Победа "сардисана" од ФИФА
* Второстепената комисија на ФИФА ќе ја зголеми паричната казна на прилепскиот тим во "случајот Шиков"
Прилепска Победа не може да "крене глава" од казни и суспензии од страна на ФИФА и на УЕФА. Најновата информација која доаѓа од ФИФА говори дека прилепчани ќе мораат да платат дополнителни 25 илјади евра во "случајот Ванче Шиков". Дознавме дека второстепената комисија на светската куќа на фудбалот ја потврди казната која ја изрече првостепената комисија, а воедно истата ќе ја зголеми од 50 на 75 илјади евра. Само за потсетување, во текот на август грчки Ксанти вложи жалба околу случајот на македонскиот дефанзивец, а освен Победа, со 50 илјади евра беше казнет и самиот Шиков. Меѓутоа според последните информации, истата ќе му биде намалена, и тој сега ќе треба да плати 15 илјади помалку, односно 35 илјади евра, додека постојат реални шанси фудбалерот да добие и помала казна. Ксанти со сите сили се обидува да ги наплати парите од заминувањето на Шиков во 2007 година, кога и покрај многуте заинтересирани тимови, сепак, дефанзивецот заврши во прилепска Победа, а потоа направи трансфер во гигантот од Атина, Олимпијакос, кој според "трансфермаркт" чинеше 130 илјади евра. Целата операција за "слободата" на Шиков одела преку менаџери, а бил инволвиран и прилепскиот тим.
Ксанти бара отштета од 350 илјади евра, сума која тогаш се споменуваше за вредноста на фудбалерот, а од тимот замина без никаква отштета. Со тоа што Победа треба да плати 75 илјади евра на ФИФА, прилепчани се дополнително "бомбардирани" и сумата која ќе треба да ја платат изнесува вкупно 125 илјади евра, вклучувајќи ги тука и 40 илјади евра за "местенката" со Пјуник во рамките од Лигата на шампионите. Шиков веќе втора година настапува во Кипар во тимот на Етникос Ахна, заедно со нашиот репрезентативен голман Един Нурединоски и "везистот" Славчо Георгиевски. Исто така во ФИФА се водат неколку спорови со прилепскиот тим од страна на фудбалери - интернационалци кои заминале од Победа, а не биле целосно исплатени според договорите. Поради спор со фудбалер, прилепчани останаа без три бода на стартот од оваа сезона откако ја загубија "битката" во врска со непридржување на одлуката донесена од дисциплинскиот комитет на ФИФА во случајот со Бразилецот Родриго Сантос Алмеида. Никако не треба да се заборави за најголемиот случај кој се води во врска со Победа, а кој се однесува за "местенката" со Пјуник во рамките од Лигата на шампионите. УЕФА го суспендираше нашиот тим со осум години забрана за настап во европските натпреварувања, и изрече доживотна суспензија за тогашниот претседател Александар Забрчанец, како и за капитенот, а потоа и тренер на екипата, Николче Здравески. Пред неколку дена пишувавме дека можно е судот во Лозана доживотната суспензија на Здравески да ја замени со времена забрана за работа во траење од 5 години, додека Ацуле и самиот клуб имаат минимални шанси да се спасат од казна. Тоа би значело дека Забрчанец ќе мора да се соочи со доживотна забрана за работа во фудбалот, додека Победа осум сезони ќе биде без учество на официјални или неофицијални меѓународни натпреварувања. Конечната одлука за потврдата или намалување на казните ќе има до крајот на овој месец, кога судот во Лозана треба да ги соопшти конечните одлуки по жалбата на Победа. Овој случај крена многу "прашина" затоа што наш тим беше првиот во светот фатен во лажирање на натпревар кој е под капата на УЕФА.
Во ФИФА се водат уште неколку спорови во кои се инволвирани македонски фудбалери и тренери. Станува збор за трансферот на напаѓачот Иван Тричковски од Работнички во Црвена Звезда. "Романтичарите" се уште не ја добиле целосната сума за трансферот на Тричко во белградскиот гигант. Истиот тим си има проблеми и со нашиот тренер Чеде Јаневски. Тој има нерасчистен долг со "црвено-белите" од Белград, односно Звезда му должи неколку плати додека Јаневски беше тренер во овој тим.
И. Д. Ивановски
Кој ќе ја плати казната на прилепчани?
Со оглед на финаниската ситуацијата со Победа, се поставува прашањето кој ќе ја плати казната на прилепчани? ФИФА бараните пари ќе ги добие од ФФМ, а потоа нашата куќа на фудбалот ќе мора да ги побарува од Победа. Тоа е еден лавиринт без крај затоа што е јасно познато дека сегашниот прв човек на ФФМ Харалампие Хаџи-Ристески беше порано на чело на прилепска Победа. Цифрата само за случајот Шиков сега е 75 илјади, пари кои ќе мора да се платат до ФИФА во спротивно лошо ќе ни се пишува.
Три бода вредни 9.000 евра
На почетокот на оваа сезона, ФФМ и одзеде на Победа три првенствени бодови, и тоа по директен "налог" на ФИФА. Станува збор за непочитување на дисциплинската комисија на ФИФА во врска со фудбалерот Родриго Стантос Алмеида. Сумата е 9 илјади евра, а доколку прилепчани ги исплатат тие пари до светската куќа на фудбалот, истите пари ФИФА би му ги исплатила на фудбалерот, а трите бода што беа одземени, како што дознаваме ќе бидат вратени на "контото" на прилепчани. Победа сега е на осмото место со вкупно 19 бодови, а доколку парите бидат исплатени, тогаш би имале 22 бода, и автоматски би се искачиле две места погоре, пред Тетекс и Хоризонт Турново.
izvor:
http://www.sport.com.mk/?ItemID=40C987906A699F4A82A1227560C67132
