Еве нешто што спремам, само немав време да го склопам.
Ќе следат уште 2-3 дела, засега го објавувам само првиот.
Уживајте
JeepMkd
Од скромни почетоци и прототипови изградени од 3 различни производители, Jeep со годините еволуира во едно од најпопуларното и најупотребуваното возило на сите времиња. Jeep е употребуван секаде, во борба, во пустина, за
качување по карпи или едноставно за секојдневна употреба. Кажано на кратко, ако некаде во светот има било каков пат, големи се шансите дека некогаш и некако таму поминал Jeep.
Во неколку делови ќе биде претставена историјата на возилата кои ја започнаа 4х4 треската, конкретно развојот на автомобилската икона - краткиот Jeep Universal, кој е „таткото“ на сите модерни теренци кои ги знаеме денес.
Автомобилите Jeep се појавуваат во почетокот на Втората светска војна. Американската влада има потреба од огромен број на општонаменски возила кои ќе се употребуваат во војната и распишува конкурс за пријавување на кандидати. Поставени се неколку услови, меѓу кои и рокот за доставување на првите модели од 70 дена. Се пријавуваат 3 компании: Bantam, Ford и
Willys-Overland (сите американски). Договорот го добива Willys-Overland, а останатото е историја.
1.1940 Bantam Pilot
Користејќи го светски познатиот поим, ова е првиот „џип“. Развиен и изграден од компанијата Bantam од Пенсилванија, ова е првото возило кое се бори за да го добие договорот со владата на САД. По доставувањето на 23 септември 1940 година, Bantam Pilot бил подложен на ригорозни тестови, а остатокот од животот го минува како музејски експонат. Возилото е речиси уништено во сообраќајна несреќа, а некои делови се употребени во подобрениот модел кој почнал да се произведува.
2.1940 Willys Quad
Возилото со кое конкурира Willys-Overland е Quad и со кое всушност оваа компанија го добива договорот. Предноста пред другите конкуренти, и можеби главната причина за победата, е моќниот „Go-Devil“ мотор кој едноставно го „разби“ останатите конкуренти. Сепак, Quad имаше и некои недостатоци, меѓу кои и прекумерната маса, по што беше оставен да се доразработи. Направени се две Quad возила, но им се губи секаква трага. Еден од нив преживеал до 1950 кога е направена фотографијата. Ако Bantam ја започна ерата на Jeep, тогаш Quad e виновен за доминацијата на Willys.
3.1940 Ford Pygmy
Моделот со кој Ford конкурираше беше Pygmy. Овој модел беше прифатен и остана да се тестира покрај моделот Quad на Willys. Но, како и Bantam, Pygmy беше жртва на моќниот Willys и никогаш не доби поголема шанса. Изгледот на Pygmy стана шаблон за подоцнежните модели на Willys.
Моделот на сликата е еден од два кои постојат денес. Ford е единствена преживеана компанија од жестоката трка за договорот.
4.1941 Ford GP
Директен наследник на Pygmy, овој модел беше подобрен и првично беа замислени 1.500 единици. Наскоро интересот порасна, по што беа произведени 4.456 единици.
Спротивно на верувањето дека „GP“ стои за „General Purpose“, „GP“ всушност значи „G“ за возило за влада (Government) и „Р“ за разузнавачко возило со 80-инчно меѓуоскино растојание.
Од прелиминарните модели ова е најзачуваниот модел со 200 примероци за кои се знае дека постојат.
5.Willys MA
Додека Quad беше тестиран, иако веќе го доби договорот, Willys работеше на подобрен модел и го започна развојот на моделот Willys MA. Во споредба со конкурентите, МА беше супериорно возило со мала маса и голема моќност. Се
забележуваат и подоборувања во Warn подвозјето.
Од сите прототипови на Willys, МА е најредок со само 30 примероци кои постојат денес од произведените 1.553 .
6.1941 Bantam BRC-40
Ова возило е последното што оваа компанија ќе го произведе. По 1941 Bantam се фокусира на производство на приколици, мотори за торпеда и авионски тркала за слетувања. И покрај тоа што беше посакуван модел, BRC-40 не ја доби битката.
Ова е вториот најчест модел со стотина примероци кои преживеале до денес.
7.1941 Willys MB (решеткаста маска)
По добивањето на договорот со американската влада произведени се првите 25.808 Willys-и. Карактеристично за овие модели е тоа што имаат решеткаста маска на ладилникот, која подоцна ќе се развие во ребрастата маска која и денес е симбол на Jeep.
МВ со решеткаста маска се навистина ретки, а денес постојат едвај 25 примероци.
8.1941-1945 Willys MB
Херојот на Втората светска војна, уште и познат како Челичниот војник, е Јеер-от кој го промени светот. Со неговото појавување во речниците на сите светски јазици беше додаден зборот JEEP, на македонски „џип“. Произведен во над
330.000 примероци, Willy Jeep MB служеше во секое место од светот. Првите модели на задниот панел имаа втиснато Willys, но поради владините регулативи кои не дозволуваа рекламирање подоцна таа практика беше отфрлена.
Овој модел, главно поради својата историја, е омилен меѓу реставраторите и колекционерите и изобилува со квалитети кои секогаш ќе ве забавуваат и никогаш нема да ве изневерат.
9.1941-1945 Ford GPW
По производството на последниот GP, Ford склучува договор со Willys за изградба на нивниот модел. Нивниот модел, сличен на МВ, беше наречен GPW (Government, 80-инчно меѓуоскино растојание, Willys). Овој модел се разликува од МВ по тоа што на речиси секој дел е втисната буквата F, и поседува неколку разлики во шасијата и каросеријата.
До крајот на војната произведени се нешто над 277.000 примероци што го прави еднакво посакуван и почитуван модел како и MВ.
Повоениот период е навистина интересен за Јеер. Во наредниот дел ќе ја разгледаме појавата на моделите CJ - Civilian Jeep, возилата во кои живее духот на МВ...
O|||||||O
(тесктот го пишував јас, така да копирање не е пожелно)