Министерството за образование не ферма повеќе од 20 факултети, универзитети и институти
Најмалку 23 универзитети, факултети или институти го направиле „сол“ предлогот за државен испит на Министерството за образование и наука. И покрај нивните мислења кои следеле непосредно по масовните протести на 16.000 студенти, владата пред една недела, во викенд-време, го усвои предлог-законот за државен испит.
„Плусинфо“ дојде до богата документација која содржи мислења од 23 факултети, универзитети или институти за државниот испит, а во која за ваквото тестирање, академската заедница тврди или дека е спротивно на Болоњскиот процес, или дека е противзаконско или дека е неизводливо.
Деканот на Архитектонскиот факултет Минас Бакалчев до ректорот на Универзитетот „Св. Кирил и Методиј“, Велимир Стојковски испратил допис во кој го информира дека Наставно-научниот совет на овој факултет, за предлогот за државен испит на Министерството смета дека е во спротивност на Законот за високо образование, академската слобода, слободата на студирањето и проверката на знаењата на студентите.
Архитектонскиот факултет смета дека државниот испит не може да е паралелен на образовниот процес, дека е во спротивност на Болоњскиот процес, дека не ја отсликув природата на специфичните студиски програми и дека ќе го дезинтегрира континуитетот и повеќеслојноста на образовниот процес.
„Предложениот државен испит претставува исклучиво квантитативна форма на испит кој ќе го дефокусира постојниот образовен процес и ќе ги супституира и симплифицира воспоставените начини и модели на учење. Во таа смисла образованието ќе се насочи единствено на содржините на државниот испит како единствен инструмент за верификација на знаењата и стручноста. Врз основа на прикажаните согледувања, последователноста, а не паралелизмот на образовниот процес и државниот испит, спротивноста на принципите на Болоњскиот процес и континуираното оценување, специфичноста на студиските програми и интегритетот на образовниот процес, Наставно-научниот совет го смета предложениот концепт на државен испит за несоодветен и упатува на постоечките механизми за зголемување на високообразовната дејност“, констатирал наставно-научниот совет на Архитектонскиот факултет.
Тој не е единствениот факултет кој има ваков став за државниот испит. Наставно-научниот совет на Факултетот за електротехника и информациски технологии во Скопје, на седница исто така заклучик дека воведувањето на државен испит за студентите, нема да даде придонес во подигнувањето на нивото на квалитетот во високото образование.
„Државниот испит нема да даде објективна слика за знаењата на студентот, особено за студентите кои студираат технички науки. Тест составен од прашања со можни одговори не соодветствува на модел за проверка на стекнатите знаења на високообразовните институции. На техничките факултети проверката на знаењата се состои од различни форми, како парцијални испити, домашни задачи, лабораториски вежни, проектни задачи, активности на час итн. Државниот испит не е применлив и на втор и трет циклус студии, каде што знаењето и резултатите се верификуваат на сосема поинаков начин“, утврдиле на ФЕИТ.
Во дописот од деканот Миле Станковски пишува дека ФЕИТ за подобрување на квалитетот на високото образование предлага Одборот за акредитација и евалуација и инспекциите потполно и принципиелно да работат, а се наведува и дека финансирањето на државните високообразовни институции не е на потребното ниво.
На Природно математичкиот факултет институтите за географија, математика, хемија, физика, биологија, етнологија и антропологија го отфрлаат концептот. Во нивните засебни ставови провејуваат квалификациите „упад во автономијата“, „спротивен на Болоњскиот процес“ итн.
„Предлогот за воведување државен испит е заснован врз ненаучни, непрофесионални и некомпетентни податоци. Воведувањето државен испит според замислата на владата засега позната главно преку информацијата на МОН, е флагрантно кршење на академските слободи и директно нарушување на автономијата на универзитетот што е неприфатлив концепт во демократските општества“, заклучиле на Институтот за етнологија и антропологија.
Економскиот факултет се изјаснил дека државен испит на прв циклус студии не може да го подобри квалитетот, а за државен испит во втор циклус на студии изразил чудење.
„Сакаме да укажеме дека вака предложениот модел воопшто не постои, односно истиот не е изводлив и е неспроведлив зашто на овие студии не се полагаат класични испити туку кандидатите навлегуваат во методологија на научно-истражувачката работа и истражуваат одредени подрачја договорени со менторот согласно темата за истражување“, напишале од Економски факултет.
Правниот факултет утврдил дека државниот испит ја повредува автономијата на универзитетите, а и потсетил дека УКИМ веќе го евалуираат експерти од Европската Унија. За државниот испит оттаму сметаат дека наместо да го зголеми, моделот би можел и да го намали квалитетот на високообразовниот процес.
