Сабајлево на раат си го пуштив натпреварот и си го изгледав без стресови и скокања, ми стана традиција кога ќе оствариме некоја убава победа да си гледам реприза од натпреварот пиејќи кафенце, право уживање, плус гледаш работи што во живо не може да се приметат и си правиш анализа, би го препорачал ова на сите да си го практикувате.
Играта фантастична во двата правци, играчите спремни, мотивирани, влеговме во натпреварот решени дека ќе го добиеме, изгледавме како ѕверови пуштени од кафез, кога ги собравме аптекарите не знаеа каде е лево, во 15та минута резултатот беше 7-2 за нас, а нивните 2 гола беа од пенал на Кузманоски, значи 15 МИНУТИ НЕМАВМЕ ПРИМЕНО ГОЛ ОД ИГРА, стварно не памтам кога последно некоја екипа била вака прегазена уште на почеток од натпреварот, во џеб ги ставивме, Мечка и Мишевски ги искасапија цела утакмица, пикерот што може им е најквалитетно покриена позиција не доби топка, го вратија Пешевски во времето кога не можеше да се помрдне на црта и грееше клупа на сегашниот скаут експерт на битолчани-Ванчо Димовски.
За играта во одбрана покрај големата мотивација што ја добиваат од Столе големи заслуги има и Бутинот, кој мора многу повеќе да го цениме, се гледа дека човекот си ја работи работата како што треба и доста разбира ракомет, две сезони по ред ги прави мајмуни Пелистер со двојно помал буџет од нивниот и крајно лимитиран состав, сите играчи под негово водство напредуваат и што е најбитно го респектираат, после супер купот во Струмица и Столе имаше изјава кај што кажа дека Недановски е одличен тренер и треба да има многу поголема почит јавноста кон него, кога такви величини како Столе, Борко, Михо го фалат и сметаат дека треба да биде прв тренер на екипата сигурно има нешто, на крајот и резултатите, играта, хемијата помеѓу играчите доволно кажуваат за неговата работа.
Играчиве не знам кој ги скаутирал, дали Бутинот, Борко или биле предложени од менаџери ама очигледно на тој човек треба да му се симне капа, освен со Хансер и Мело што се утна сите други се полн погодок, дури и двајцава мислам дека не им е толку проблем квалитетот туку изгубени се во атмосферата и немаат некако свое место во целата сложувалка, Хансер вчера доби неколку минути и не знаеше кај се наоѓа, премногу возбуден делуваше, изгледа клуб како Вардар и ваква публика се преголем залак за него.
Косуке е страшно засилување, кажано е веќе се за него, цела екипа е за едно ниво подобра кога е тој во игра, мислам дека и напредокот на Лазаревски се должи доста на добрата комуникација и соработка со Јапонецот, одлично се разбираат и цело време му сервира топки на тацна, вчера постигна 6 гола од кои 5 беа асистенција на Косуке, изнуди и еден пенал исто по негова асистенција, Аларов еден гол даде во прво полувреме после негова топка, злато вредни се вакви играчи како него, прав диригент на цела екипа.
Покрај него мислам дека срце и душа на оваа екипа е Николиќ, од кого јас искрено воопшто ништо не очекував и мислев дека е непотребен трансфер, на крај испадна дека сме добиле прав борец што ќе остава срце на терен секоја утакмица, мислам дека дури и се потценува неговиот придонес во целава ситуација, дефанзивно е сосема коректен и голем мотиватор на цела одбрана, во напад може да шутне од 9 метри и да повлече баш во моментите кога не оди, ќе извади некој влез, усклучување, седмерец по што ја враќа екипата пак во живот, неговата улога во овој Вардар многу ме потсеќа на таа на Карачиќ во оној шампионски тим, посебно кога ја освоивме втората титула.
Срдановиќ и Петриќ исто уште една фантастична партија, кога потпиша Марко сите се смеевме на муабетите дека бил подобар од Манасков, на крај ќе се испостави дека биле во право тие луѓе, многу сигурен пеналџија добивме, лобот што му го даде на Гедбан за најавни шпици, може и тој гол е најдобар опис за целокупниот натпревар, во напад исто сосема солиден, знае да истрча и контра, а сигурен сум дека игра за многу помала плата од таа што ја зимаше Деки бој, такви играчи треба да се носат и во иднина што им се игра за клубот и спремни се за докажување, затоа и Бели и Марко ни се топ заслувања, сигурен сум дека двајцата ќе станат миленици на публиката.
Томовски вчера со натпревар за голмански учебници, како да сакаше да ни покаже на сите колку вреди, ги откажа буквално уште на стартот, посебно оној напаленкото Радивојевиќ што само скока и се дере после секој гол, сиротиот му падна кариера од Фленсбург, Рајн Некар и Пик Сегед стигна во Битола да игра во ледена дворана на свои 30 години, а важеше за едно од најдобрите млади десни крила на времето.
Томовски го заврши натпреварот со 13 одбрани од кои 4 седмерци, прав октопот, еден од најзаслужните за вчерашната победа.
Кај него мислам дека еднинствен проблем е тоа што на страна е многу послаб голман отколку пред своја публика, на сите натпревари кога игравме во Скопје со Пелистер бранеше добро, на тие во Битола стартуваше и секогаш имаше слаба партија, после мораше да влегува Боре да направи шоу.
Се надевам само дека ова нема да ни биде проблем на гостувањата, пошто ако нема Томовски ден замена му е Васе Гогов, во кого и немам баш доверба, никогаш до сега немал посериозен предизвик, сега да очекуваме тој да биде голман што ќе реши натпревар е премногу амбициозно, затоа можеби требаше да се запне да донесеме уште еден голман некој поискусен кој би можел да го замени Томовски од време на време.
Како и да е сите знаеме дека финасиите се ограничени, со моменталните одлично располагаме, така да останува да веруваме на луѓето што го водат клубот, покажаа до сега дека многу повеќе знаат од нас.
Стартот на сезоната ни е одличен, мислам дека и најголемите оптимисти не го очекуваа ова, одлична најава е ова за цела сезона што следи, се надевам само дека сите ќе останат здрави до пролет и ќе влеземе комплетни во битката за титула, има оваа екипа уште многу што да покаже.
