, а на крајот сé се сведуваше на освојување на 4. место во групата.
Пред пријателскиот дуел со Црна Гора минатата среда, кој Македонија го доби со 2-1, во неврзан разговор бил опипан пулсот кај репрезентативците за оваа промена. Немало никакви реакции, напротив, избраниците на Мирсад Јонуз самите потврдиле дека за наредниот квалификациски циклус наградите треба да им бидат според учинокот.
Начелно, договорено било премиите да се условни, но за детаљните суми воопшто не било ниту спомнато. Тоа треба да се случи на наредниот собир на А-тимот, во мај, кога и гостуваме на Бугарија. Според најавите, репрезентативците ќе бараат премии и за освоено трето место, иако тоа не води на Евро 2010, но сепак, ќе биде голем напредок од сé досега. Нормално, наградите за првите две места (макар испаднале и во бараж) ќе бидат многу „сочни“.
Во минатиот циклус за премии исплатени 300.000 евра!
Репрезентативците што на последните квалификации за СП во Јужна Африка завршија на четвртото место добија вкупно околу 300.000 евра премија за двете победи и едното реми во групата за пласман на Мундијалот. Според правилникот, кој пред тие квалификации го договорија фудбалерите и раководството на ФФМ, за секоја победа играчите добиваа по 5.000 евра, а за секое реми по две илјади помалку. Бидејќи за секој меч на списокот има повеќе од 20 фудбалери, а заедно со стручниот штаб бројката оди до 30, сумата што ја исплаќа ФФМ за победа изнесува повеќе од 100.000 евра по меч, додека за реми сумата до 60.000 евра.
Премијата од по 5.000 евра за победа ја добиваа првите 11, како и резервите, заедно со членовите на стручниот штаб (селектор и трите асистенти). Седумдесет отсто од сумата добиваа резервите што не влегле во игра, а 50 отсто тие што останале на трибините. Затоа и сумата што се исплати е огромна, не само за македонски услови. Потоа, ако се земе фактот дека сите фудбалери, тренери, физиотерапевти, лекари, добиваа по 500 евра за повикот во националниот тим, тогаш секој меч од старт ја чинеше ФФМ 15.000 евра.
- Нема веќе таков начин на наградување. Тоа било порано и веќе нема да важи. Сега ќе се направи нов правилник, заедно со репрезентативците, според кој, нема да се премира секоја победа или реми. На крајот ќе се наградува според освоеното место во групата - најавува Јонуз.
За пласман на Евро 2012, ФФМ би добила 7,5 милиони евра
Тој вели дека, на сите многу добро ќе им се исплати пласман погоре на табелата од досегашниот (секогаш завршувавме четврти, а двапати и петти), а за освојување на второто место и одење во баражот, фудбалерите би добиле уште повеќе пари. Одење пак на ЕП, би било суперпремирано.
- Дај Боже да се пласираме на Евро 2012 година, тогаш 40 отсто од вкупниот приход на ФФМ ќе биде издвоен за премии на фудбалерите и на стручниот штаб. Се разбира дека ќе се награди и учество во баражот, во случај ако тогаш испаднеме, а ќе има награда и за третото место. Но само до таму - коментира шефот на националниот тим.
УЕФА, секоја федерација што со својот тим ќе обезбеди пласман на ЕП ја наградува со по 7,5 милиони евра. Ова значи дека со пласман на ЕП минимум три милиони евра би биле наградите за играчите и за стручниот штаб, кои парите би ги делеле во зависност од минутажата мината во квалификациите.
Ваквиот начин на наградување е одамна познат во европските земји. Ретко се наградуваат фудбалерите за победа или за освоен бод. Во изминатите два циклуса, фудбалерите како премија добија над шестотини илјади евра, а не „понудија“ ништо освен краткорочна радост (реми со Англија, победа против Шкотска...).
Неатрактивната група може да ги намали и дневниците?
Сега, како никогаш досега, најавите од куќата на фудбалот се дека во наредниот циклус премиите нема да бидат врзани за секој натпревар, туку за пласманот на крајот од квалификациите. Ова е така поради лошата финансиска група во која паднавме и од која не може да се заработи многу пари од ТВ-правата. Ниту Русија, а уште помалку Словачка, не се интересни за тој пазар, Република Ирска можеби ќе донесе некој денар повеќе, но тоа би било сé за овие две години.
Поради тоа, ФФМ ќе мора да го стега ременот и да не попушта под притисоците. Затоа, најавено е дека ќе се намали и сумата што за повик ја добиваа фудбалерите, па наместо 500 евра, таа во иднина би била најмалку двојно помала.
http://www.novamakedonija.com.mk/NewsDetal.asp?vest=39101116474&id=19&prilog=0&setIzdanie=21929
,а и прееска кај ја даваја најавата збореја нешто за коцкарски долгови на секретарот што се плаќалe од касата на ФФМ
