КРАЈ НА ДИЛЕМИТЕ
Симиќ останува во Фершпед Работнички
Високиот центар се согласи на обновување на соработката за уште една сезона.
Веќе дилеми нема. Ако и ги имаше, сега веќе ги нема. Тони Симиќ и во следната сезона ќе го носи дресот на Фершпед Работнички.
Иако имаше и други и тоа како сериозни понуди, пред с$ онаа од екипата на Фени Индустри, високиот центар по доста двоумење се реши.
"Останувам во Градски парк. Тоа е мојата одлука. Не ми беше нималку лесно овои денови, особено што имав понуди и од други клубови. Но, одлучив дека најдобро за мене во овој момент е да останам верен на Фершпед Работнички"- потврдува Симиќ.
Не е тајна дека Фени Индустри сериозно "загриза" да го донесе Симиќ во Кавардарци?
"Точно е дека имаше сериозен интерес од нивна страна. Дури и бев во Кавадарци да се запознаам со условите за играње. Понудата беше од оние за кои вреди да се размисли. Но, пресуди тоа што сепак Скопје е мој град, во кој сум навикнат на многу работи. Тука ми е и семејството. Мора да се земат предвид и годините. Не е лесно да менуваш некои навики. Се чувствував одлично во Фершпед Работнички сите овие години наназад. Тешко е да се разделиш со сето тоа на што си се навикнал. Ги известив луѓето од Фени Индустри за мојата одлука. Се надевам дека ќе ме разберат во целост"- дополнува високиот центар.
Освен "големината" на Фершпед Работнички, се чини дека дополнителни мотиви кај Симиќ донесува и одлуката на клубот да игра во Јадранската лига и најверојатно во ФИБА- Еврокупот?
"И тоа е важен фактор. Па кој не сака да игра во НЛБ лигата или во ФИБА- Еврокупот. Јас такви играчи не познавам. Добив уверување дека раководството на клубот ќе направи екипа која 'ќе се прошета' во домашното првенство, и ќе има што да каже и во овие натпреварувања, што исто така е битно за моето останување во Градски парк" - заклучува веројатно и идниот капитен на "шпедитерите".
СE ПОИЗВЕСНА СТРАНСКА ТРЕНЕРСКА ВАРИЈАНТА ВО "ГРАДСКИ ПАРК"
Арсиќ најблиску до клупата на Фершпед Работнички?
Голем број тренерски имиња се "свртеа" деновиве наназад кога е во прашање испразнетото место во Фершпед Работнички по оставката на Јорданчо Давитков.
Иако беше најавувано дека решението можеби ќе биде "Маде ин Маседониа", како што сега стојат работите во Градски парк, извесно е дека тоа ќе биде побарано "од надвор".
Преодниот рок се наближува, а тоа веќе е знак за опасност во Градски парк каде има и (пре)голем број отворени прашања кои чекаат свој одговор.
Се чини дека и петокот е номиниран како "дедлајн" кога е во прашање одлуката на "шпедитерите" за тоа кој ќе ја има тренерската функција во следната натпреварувачка сезона во која како се чини, Фершпед Работнички ќе игра на четири фронта, два домашни и два европски.
С$ потешка е варијантата во Градски парк да се врати Марин Докузовски. Во моментов трофејниот стручњак е во Софија каде ја чекува "разврската" со Лукоил Академик.
Но, реално е и за очекување, Докузовски и понатаму да биде дел од "академиците", особено по новата двојна круна која ја освоија и во минатата сезона.
Од претходно споменуваните, Александар Тодоров исто така има намера да продолжи со кариерата "надвор" од Македонија, односно да продолжи со работата во Турција во некој друг клуб, можеби и надвор од Анкара.
Сашо Филиповски и Боби Митев продолжуваат со работата во полскиот БОТ Туров.
И сето ова наведува на логичен заклучок тренерот да биде странец, посебно ако се знае дека од "слободните тренерски агенти" во Македонија, барем од онаа прва категорија, може да се смета на Марјан Лазовски, па и на Горан Крстевски, кој лани имаше странско "искуство" (како асистент во ЦСКА).
Но, за верување е дека "шпедитерите" ќе се одлучат за првата странска варијанта.
А барем според последните најави, најблиску до клупата е Јовица Арсиќ, доскорешниот шеф на стручниот штаб на Здравје од Лесковац.
Име кое значи доста и во српската кошарка. Тренер кој во моментов е слободен по заминувањето од Лесковац, кој ги познава условите кај нас, посебно македонскиот баксет-менталитет.
Освен тоа Арсиќ има и свое тренерско "педигре", на пример лани ја предводеше јуниорската селекција на Србија и Црна Гора на ЕП во Грција, каде го освоија 5. место.
Оваа зима Арсиќ беше еден од најсериозните кандидати да го преземе кормилото на сениорската репрезентација на Бугарија, но "загуби на поени" од Валентин Папазов.
Дали ќе дојде до договор со нашиот најтрофеен кошаркарски колектив, ќе биде познато најверојатно до крајот на оваа работна недела, до почетокот на летниот трансфер период.
www.sport.com.mk