Факултетот за физичко образование дал негативно мислење дека државниот испит ќе го подобри квалитетот на високото образование. Низ својата призма, оттаму дале и пример.
„На пример, по предметот спортска гимнастика кој студентите го полагаат во прва година. Во услови кога студентот преку колоквиуми и испити ќе го положи предметот во прва година, неможно е истото ниво на неговата психофизичка состојба да ја одржува во континуитет во наредните години. Кога повторно би го оценувале после една година, би се добила нереална проценка за нивото на неговата подготвеност во моментот на полагање на испитот“, напишале во мислењето од Факултетот за физичко образование.
Факултетот за земјоделски науки и храна смета дека државниот испит нема да го подобри квалитетот на високото образование, шумарскиот факултет е децидно против воведувањето на државен испит, факултетот за ветеринарна медицина мерката укажува дека е несоодветна за нивниот факултет, а истото го прави и драмскиот факултет кој укажува дека е невозможно да се евалуираат нивните студенти и да се даде проценка на нивниот квалитет со државен испит.
Факултетот за ликовни уметности навел дека хипотетичкото полагање на државен испит во втора и четврта година на овој факултет е невозможно, дури ни во техничка смисла, зашто сите круцијални предмети се од практичен карактер и се изработуваат во подолг процес.
И Факултетот за музичка уметност по одржаниот наставно научен уметнички совет, објаснувал дека за нив државниот испит е неприменлив.
Православниот богословски факултет „Св. Климент Охридски“ - Скопје цени дека државниот испит не би имал некаков значаен ефект.
„Нашите студенти по завршување на студиите се определуваат за парохиска служба, монаштво или просвета во Црквата. Дипломираните теолози во трите гранки дополнително подлежат на надворешна евалуација. Тие кои се определуваат за свештеничка служба полагаат испит за постојана парохија. Кандидатите кои се определуваат за монаштво поминуваат од три месеци до три години во подготвителен-искушенички период.
Научниот совет на Економскиот институт посочува дека во предлогот за државен испит има недоречености и слабости а дека за подобрување на квалитетот треба нов закон.
„Со ваквиот концепт на државен испит би се довеле во прашање целокупните претходни постапки кои ги водел токму Одборот за акредитација и евалуација на високото образование, а преку кои секоја факултет висока школа или институт биле акредитирани за вршење на дејност во високото образование“, поентираат од овој институт. Земјоделскиот институт исто така не го поддржува државниот испит и го оценува како непотребен и неприфатлив.
Институтот за социолошки и политичко-правни истражувања - Скопје, информира дека од вкупно 14 членови на Научниот совет, осум се произнеле по барањето, од кои 7 против воведувањето државен испит. Институтот за македонски јазик „Крсте Мисирков“ не го поддржува државниот испит.
Фармацевтскиот факултет објаснил дека нивните студенти добиваат лиценца, а дека не прифаќаат државен испит за магистерски и докторски студии. Државниот универзитет во Тетово смета дека може да има некаков вид екстерна контрола, но да биде поткрепена со научни критериуми за проверка на знаењата.
„Анкетираните студенти и наставници сметаат дека државниот испит како што е предложен не може да ги опфати сите содржини активности и материјали реализирани во студиите и дека не може да определува за способностите и вештините стекнати кај студентите“, напишале оттаму.
Од Европскиот универзитет сметаат дека предложениот модел од МОН за државен испит, кој се темели на проверка на знаењето со заокружување точен одговор од понудените можни е несоодветн бидејќи инсистира на механичко знаење.
„Барањето на дефиниции и набројувања се методи на испитување кои се позастарени и се помалку се применуваат во светот. Овој систем уште помалку е пригоден за студенти од вториот и третиот циклус на студии и не придонесува кон создавање креативни личности“, стои во дописот потпишан од ректорот Лидија Наумовска.
Од ФОН навеле хипотетички но многу веројатни пречки кои би можеле да го попречат концептот.
„Дали се разгледала можноста студент кој не поседува доволно знаења за положување на еден или повеќе предмети да го положи делот од државниот испит што ги опфаќа првите две студиски години во кои се вклучени тие предмети? Обратно, али не може да се случи „солиден“ студент да не одговори точно на повеќе од две прашања од ист предмет,а сите други да ги положи со висок степен на точност во одговорите? Може, и тоа би значело неположување на државниот испит“, сметаат од ФОН.
Високата медицинска школа на Универзитетот „Св. Климент Охридски“ - Битола наведува дека нема потреба да се полага нов државен испит зашто така не е можно да се зголеми квалитетот на едукација на студентите.
http://www.plusinfo.mk/vest/8424/ga...ekje-od-20-fakulteti-univerziteti-i-instituti
